MAK 2
2
Jisu ma kôasôte Delawa Sênsiet
(Mt 9.1-8; Luk 5.17-26)
1Jâthe jânii diko Jisu kaparnam nâng ngakhok wah, ngale Jisu ngakhok nginpa chohtat wakwah. 2Ephumma mihnyan heh jahmõang khôanhû lahma humko thechaakjô ahotu dângwah, rangsâ wah kâsek lemthong komin thechaak ahotu dângwah. Eko Jisu ma thinnâng Joban ngin thôkoh wah 3Wabelii mihnyan ma Jisu tânâng kôasôte delawa wathe pehok wah. 4Mihnyan heh jahmõang dâng phumma, kôasôte pa Jisu tânâng humkhen nâng lejien sietwên dângwah. Ephumma thinma Jisu tongeka punko supkho rapdoak wah. Chenthu thinma suptok khopa rapdoak diko, kôasôte mihnyan pa ate hemko jupthuk lahma waangphe katwah. 5Jisu ma thin putedâlem pa adong khelahma, kôasôte mihnyan ko ngatwah, “Echha, nangpap heh map lâkohtih.”
6Erethe kowah tôngte Niemarang hethôte hehma thônghun wah, 7“Aroh atema chenroh chinjab eka? Arepa Joban thãse eka! Joban loloba pap map tâkoh tepa!”
8Thin hungnâng chenni thonghun eka arepa Jisu ma lemlienma jetlo lahma thinnâng ngatwah, “Nema aroh chenrãngma thonghun eken a? 9Are kôasôte mihnyanko, ‘nangpap heh map lâkohtih ngatpa chenjô latmah dangmahne,’ ngale, ‘Toanchep o, nang hempa toanpeo, ngale khoam o, ngamemin tanga ang’? 10Ngama Mihnyan Chha nâng are hahtokkhoh ko pap mapkoh rãng chaanwin, ngama nenâng ekhesok a.” Ephumma atema kôasôte mihnyanko ngatwah, 11“Ngama nangnâng chien eki, toanchep o, nang hempa toanpeo, ngale humnâng wãngo!”
12Thin phangtangma sokpoatko, mihwapa ate hempa pelahma tôanchep wah, ngale lemlienma khôamchhoan wah. Thin phangtang nyahrãng bâritwah, ngale Joban nâng rôwakwah, thinma ngatwah, “Nima arerãngrãng chenthumin mathat chohkhe eki!”
Jisu ma Livi Roo
(Mt 9.9-13; Luk 5.27-32)
13Galili jophanâng Jisu wîenngak katwah. Phumma ate tânâng mihnyan heh hokwah, ngale thinnâng Jisu ma hethô wah. 14Jisu khôam jenjenko, Alphias chha thãkho thâte Livi ate Ofic ko tonglahma chohkhe wah. Jisu ma atenâng ngatwah, “ngadijun hang.” Phumma Livi toanchep lahma Jisu dijunwah.
15Ere chuthe diko Jisu ma Livi humko phhekchhah chhahwah.#2.15: Livi humko; ba ate (arepa Jisu) hum. Thãkho thâte ngale papi mihnyan heh Jisu diko jahmõang junkhôam wah, ngale Jisu le ate dijunte heh demnâng phhekchhah jahmõang ma johchhah wah. 16Niemarang hethôte ngale Farasi hehma Jisu papi mihnyan ngale thãkho thâte heh demnâng phhekchhah roamchhah lahma khewah, ephumma thinma Jisu dijunte hehnâng thôngphâ wah, “Arerãngrãng mihnyan heh demnâng ate chenrãngma roam phhekchhah eka?”
17Jisu ma erepa tatlahma thinnâng dânthâng wah, “Khoanchet hote mihnyan hehma doktor lemmah, khoanchette mihnyan hehma loloba doktor lemeka. Nga a dong aleng dângte mihnyan heh roorãngkat dangmahrâng, papi mihnyan heh roorãng kaerâng.”
Lephhek Lechhah Thangma Rangsoam rãngma Chhien
(Mt 9.14-17; Luk 5.33-39)
18Jon baptis dijunte ngale Farasi heh chenjô lephhek lechhah thangma rangsoam wah. Phumma mihnyan khuthe hûlahma Jisu nâng thôngphâ wah, “Jon baptis dijunte ngale Farasi heh dijunte hehma chenrãngma lephhek lechhah thangma rangsoam eka, nang dijunte hehma eroh soammah?”
19Jisu ma dânthâng wah, “Nemnyansiet kuhhôan thinnâng hûera heh lephhek lechhah thangma engakchhoan a ngama thonghun eken a? eroh chenthujô ngakchhoan mah! Nemnyanwa pa thin demnâng tôngpoatko, thin eroh letongmin. 20Phumma thintâwah nemnyanwa pa sietchhoan rangwô ehûra, eredikoba thinma lephhek lechhah thangma etonga.
21“Henmemin khetnyan chhuppa khetpã khohko petphinmah, chenrãngma ngako khetnyan chhup pumma tinsiet lahma khetpã pa khajâ lahma lodong elojâa. 22Ngale henmajô angurti nyanpa angurti pã thòko petkienmah, chenrãngma ngako angurti pumma thòpa epoakthuk a, phumma angurti ngale angurti thò wanniinii echhihjâa. Erohwah, angurti nyanpa thònyan nâng kienmin.”
Joban Pientôngjâ rãngma Nginchhien
(Mt 12.1-8; Luk 6.1-5)
23Pientông jâko Jisu chhahthongma dânkhôam wah. Ate dijunte hehmin ate demnâng johdan khôamwah, eko dijunte hehma chhahri pûnphhek wah. 24Ephumma Farasi hehma Jisu nâng ngatwah, “Sûtan, nãng Niem junko Pientông jâko lemolipa nang dijunte hehma moeka!”
25Jisu ma thinnâng dânthâng wah, “Chenthu Devit rêmrii lahma chenni komin phhekchhah hun poatko Atema chenni retah a erepa nema mathatweih ekenne? Ate ngale ate mihnyan heh rêmrit dângwah, 26Ephumma Joban humko wãng lahma Joban nâng kohtah phhekchhah pa chhahwâng wah. Arepa Abiathar pa soam aroakte adong dângpoatko dângwah. Nãng Niem junko soam aroakte ma loloba ere phhekchhah pa tâphhek chhahwah - phumma arepa Devit ma chhahwah, ngale ate demwah mihnyan hehnângmin chhahthuk wah.”
27Ngale athôanko Jisu ma ngatwah, “Pientông rangwopa mihnyan rãngma asenrãng hôanwah; mihnyan pa Pientông rangwojâ rãng hôan dangmah. 28Erohwah Mihnyan Chhapa Pientông rangwo rãngmemin Teso.”
Избрани в момента:
MAK 2: NOKTBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.