MAK 3
3
Mkhut Kyeng Miipah Khat
1Ungu Jisu ngi synagog thu mlu nowl thungta mkhut kseek miilai khat am daat da. 2Ungbi sabath nitti Jisu ngi map pdam luwngta tuk kjown raan kdi ngi tup prutti mmaanni sut pṭoi lamda. 3Kseek miilai ava hin Jisu ngi theda, “Hava tha arvang.” 4Ava dilli Mma ngi mii rek hin theda, “Sabath nitti nenki Nowlam va tatlot ra nong mdo rot talu ka am da? Kṭha ktlo rang ki mo sul kpurnul rang ki da? Mii rinkhu kek ktlan rang ki mo ke eayou rang ki da?” Pdainu mmaanni rim kdi am lamda. 5Ungta Mma ngi plung kthii ngi msut bong lam dilli, muplung in kap pchai reen ava mdee thungta plung pkham psuk lamda, thida mii ava hin theda, “Akhut arjii,” ungu mma ngi mkhut marjit thungta mkhut ava dam chda. 6Ava leiji Pharisi rekki thuwk teng lamda, tak heppi Mma ava ti ea kre rang kdingi Herod mii rek tu Mma raal kpii ngi karseel psuk lamda.
Duwm Biing ngi Kurtuwl Mii rek
7Jisu leh msiikhu rekka duwm biing ngi vang kunsun lamda, ungbi Galil paam ki leh Judia paamki mii knem pokki mdil ṭoida. 8Ungta Jerusalem paam, Edomia arveel ki, Tyr leh Sidon khuwpii arveel ki, ungu Jordon paam kniw thuwna ktong ki rekki Jisu nong tlot aryaa lamda Mhin thleng lamda. 9Ungta mii rek do duwl ma nra msiikhu rekki arkuwng khat mdo purthlon nraan Mma ngi theda, 10mleija mii knem pok Mma ngi mdo pdam leiji omlai kirvei rek mkheng ngi mdak mdo thown chaak nraan lei Mhin knaira nam kurduwl lamda. 11Ungta pthla ktobor rekki Mma mdee in mpha thu mdu sukki kurthluwn lamda, “Nah Isowr Chapa pti,” kdingi owng lamda.
12Ungta ku mii khat lee hin mdo pandan ma nraan Jisu ngi mhin inni kparsa katti pau pṭum da.
Jisu ngi Siikhu rek Sowmlei Knii mdo Kchol
13Ungta Jisu ngi lown tha hangkal thida mdo ngei rek ava Mhin own lamda. Ungbi mmaanni Mhin hang lamda. 14Mma doṭhi ra ungu paumin kparyaam mdo sii ra sowmlei knii ava Mma ngi kchol lamda. 15Tarnam mdo rei pthii pchaan nraan ki rutan ruk pii lamda: 16Mma ngi Simon dida mmiing mdo thowl Pitor; 17Jebidi chapa rek Jeems leh mnaopa Johon (mmiing inna Benarji ditta pṭeek kpuwk chapa rek dida Jisu va mdo thowl) 18Andrija, Philip, Bartholomio, Mathi, Thomas, Alphias chapa Jeems, Thadius, Kenan ki Simon, 19ungu Mma kip pthlei Iskariot ki Judas hava lim kchol lam da, ava dilli mi inn tha vang da.
Jisu leh Belyebul
20Ungta mii rek thuwk kurtuwl pok nowl da ava leiji kmaal pchaang chlamme. 21Mma ava mong kuk kto kcha a dida mii rek ki mdo the mphungka rekki aryaa lamda, mdo pdown nraan Mhin va lamda. 22Ungta Jerusalem ki kurjung Nowlam chukpu rek angṭhe ngi Mhin the lamda, “Mma ava Belyebul marvee chaakka, ungu tarnam kruwng chapa rutan piikki tarnam rek mrei pthii pchaanna.” 23Ungbi Mma ngi Mhin own lam thida paupurtolli theda, “Tak heppi seitaan va seitaan krei pthii rang da? 24Kruwngpaam khat ava mthi na ngi mṭhen bi, ava kruwngpaam ma rip chip pchaang nime. 25Ungu inn ava mthi na ngi mkurkhui chaak bi inn ava rip chip pchaang nime. 26Ungu seitaanni mdak saa mthi na ngi kulro msora mkurkhui chaak bi, rip pchaang nime, pdainu mṭut chaak na kurthuwk ra. 27Ungta ku mii khat lee ngi ru ktangpa inn thu lut da mdo thloi ava lowng pchaang nime, ru kri ngi ru ktangpa ava bowl thidonle mi inn thungki klowng pchaang rora.
28“Kinditti, Neiji ahin thaanni kthea, mii chapa rek pnu ton ungu mmaanni Isowr kjowm cha ngi mpau in mkheng ava kup ptlot pik ra. 29Pdainu ku mii khatti pthla kchiir tun kjowm cha ngi mpau bi ava tden thung preva ptlot pik nime, pdainu kṭuw knai kma pnu kirvei chra.” 30“Mleija Mma ava pthla ktobor marvee chaakka,” kdingi mmaanni the lamda.
Jisu Nuh leh Mnaopa le
31Ungta Jisu nuh leh mnaopa le arva lamda, duwn tha krip daatti pauvi hai pthla lamda. 32Ungbi tukhul da kuk ong mii rekki Mhin theda, “Duwn thang ngi anuh leh anaopa le ngi ata thlaam lamma.” 33Ungbi Jisu ngi arthawng da, “Kule da Nei knuh leh knaopa lea?” 34Ungta Mma tukhul da kukong rek hin suw purkhol thida theda, “Hava lea Nei knuh leh knaopa le! 35Isowr do ngei ktlo mii ava Nei kṭapa, Nei kchernu, ungu knuh.”
Избрани в момента:
MAK 3: LAMKBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.