Ngāue 9
9
Ko e Ului ‘a Saulá
(Ngāue 22:6-16; 26:12-18)
1Na‘e fai ai pē ‘e Saula ‘ene fakamanamana te ne tāmate‘i e kakai kuo tui kia Sīsuú. Peá a‘u pe ‘o kole ki he Taula‘eiki Lahí 2ke fai ha tohi ki he ngaahi fai’anga-lotu ‘i Tāmasikusí ke nau faka‘atā ange ke ne puke ha taha pē kuó ne tali e ‘Alunga ‘o e ‘Eikí, ‘o tatau pe ko e tangata pe ko e fefine, pea ha‘i ‘o taki atu ki Selusalema. 3Na‘e faka‘ohovale pē ‘i he fakaofiofi atu e fononga ‘a Saulá ki Tāmasikusí kuo kāpui ‘a Saula ‘e ha fu‘u maama na‘e huhulu hifo mei he langí. 4Na‘e tō ‘a Saula ki lalo. Pea ongo mai ha le‘o na’e pehē, “Saula! Saula! Ko e hā ‘okú ke fakatanga‘i ai aú?”
5“He ko hai koe?” Ko Saula atu ia. Pea tali mai e ‘Eikí, “Ko Sīsū au. Pea ko au ‘okú ke fakatanga‘í. 6Tu‘u ki ‘olunga ‘o ‘alu ki he koló. ‘E toki fakahā atu ai e me‘a ke ke faí.”
7Na‘e mo‘utāfu‘ua ‘a e kaungāfononga ‘o Saulá. He na‘a nau fanongo ki he le‘ó, ka na‘e ‘ikai te nau sio ki ha taha. 8Na‘e tu‘u ‘a Saula ki ‘olunga ‘o faka‘ā‘ā hake, tā kuo kui. Pea na‘e taki atu ia ‘e hono kaungāfonongá ki Tāmasikusi.
9Na‘e ‘aho ‘e tolu e kui ‘a Saulá, mo ‘ene ta‘e kai mo inu.
10Pea na‘e ‘i ai e toko taha nofo Tāmasikusi ko ‘Ananaia na‘e tui kia Sīsū. Na‘e hā mai ‘a e Eikí kia ‘Ananaia, peá ne folofola ki ai. Pea tali atu ‘e ‘Ananaia, “Ko au eni, ‘Eiki.”
11Pea folofola mai ‘a e ‘Eikí, “Tu‘u ki ‘olunga ‘o ‘alu ki Hala Hangatonu ki he ‘api ‘o Siutasí. Te ke a‘u atu ki aí pea te mo fe‘iloaki mo ha tangata ko Saula mei Tāsusi. ‘Oku lolotonga fai ‘ene lotu, 12pea kuo hā ange kiate ia ha tangata ko ‘Ananaia ‘oku ha‘u ‘o hilifaki ki ai hono nimá ke ne toe lava ‘o sio.”
13Pea pehē ange ‘e ‘Ananaia, “‘Eiki, kuo fakamatala mai ‘e he tokolahi ‘a e ngaahi me‘a fakamamahi kuo fai ‘e he tangata ko ená ki he kakai ‘i Selusalema ‘oku tui kiate koé. 14Pea ko eni kuo fakamafai‘i ia ‘e he kau taula‘eiki pulé ke ne ha‘u ki heni ‘o puke ha taha pē ‘e lotu kiate koe.”
15Pea folofola ange ‘a e ‘Eikí kia ‘Ananaia, “‘Alu! He kuó u fili ia ke ne malanga‘i au ki he kakai mulí, mo ha‘a tu‘i, pea mo e kakai ‘Isilelí. 16Te u fakahā ange ki ai ‘a e lahi faufau e ngaahi faingata‘a te ne a‘u ki ai koe‘uhí ko aú.”
17Na‘e ‘alu leva ‘a ‘Ananaia ki he ‘api na‘e nofo ai ‘a Saulá ‘o ne hilifaki hono nimá kiate ia. Peá ne pehē ange, “‘E Saula, ko ‘eku ha‘ú ko e fekau ‘a e ‘Eiki ko Sīsuú. Ko ia na‘e hā atu he halá. Pea ko hono finangaló ke ‘ā leva ho matá, mo fakafonu koe ‘aki ‘a e Laumālie Mā‘oni‘oní.”
18Na‘e fakafokifā pē kuo ngangana mei he mata ‘o Saulá ha me‘a na‘e hangē ha ‘uno‘i iká, peá ne toe lava ‘o sio. Pea tu‘u hake ‘a Saula, pea papitaiso ia.
19Pea hili ‘ene ma‘u ha me‘atokoni na‘á ne ongo‘i kuo mālohi hono sinó.
Ko e Malanga ‘a Saula ‘i Tāmasikusi
Na‘e nofo ‘a Saula mo e kakai ‘i Tāmasikusi na‘e tui kia Sīsuú ‘o ‘osi ha ngaahi ‘aho. 20Pea toki ‘alu ia ki he ngaahi fai‘anga lotu ‘o e kakai Siú ‘o kamata malanga‘i kiate kinautolu ko Sīsuú ko e ‘Alo ia ‘o e ‘Otuá. 21Na‘e ofo ai e loto ‘o e kakai kotoa pē, ‘o nau pehē ‘e kinautolu, “‘Ikai ko e tangata eni na‘á ne fakatanga‘i e kakai ‘i Selusalema kuo lotu kia Sīsuú? ‘Ikai koā ko ‘ene ha‘u ki hení ke puke kinautolu ‘o taki pōpula ki he kau taula‘eiki pulé?”
22Ko e mafai lahi na‘e fai ‘aki ‘e Saula ‘ene malangá, pea hoko ai pē mo e puputu‘u e loto ‘o e kakai Siu ‘i Tāmasikusí ‘i he fu‘u o‘o ‘ene ngaahi fakamo‘oni ki he‘ene pehē ko e Kalaisí ‘a Sīsuú.
23Na‘e fa‘ufa‘u leva ‘e he ni‘ihi ai ke tāmate‘i ‘a Saula, 24ka na‘e ‘ilo ki ai ‘a Saula.
Ko ‘enau fa‘ufa‘ú, ke lamasi ‘a Saula he ngaahi matapā ‘o e koló ‘o tāmate‘i. 25Ko e pō ‘e taha, na‘e hanga ‘e ha ni‘ihi na‘e kau mo Saula ‘o tukutuku hifo ia he ‘ā ‘o e koló ‘i ha fu‘u kato.
Ko Saula ‘i Selusalema
26Na‘e a‘u atu ‘a Saula ki Selusalema, ‘o ne feinga ke kaungāngāue fakataha ai mo e kakai na‘e tui kia Sīsuú. Ka na‘a nau manavahē ‘ia Saula, ko ‘enau pehē ‘oku ‘ikai ke ne tui mo‘oni kia Sīsū. 27Pea tokoni mai leva kiate ia ‘a Pānepasa ‘aki ‘ene fakafe‘iloaki ange ia ki he kau ‘apōsitoló.
Na‘e fakamatala ange ‘e Pānepasa ki he kau ‘apōsitoló ‘a e anga e hā ‘a e ‘Eikí kia Saulá, mo e anga e lea ange ‘a e ‘Eikí kiate iá. Peá ne fakamatala ange kiate kinautolu ‘a e tu‘uaki mālohi ‘e Saula ‘a Sīsū ‘i Tāmasikusí.
28Na‘e fononga holo ‘a Saula ‘i Selusalema mo e kakai na‘e tui kia Sīsuú, ‘o ‘ikai te ne ufi hono malanga‘i e ‘Eikí. 29Na‘e fakakikihi ma‘u pē ‘a Saula mo e kakai Siu na‘e lea faka-Kalisí, pea nau feinga leva ke tāmate‘i ia. 30Pea ‘ilo ki ai e kakai na‘e tui kia Sīsuú, pea nau holataki‘i ‘a Saula ki Sēsalia, ‘o toki tuku atu ai ki he kolo ko Tāsusi.
31Na‘e fuofuoloa ai e nofo fiemālie ‘a e siasi ‘i Siutea, mo Kāleli, mo Samēliá. Na‘e hokohoko atu ai pē ‘enau ‘apasia ki he ‘Eikí. Pea na‘e faka‘au ke nau kaukaua ‘i hono fakalotolahi‘i mo tokoni‘i ‘e he Laumālie Mā‘oni‘oní. Pea fakautuutu ai pe ‘enau tokolahí.
Ko e Fakamo‘ui ‘e Pita ‘a ‘Eneasí
32Lolotonga ‘a e fononga holo ‘a Pita he feitu‘u kehekehe, na‘á ne ‘a‘ahi ki he kakai na‘e tui kia Sīsū ‘i he kolo ko Litá. 33Na‘á ne fe‘iloaki ai mo ha tangata, ko ‘Eneasi hono hingoá, kuo ta‘u ‘e valu ‘ene tokoto ko e mamatea. 34Na‘e pehē ange ‘e Pita kia ‘Eneasi, “Kuo fakamo‘ui koe ‘e Sīsū. Tu‘u ki ‘olunga, pea takai ho mohengá.” Peá ne tu‘u ai pē ki ‘olunga.
35Na‘e sio kia ‘Eneasi ha kakai tokolahi ‘i he ongo kolo ko Lita mo Sāloní, pea nau tui ai kia Sīsū.
Ko e Fakamo‘ui ‘e Pita ‘a Toakasé
36Na‘e ‘i ai ha fefine nofo Siopa ko Tāpaita na‘e tui kia Sīsū. Ko hono hingoa faka-Kalisí ko Toakase, ko hono ‘uhingá ko e ‘Tia’. Ko e fefine anga-lelei mo ‘ofa, pea lahi ‘ene ngaahi tokoni ki he kakai masivá. 37Na‘e si‘i puke hake pē ‘a Tāpaita ‘o mālōlō. Pea nau tatafi ia ‘o fakatokoto ‘i ha loki ‘i he fungavaka ki ‘olunga ‘o e falé.
38Na‘e ‘ikai ke vāmama‘o ‘a Siopa mo Lita.
Na‘e fanongo e kakai na‘e tui kia Sīsuú ‘oku ‘i Siopa ‘a Pitá, pea nau fekau ha ongo tangata ke ō ‘o tala ange, “Kātaki fakamolemole, ka ke feinga mai he vave tahá!” 39Pea nau ō.
Pea nau a‘u atu ki Siopa, pea taki hake ‘e he ongo tangatá ‘a Pita ki he loki he fungavaka ki ‘olunga ‘o e falé. Pea kuo nofo ai ha kau uitou tokolahi. Na‘e lolofi mai e kau uitoú kia Pita ‘oku nau fetāngihi mo faka‘ali‘ali ange kiate ia ‘a e ngaahi pulupulu mo e kofu na‘e tuitui ‘e Toakase ‘i he‘ene kei mo‘uí.
40Pea fekau ‘e Pita ke nau ō ki tu‘a, kae tū‘ulutui hifo ia ‘o fai ‘ene lotu. Peá ne toki hanga atu ki he me‘a faka‘eikí, ‘o ne pehē, “Tāpaita, tu‘u ki ‘olunga!” Pea ‘ā‘ā hake ai ‘a e mata ‘o e fefiné. Pea ko ‘ene sio hake pē kia Pitá, peá ne ta‘utu hake leva. 41Pea puke ‘e Pita hono nimá ‘o ne fokotu‘u hake ia.
Pea ui ‘e Pita ki he kau uitoú mo e kakai na‘e tui kia Sīsuú ke nau kātoa mai. Peá ne fokotu‘u ‘a Toakase ‘i honau lotolotongá ke nau sio ki ai ‘oku mo‘ui.
42Na‘e ‘ilo e kakai kotoa pē ‘i Siopá ki he me‘a kuo hokó, pea tui ai e tokolahi ki he ‘Eikí.
43Na‘e nofo atu ai ‘a Pita ‘i Siopa ‘i he ‘api ‘o e tangata ko Saimone, na‘e ngaohi koloa kili‘i manu.
Избрани в момента:
Ngāue 9: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.