MAK 1
1
Jon Baptisma Joban Ngin phoangthô
(Mt 3.1-12; Luk 3.1-18; Jhn 1.19-28)
1Arepa Joban Chha, Jisu Krista Nginkongsen.#1.1: wanwanthe nâng Joban Chhapa raangmah. 2Arepa Isaia mõngma raangtah rãngrãng bengdâng wah:
“Joban ma ngatwah, ‘ngama nangmako nga nginmatte nanglem laangkoh rãng echienkat ang.’
3Sehah khonâng wathe phoangrak lahma tonga,
‘Teso rãngma lem khoakhem koh en;
ate khôamrãng lemtin hôankoh en!’ ”
4Jon baptis sehahkho nâng hong lahma baptijem phoangkoh wah ngale Joban nginpa phoangthôkoh rewah.#1.4: Jon baptis sehah khonâng hong lahma baptijem phoangkoh wah ngale Joban nginpa phoangthô rewah; wanwanthe nâng raangeka Jon baptis sehah khonâng hong lahma Joban ngin phoangthôwah. “Ne papwah hungngaklit letma baptijem kepen,” ngama atema mihnyan hehnâng thôkoh wah, erohkoba “Joban ma nepap heh map ekohhèn.” 5Judia diak ngale Jeroselem hahwah ajahthem mihnyan heh Jon ngin chohtatrãng chhoanwak wah. Thinma pap hehrãngma mappa thâwah, ngale Jordan joko thinnâng Jon ma baptijem kohwah.
6Jon ma ut banwah hôanwah khetpa kepwah, ngale ate roamko ngemkhoan roamdit pa dit rewah. Ate phhekchhah pa wunwah kupchhang phanphe ngale nyahti heh dângwah. 7Atema mihnyan hehnâng thôkoh wah, “Nga diwah katte mihnyan pa nga noma abâmbâm adong. Ngama kunjup lekma ate dapheng putkoh rãngjô punmek. 8Ngama nenâng joma baptijem koheka, rohkomin atema Asâthôanju ma baptijem ekohhèn.”
Jisu Baptijem Kep ngale Ate Hungtôan Ngin
(Mt 3.13—4.11; Luk 3.21,22; 4.1-13)
9Chentô letaang thangma Jisu Nazarat wah Galili nâng katwah, ngale Jon ma Jordan joko atenâng baptijem kohwah. 10Jisu joko wah loatwâng rienrien, atema rangkhethung pa laanglahma khewênwah, ngale Ju ate khohko phariwo rãngrãng kalahma khewah. 11Ngale rangkhethung wah jabkhab hôngjab katwah, “Nanga ngama nyahrãng ahun Chha. Nga nangdemnâng nyahrãng rinme ekang.”
12Lemlienma Juma atea sehahkho nâng chhoanthuk wah, 13Enâng joakma hungtoan lahma jâroak belii tôngwah. Eretheko wunngem hehmin dângwah, rohkomin rangkhethung wah Joban ngintatte heh kalahma atenâng chohsok katwah.
Jisu ma Ngahloatte Wabelii Roo
(Mt 4.12-22; Luk 4.14,15; 5.1-11)
14Jon pa phâtek nâng sekdiko, Galili nâng Jisu kalahma Joban wah Nginkongsen pa phoangthô katwah. 15Atema ngatwah, “Sanpoat pa lâthângtah,” “ngale Joban Hahsông pa lânam hutha! nepapwah hungngaklit letma Nginkongsen ko putedâlem en!”
16Galili josi kêmma Jisu lienkhoam poatko, atema ngahloatte wanii khewah, Simon ngale ate naa Andru chaakma ngahhat dângwah. 17Jisu ma thinnâng ngatwah, “Ngadijun ha, ngama mihnyan loatrãng hethôa.”
18Lemlienma thin chaakpa phethien lahma johchhoan wah.
19Ate nôangthe khôamdiko ahan pho anaa wanii wîenchoh khewah, Zibidi chha Jems ngale Jon dângwah. Khôankhoko tonglahma chaak sênphîn dângwah. 20Jisu ma thin lepkhe rienrien lemlienma roowah; ephumma thinma thinwa Zibidi khôankhoko dekbi bite siettah mihnyan heh demnâng phethien lahma Jisu demnâng johchhoan wah.
Juchhih Lupte Mihnyan
(Luk 4.31-37)
21Jisu le ate dijunte heh Kaparnam hahnâng hokwah, ngale eredijâ wah Pientông jâko Sanagog nâng hûlahma hethô wah. 22Ate ngin chohtatte mihnyan heh atema hethô junko bârit rewah, chenrãngma ngako, atea Niemarang hethôte heh rãngrãng ledang; atema chaan demnâng hethô wah.
23Ere sanpoatko juchhih lupte mihnyan Sanagog nâng hûlahma rak hokwah, 24“Nazarat wah Jisu, nangma ninâng chennire hun ehia? nanga ako nichhih sietrãng hûeroa? Ngama nanga hen a erepa jet e - nanga Joban wah Asâthôan nginmatte!”
25Jisu ma juchhihko ngatwah, “kihtongo, ngale mihnyan kowah loatchhoan o!”
26Juchhih pumma mihnyan pa cheili tiithukwah, ngale chaanmõang raklahma mihnyan kowah loatchhoan wah. 27Mihnyan heh phangtang nyahrãng barii lahma wathema watheko jabmînwah, “arepa chenni dangeka? arepa chenni anyan wien hethôeka? are mihnyanko juchhih heh junloat chaanmin win, ngale juchhih hehma ate ngin kepeka!”
28Ngale Galilijaa chentô nâng Jisu nginpa lemlienma chohtat wah.
Jisu ma Jahmõang Mihnyan Sênsiet
(Mt 8.14-17; Luk 4.38-41)
29Jisu le ate dijunte heh, erediko thindem ko Jems ngale Jon, Sanagog wah loatchhoan lahma Simon ngale Andru humnâng tintin katwah. 30Simon tangnyu nyongpa chetloat khoanchetma jupthinko juplahma dângwah, phumma Jisu hokkhôamhok rienrien lemlienma ate ngin pa thôkoh wah. 31Jisu ate tânâng wãng lahma ate dekkosiet lahma satsietwah. Phumma khoanchetpa senlahma atema thinnâng khoakhêm wah.
32Sannyupdi rangjâthahko, mihnyan hehma Jisu tâko chentô khun atamte ngale juchhih lupte heh siethokwah. 33Erehah kowah mihnyan heh phangtang hum thakhoko khôanhok wah. 34Jisu ma jatrup khoanchetma chêmte heh jahmõang mesiet wah, ngale juchhih min jahmõang junloat kohwah. Atema juchhih hehnâng chennimin jab aja thuk ho, chenrãngma ngako, ate hen a erepa thinma jetwah.
Jisu ma Galili nâng Joban Nginthô
(Luk 4.42-44)
35Eredijâ wowen khoko, rangwo mabâng thângma, jisu satlahma humwah loatchhoan wah. Ate hahdaang kowah chhoan lahma mihnyan lesongthe nâng chhoan lahma rangsoam wah. 36Phumma Simon ngale ate lemru heh Jisu lemrãng chhoanwah, 37ngale thinma Jisu chohlem lahma atenâng ngatwah, “Anga ngama nang lem eho.”
38Phumma Jisu ma dânthâng wah, “Nãnga are nãng kêanâ wah hahdaang hehnângmin chhoanmin. Ngama thinnângmin Joban nginpa thôkoh min, are rãngma jôba nga katwah.”
39Ephumma Galilijaa phangtang nâng phoangkhoam lahma Sanagog hehnâng Joban ngin phoangthô kohwah, ngale juchhih hehmin junloat kohwah.
Jisu ma Delawa Mesiet
(Mt 8.1-4; Luk 5.12-16)
40Angêm khoanchette delawa wathe Jisu tâko hûlahma dakuh thohû lahma atenâng roatsep wah. Atema ngatwah, “Nangma mehun oko, nga tasensiet hang.”#1.40: nga sensiet hang: ere khoanchet pa niem junko achin ngama ngatwah.
41Jisu ma mihwako nyahrãng mînchenwah,#1.41 mînchen; wanwanthe nâng rinkhah ngama raangeka. ngale ate dek loatsiet lahma sahloatwah. Atema ngatwah. “Ngama sênsiet huneki,” “sen o!” 42Lemlienma mihwa kowah khoanchet pa chhoanwah, ngale sênwah. 43Erediko Jisu ma atenâng senthemthem thôko lahma lemlienma chienchhoan wah, 44Atenâng ngatwah, “Tattan, arepa hennâng min nekthôkoh. Rohkomin soam aroakte tânâng tintin wãngo atema chenthatsû tanho; erediko chentôma nanga sentoh ngama jetrãng, Mosa ma chienwah soam aroak thinpa wênkoh.”
45Rohkomin ere mihwa pa chhoan lahma nginpa chentô nâng phoangthô kohwah. Ere hahko Jisu mihnyan heh mitkhesok ko lejien hongkhoam lândangroh atema phoangthô wah. Erohwah, Jisu mihnyan henjô lesongthe nâng tôngchhoan wah, ngale eretheko mihnyan heh chentô thewah ate tânâng hokwah.
Избрани в момента:
MAK 1: NOKTBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.