Ngāue 11
11
Ko e Fakamatala ‘a Pita ki he Siasi ‘i Selusalemá
1Na‘e fanongo ‘a e kau ‘apōsitoló mo e kakai ‘i Siutea na‘e tui kia Sīsuú kuo tali ‘e he kakai mulí e Ongoongo Lelei ‘a e ‘Otuá. 2Pea na‘e foki atu ‘a Pita ki Selusalema, pea kamata fakakikihi mo ia ha ni‘ihi he kakai Siu na‘e tui kia Sīsuú. Ko honau lotó ke kamu e kakai muli na‘e tui kia Sīsuú. 3Na‘a nau pehē ange kia Pita, “Na‘á ke nofo he ngaahi ‘api ‘o e kakai muli, pea a‘u pē ki ho‘o kai mo kinautolu.”
4Pea fakamatala ange ‘e Pita kiate kinautolu e me‘a na‘e hokó, pea ko ‘ene fakamatalá eni, 5“Na‘e fai ‘eku lotu ‘i he kolo ko Siopá, pea fakahā mai ai kiate au ha me‘a na‘e hangē ko ha fu‘u tupenu ‘oku tuku hifo mei langi, pea ‘oku pukepuke ‘aki hono ngaahi tuliki ‘e faá, pea ‘oku tukutuku hifo ki hoku tafa‘akí.
6Peá u sio ki aí, kuo fonu ai e fanga manu, ‘o kau ai e fanga manu fekai, mo e fanga manu totolo, pea mo e manupuna. 7Peá u fanongo ki he le‘o ‘oku pehē mai, “Tu‘u ki ‘olunga, Pita. Tāmate‘i ha manu hena ‘o kai!”
8Ka u pehē atu ‘e au, “‘Ikai, ‘Eiki! Kuo te‘eki ai ke u kai ha me‘a ‘oku tapui he Laó ke ‘oua ‘e kai.”
9Pea toe ongo mai e le‘ó mei he langí, “Kapau kuo fakahā mai ‘e he ‘Otuá ‘oku ngofua ha me‘a ke kai, pea ‘oua te ke lau ‘e koe ‘oku tapu ke kai.” 10Na‘e tu‘o tolu ‘a e hoko e me‘á ni, pea toki ‘ohake kotoa ia ki he langí. 11Fe‘unga tonu pē mo iá, mo e a‘u mai ha kau tangata ‘e toko tolu mei Sēsalia ki he ‘api na‘á ku nofo aí. 12Pea na‘e fekau ‘e he Laumālie Mā‘oni‘oní ke ‘oua te u tāla‘a ka u ‘alu mo kinautolu. Pea mau ō leva mo ha toko ono na‘e tui ki he ‘Eikí ki he ‘api ‘o ha tangata 13na‘á ne tala mai kuo hā ange ki ai ha ‘āngelo, pea na‘e fekau ‘e he ‘āngeló ke ne pōpoaki ki Siopa ke ha‘u ha tangata ko Saimone Pita, 14pea ‘e toki tala mai ‘e Pita kiate kinautolu ‘a e me‘a ‘e fakamo‘ui ai ia pea mo kinautolu ‘oku nofo ‘i honau ‘apí.
15Pea lolotonga pē ‘eku kei leá, kuo foaki e Laumālie Mā‘oni‘oni kiate kinautolu, ‘o hangē tofu pē ko hono foaki kiate kitautolu ‘i he kamata‘angá. 16Peá u manatu‘i ai e me‘a na‘e folofola‘aki ‘e he ‘Eikí, ‘Na‘e fai papitaiso ‘e Sione ‘aki ‘a e vaí, ka ‘e papitaiso kimoutolu ‘aki ‘a e Laumālie Mā‘oni‘oní.’ 17Na‘e foaki ‘e he ‘Otuá ma‘á e kakai muli ko iá ‘a e me‘a‘ofa pē ko ē na‘á ne foaki ma‘atautolu ‘i he‘etau tui ki he ‘Eiki ko Sīsū Kalaisí. Pea ko hai au ke u ta‘ofi ‘a e ngāue ‘a e ‘Otuá?”
18Pea nau ta‘ofi leva ‘enau fakakikihí ka nau fakahīkihiki‘i e ‘Otuá. Na‘a nau pehē ‘e kinautolu, “Ko eni kuo fakatafoki ‘e he ‘Otuá ha kau Senitaile kiate ia ke nau mo‘ui ai.”
Ko e Siasi ‘i ‘Aniteoké
19Na‘e movete atu ki he feitu‘u kehekehe ‘a e ni‘ihi na‘e tui ki he ‘Eikí koe‘uhí ko e fu‘u fakatanga lahi ko ē na‘e tupu mei he tāmate‘i ‘o Sitīvení. Pea a‘u atu ai e ni‘ihi ki Fīnisia, mo Saipalo, mo ‘Aniteoke pea nau tala ai pē ‘a e ongoongo leleí ki he kakai Siú.
20Ka na‘e ‘i ai ha ni‘ihi nofo Saipalo na‘e kau he ō ki ‘Aniteoke ‘o kamata malanga‘i ki ha kakai mulí ‘a e ongoongo-lelei ‘o kau ki he ‘Eiki ko Sīsuú. 21Na‘e kau ‘a e ‘Eikí mo kinautolu, pea ului ai ha tokolahi ‘o tui. 22Na‘e a‘u atu ki he siasi ‘i Selusalemá ‘a e ongoongo ‘o kau ki he ngaahi me‘a kuo hokó, pea nau fekau leva ‘a Pānepasa ke ‘alu ki ‘Aniteoke.
23Na‘e a‘u mai ‘a Pānepasa ki ai, ‘o ‘ilo e fu‘u tapuaki ‘a e ‘Otuá kuo fai ma‘anautolú, pea fiefia ‘aupito ai hono lotó ‘o ne kole kiate kinautolu ke nau piki ma‘u ai pē ki he ‘Eikí. 24Ko e tangata anga-lelei ‘a Pānepasa mo tui mālohi, pea fonu ‘ene mo‘uí he Laumālie Mā‘oni‘oní. Pea na‘e tupu fakautuutu ai pē ‘a e tokolahi ‘o e kakai na‘e tafoki ki he ‘Eikí.
25Na‘e ‘alu ‘a Pānepasa ki Tāsusi ‘o kumi ‘a Saula. 26Pea ko ‘ene ma‘u pē ‘a Saulá, peá ne ‘omi ia ki ‘Aniteoke, ‘o na kau he siasi aí mo fakahinohino e kakai tokolahi ‘aupito, ‘o fe‘unga mo ha ta‘u kakato ‘e taha. Ko ‘Aniteoke ‘a e kolo na‘e fuofua ui ai e kakai ‘oku tui kia Sīsuú ko e kau Kalisitiane.
27Lolotonga iá, mo e a‘u mai ha kau palōfita mei Selusalema ki ‘Aniteoke. 28Ko e toko taha ‘iate kinautolu ko ‘Akapusi, ‘a ia na’e kau ‘a e Laumalie mo ia, na’á ne fakahā mai ‘e hoko ha honge lahi ‘i māmani kātoa. Na‘e hoko ‘a e honge ko iá ‘oku lolotonga pule ‘a Kalōtiasi. 29Na‘e loto e kakai ‘i ‘Aniteoke na‘e tui kia Sīsuú ke fai ha fa‘ahinga tokoni te nau ala lava ki he siasi ‘i Siuteá, 30‘o nau fakamoimoi ‘enau me‘a‘ofá ‘ia Pānepasa mo Saula ki he kau taki siasi ‘i Selusalemá.
Избрани в момента:
Ngāue 11: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.