MAK 2
2
Kyeng Miilai Khat Jisu do Pdam
1Ungta Mma ngi nii khuw mruk makcheen diltha, Kaparnahum paam tha mvan kinlet thungta, Mma ava inn tha ka am daatta kdi ki pau kurjou da. 2Ungbi mii rek knem pok mthuw kurtuwl leiji inn thung nga mmun ksang khat lee ame, thurngot bul kurtlun dekki ku ong lamda, ava thu Jisu ngi mhin inni pauna paryaam da. 3Ungbi Jisu kpaphaak ra kyeng miilai khat pselpa miilai plii ngi kdom da thleng lam da. 4Pdainu mii mkarkee reen leiji kukoi ava Jisu hin pnai pchaang lamme, ava leiji Jisu am ndaat kartin ki inn mthlun puhup lamda, kukoi miilai ava mi iina tu ju ptla lamda. 5Ungu mmaan do rin chaak ava Jisu ngi mdee thungta kyeng miilai ava hin Jisu ngi theda, “Kchapa nah apnu ton rekka akup ptlot pik dokka.”
6Ungbi Nowlam chukpu rek angṭhe kukong daat rekki plung kpur ri hanto karbin lamda. 7“Talu ki da Mma ngi han tolu mpau va? Mma va Isowr kjowm cha ngi pau memo? Isowr kma donle ku mii khat lee ngi pnu kup ptlot pik pchaang me.”
8Ungta mmaanni plung kpur ri mdo bin in ava Jisu ngi dei teng da, ava leiji Mma ngi mhin inni theda, “Talu leiji naan va plung kpur ri abin inna? 9Kyeng mii ava hin tithe ra mko ol sii ava, ‘Apnu tonna akup ptlot pikka dida tithe rang mo kardel ra akpher achom ra chet’ dida tithe rang? 10Pdainu Mii Chapa ngi dultipaam thu pnu rek mdo ptlot pik na ki rutan mthloija tdit naan dodee nra, Jisu ngi kyeng ava hin theda, 11“Neiji ahin kthea, kardel ra ak pher achom ra a inn tha vang,” 12ungbi mii mkheng maiṭhuwm mi msut pṭoi daat arlaan inni mma ngi kardel da mak kpher chom daat da kuk notti vangda, ungbi mii plung mkheng nga ngak chda, Isowr ava hanto punlor chlamda, “Hava lua neenni dei chliit mlai in ring,” di lamda.
Jisu ngi Levi mdo Own
13Jisu ngi Galil duwm biing ngi veikhat mhai nowl thungta, mii knempok kthuwk kurtuwlli klop dok da, ungbi mhin inni Mma ngi purchuk da. 14Ungu Mma ngi hanto mhai kurlon thungta khasna klou rek inn thung ngi Alphias chapa Levi kuk ong daat deida, “Nei kdil aṭoi cha,” dida Jisu ngi mthe thungta rip daat da mdil ṭoi chda.
15Ungta Jisu leh msiikhu rekka Levi inn thung ngi kmaal ra tebol hin khasna kṭhai rek leh pnu kirvei rek tu ko ong da, mleija Mma dil kṭoi mii rekka nem pok da. 16Ungu Jisu ngi khasna kṭhai rek leh pnu kirvei rek tu mmaal meek in ava Nowlam chukpu rek leh Pharisi rekki mdee in thungta, mmaanni siikhu rek hin khewl lamda, “Talu leiji Jisu va mmaan mdo maal ṭhi lamda?” 17Ungbi mmaan dokhewl ava Jisu ngi aryaa da, ungu mhin inni theda, “Kchun kdam mii va kdim kriing me, pdainu kukoi rek daat,Neia rinkindit rek ko own kurjung pmaang pdainu pnu kirvei rek ku own kurjung ping.”
Kngowl Mlei thu mdo Khewl
18Tunva baptis kup ptlot Johon siikhu rek leh Pharisi rek siikhu rek va then ngowl kchok lamda, ava leiji mii angṭhe ngi Jisu hin thleng lam da pau khewl lamda, “Talu leiji baptis kup ptlot Johon siikhu rek leh Pharisi siikhu rek va then ngowl lam thida, Nah asiikhu rek va then ngowl lam me da?” 19Ungbi Jisu ngi mhin inni theda, “Kphalpa mdak ma am daat arlaannu mmal rek va then kngowl kro mo? Kphalpa mdak ma am khim khai thu tden thung preva mmaanni then ngowl lam nime. 20Mmaan hinki kphalpa mdo sun ṭhi dok nrang ki nit rek karvang ra, ava nit thung ro ngi mmaanni kngowl lamra.
21Ku mii khat lee ngi buw laak ren louvi buw pliw tun kleng lot nime, mma ngi ava mtlot bi buw pliw ava buw laak ren ava ngi jen donle kheel sii ngi kik ṭet ra. 22Ungta ku mii khat lee ngi rik rou dii ren ava saavun khao pliw thu daal nime, mma ngi mdaal tpombi saiphok donle kukui chra, ava kchang nga rik rou dii ren ava saavun khao ren khat thu mdo daal ra.”
Sabath Nit Mlei thu mdo Khewl
23Sabath nit nii khatti Jisu ngi kehu bil thu kurlon da. Msiikhu rek tu hanto mche arlaan inni, msiikhu rek va kehu paar kip pjiit pṭhun lamda. 24Ungbi Pharisi rekki Jisu hin the lamda, “Asuw, talu leiji asiikhu rek va sabath nitti Nowlam do rot ma nong mtlot inna?” 25Ungbi Jisu ngi arthawng da, “Devid ti then mchaak nuwm mpha thu mdo tlot ava naanva pa maan timo? Mmiiṭhi rek leh mdak poi mtham mpha thu, 26tak heppi Isowr Inn thu lut da,Abiather ri thiimpu kinreel mtlot mpha thung ngi, Isowr hin thenpen mdo down dok ava mdo chaak. Nowlam dothe dil kṭoiva ava thiimpu daatti mdo chaak ra, pdainu Devid va chaa thida mmiiṭhi rek ruk pii memo?” 27Ungta Jisu ngi mhin inni theda, “Sabath nit ava mii tum ra mdo pa am, sabath tumra mii mdo pa am pme. 28Ava leiji Mii Chapa ava sabath nit rekki Mukpu ruk kurthuwk.”
Избрани в момента:
MAK 2: LAMKBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.