Ngāue 10
10
Ko Pita mo Kōniliusi
1Na‘e ‘i ai ha tangata nofo Sēsalia ko Kōniliusi, ko e ‘eikitau ia he vāhenga tau na‘e ui ko e “Vāhengatau ‘Itali.” 2Ko e tangata lotu ‘a Kōniliusi. Pea na‘e tui ‘Otua kotoa mo e kakai ‘i hono ‘apí. Na‘á ne fa‘a foaki pa‘anga ma‘á e kakai masivá, peá ne lotu ma‘u pē ki he ‘Otuá.
3Pea fe‘unga nai mo e tolu efiafi he ‘aho ‘e taha, kuo hā ange ha ‘āngelo ‘a e ‘Otuá kia Kōniliusi, ‘o ne ui mai kiate ia. 4Na‘e ‘ohovale ai ‘a Kōniliusi, ‘o ne sio fakamama‘u ki he ‘āngeló. Peá ne ‘eke ange ki he ‘āngeló, “Ko e hā e ‘uhinga ‘o e me‘á ni?” Pea tali mai e ‘āngeló, “Kuo tali ‘e he ‘Otuá ho‘o lotú, pea kuó ne ‘afio‘i ho‘o ‘ofa ki he kakai masivá. 5Fekau ha tamaiki ki Siopa ke nau ‘omai e tangata ko Saimone Pita. 6‘Oku lolotonga nofo ia ‘ia Saimone ko e tangata ngaohi koloa kili‘imanu ‘oku tu‘u hono ‘apí ‘i matātahi.” 7Na‘e ‘alu leva e ‘āngeló, kae ui ‘e Kōniliusi ha‘ane ongo tamaio‘eiki mo ha‘ane sōtia na‘e tui ‘Otua, 8‘o ne fakamatala ange e me‘a kotoa pē kiate kinautolu, peá ne toki fekau ke nau ō ki Siopa.
9Pea ko e ho‘atā mālie he ‘aho na‘e hokó, kuo fakaofiofi atu e kau tangatá ki Siopa, pea ‘oku lolotonga fai ‘e Pita ‘ene lotu he funga fale na‘á ne nofo aí. 10Pea faifai ‘ene lotú, peá ne ongo‘i ‘oku fu‘u fiekaia ‘aupito. Pea lolotonga ‘enau teuteu ‘ene me‘atokoní, kuo mata-visone ia, 11‘o ne sio ki he langí kuo fakaava kae tuku hifo ai ki māmani ha me‘a na‘e hangē ha fu‘u tupenú, pea ‘oku pukepuke ‘aki hono ngaahi tuliki ‘e faá. 12Pea kuo fonu ai e fanga manu kehekehe, ‘o kau ai e manu e funga fonua mo e manupuná.
13Pea ongo mai ha le‘o ‘oku pehē, “Tu‘u ki ‘olunga Pita! Tāmate‘i ena ‘o kai.” 14Pea pehē atu ‘e Pita, “‘Ikai! Kuo te‘eki ai ke u kai ha me‘a ‘oku tapui he Laó ke ‘oua ‘e kai.”
15Na‘e toe ongo mai e le‘ó, “Kapau kuo fakahā mai ‘e he ‘Otuá ‘oku ngofua ha me‘a ke kai, pea ‘oua te ke lau ‘e koe ‘oku tapu ke kai.”
16Na‘e tu‘o tolu ‘ene hoko e me‘á ni, pea toki fakafoki e tupenú ki langi.
17Na‘e fifili ‘a Pita ‘i hono lotó pe ko e hā e ‘uhinga ‘o e me‘á ni, mo e a‘u mai e kau tangatá meia Kōniliusi 18‘o faka‘eke‘eke pe ko e ‘api koā ia ‘oku nofo ai ‘a Saimone Pitá.
19Pea lolotonga ‘a e kei fifili e loto ‘o Pitá ‘i he me‘a na‘á ne mamata ki aí, kuo folofola ange ‘a e Laumālie Mā‘oni‘oní, “Ko e kau tangata ‘e toko tolu ena ‘oku nau kumi koe. 20Hifo ki lalo ‘o ō mo kinautolu. ‘Ai ke fiemālie ho lotó. He ko au na‘á ku fekau ke nau ō mai kiate koé.” 21Na‘e hifo leva ‘a Pita ki lalo ‘o lea ange ki he kau tangatá, “Ko au ia ‘oku mou kumí. Ko e hā e ‘uhinga ho‘omou ō maí?”
22Pea nau tala ange, “Ko ‘emau ō maí ko e fekau ‘a e ‘eikitau ko Kōniliusi. Ko e tangata anga-lelei, mo tui ‘Otua. ‘Oku ‘ofa ai e kakai Siu kotoa pē. Pea na‘e fekau ‘e he ‘Otuá ha‘ane ‘āngelo mā‘oni‘oni ke ha‘u kia Kōniliusi ‘o fakahā ange ke ne fakaafe‘i koe ki hono ‘apí, ka ne fanongo ‘i ha‘o malanga.”
23Na‘e fakaafe‘i kinautolu ‘e Pita ke nau mohe he pō ko iá.
Pea pongipongi hake, pea nau ō mo ha ni‘ihi Siopa na‘e tui kia Sīsū. 24Pea ko e ‘aho hono hokó, na‘a nau tau ki Sēsalia. Pea kuo talitali mai ai ‘a Kōniliusi mo hono kāingá, mo hono ngaahi kaungāme‘á.
25Pea a‘u atu ‘a Pita, pea fakafe‘iloaki mai ‘a Kōniliusi. Pea tū‘ulutui hifo ia ‘i mu‘a ‘ia Pita, ‘o kamata hū ki ai. 26Kae fokotu‘u ia ‘e Pita ki ‘olunga, ‘o ne pehē ange, “Tu‘u ki ‘olunga. He ko e tangata pē au.”
27Na‘e hū atu ‘a Pita ki fale mo talatalanoa ai mo Kōniliusi. Ko e kakai tokolahi kuo nofo mei falé. 28Pea lea ange ‘a Pita kiate kinautolu, “‘Oku mou ‘ilo‘i pē ko kimautolu e kakai Siú, ‘oku ‘ikai ngofua ‘emau feohi mo ha toe kakai. Ka kuo fakahā mai ‘e he ‘Otuá kiate au ‘oku ‘ikai ha taha te ne lau ‘oku ta‘e ma‘a, pe ta‘e fe‘unga ke fai ha fetu‘utaki mo ia. 29Na‘á ku loto au ke u ha‘u ki hení, koe‘uhí ko ‘eku fie ‘ilo e ‘uhinga ho‘o pōpoaki ange ke u ha‘ú.”
30Pea tali atu ‘e Kōniliusi, “Na‘e fai ‘eku lotu ‘i ‘api he ‘aho ‘e fā kuo hilí he tolu e fiafí. Pea fakafokifā pē kuo tu‘u mai kiate au ha tangata kofu ngingila. 31Pea pehē mai ‘e he tangatá, ‘‘E Kōniliusi, kuo tali ‘e he ‘Otuá ho‘o lotú, pea kuó ne ‘afio‘i ho‘o ngaahi ‘ofa ‘oku fai ma‘á e kakai masivá. 32Fekau ha taha ke ‘alu ki Siopa ‘o ‘omai ‘a Saimone Pita. ‘Oku lolotonga nofo he ‘api ‘o Saimone, ko e tangata ngaohi koloa kili‘imanu. ‘Oku tu‘u hono ‘apí ‘i matātahi.’
33Na‘á ku pōpoaki atu leva ke ke ha‘u. Pea mālō ‘aupito ho‘o lava maí. Kuo mau kātoa heni he ‘ao ‘o e ‘Eiki ‘Otuá ke fanongo ki ha‘ane tō folofola.”
34Pea tali atu ‘e Pita, “Ko ‘eku toki ‘ilo pau eni ‘oku tatau matematē e ‘ulungāanga ‘o e ‘Otuá ki he kakai kotoa pē. 35‘Oku fakatupu hōifua kiate ia ‘a e kakai kotoa pē ‘oku nau lotu ki ai mo failelei, ‘o tatau ai pē pe ko e fa‘ahinga fē na‘a nau tupu aí. 36Ko ia pē ‘a e Ongoongo Lelei na‘e fakahā ange ‘e he ‘Otuá ki he kakai ‘Isilelí ‘aki ‘ene tuku mai ‘a Sīsū Kalaisi, ko e ‘Eiki ‘o e kakai kotoa pē, ke nau a‘usia ‘a e melinó.
37Pea ‘oku ‘ikai ke puli ‘iate kimoutolu ‘a e me‘a na‘e hoko ‘i he tapa kotoa ‘o Siuteá. Na‘e fua kamata pē mei Kāleli ‘i he hili e malanga ‘a Sione ke papitaiso e kakai kotoa pē.
38Na‘e foaki ‘e he ‘Otuá ‘a e Laumālie Mā‘oni‘oní kia Sīsū ‘o Nāsaleti, ‘o fakaivia ia. Pea na‘e toki fai holo ‘e Sīsū ‘ene tokoni‘i e kakaí mo ‘ene fakamo‘ui kotoa ‘a e kakai na‘e pule‘i ‘e he tēvoló. He na‘e kau e ‘Otuá mo ia. 39Na‘a mau mamata tonu he‘ene me‘a kotoa na‘e fai ‘i ‘Isileli mo Selusalemá.
Na‘e tāmate‘i ‘a Sīsū ‘aki hono tutuki ki he kolosí. 40Ka ‘i he ‘aho hono tolu mei aí, na‘e fokotu‘u ia ‘e he ‘Otuá ‘o mo‘ui, peá ne ‘ai ke ne hā holo. 41Na‘e ‘ikai te ne hā ki he kakai kotoa pē. Na‘á ne hā pē kiate kimautolu na‘a mau kai mo inu mo ia ‘i he hili hono fokotu‘u mei he maté. He na‘e fili kimautolu ‘e he ‘Otuá ke mau talaki ia ki he kakaí.
42Na‘e fekau ‘e he ‘Otuá ke mau fanongonongo ki he kakaí ko Sīsū ‘a e toko taha kuó ne fili ke fakamāu‘i e kakai mo‘uí mo e kakai maté. 43He na‘e tala pē ‘e he kau palōfita kotoa ‘a e pau ke fakamolemole‘i ‘i he huafa ‘o Sīsuú ‘a e ngaahi angahala ‘a e kakai kotoa pē ‘e tui ki aí.”
44Pea lolotonga ‘a e lea ‘a Pitá, mo e hifo ‘a e Laumālie Mā‘oni‘oní ki he kakai kotoa na‘e fanongo maí. 45Na‘e ‘i ai ha kau Siu na‘e omi mo Pita na‘e ofo ‘i hono foaki pehē ‘o e Laumālie Mā‘oni‘oní ki he kakai mulí. 46He kuo nau fanongo tonu eni ki he lea‘aki ‘e ha kakai muli ‘a e ngaahi lea kehekehe mo fakahīkihiki‘i e ‘Otuá.
Pea pehē ‘e Pita, 47“Kuo foaki e Laumālie Mā‘oni‘oní ki he kakai muli ko ení, ‘o hangē pē ho hono foaki kiate kitautolú. Ko hai leva te ne loto ke ta‘ofi ha‘atau papitaiso kinautolu?”
48Na‘e fekau ‘e Pita ke papitaiso kinautolu ‘i he huafa ‘o Sīsū Kalaisí. Pea nau kole ange ke ne ki‘i nofo atu mo kinautolu ‘i ha ngaahi ‘aho.
Избрани в момента:
Ngāue 10: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.