Sione 9
9
Ko e Faka‘ā ‘e Si̇̄sū ha Tangata Na‘e Fanau‘i Kui
1Pea ʻi he fai atu ʻene fonongá, naʻá ne mamata ki ha tangata na‘e fanau‘i mai pē ‘oku kui. 2Pea ʻeke ange ‘e heʻene kau akó kiate ia: ‟Tangata‘eiki, ko e angahala ʻa hai na‘e fanau‘i mai ai ʻa e tangatá ni ‘oku kui̇́? ʻA‘ana pē, pē ko ʻene ongo mātuʻá?”
3Pea tali ‘e Sīsū: ‟‘Oku ‘ikai ko ha angahala ʻa e toko tahá ni, pē ko ʻene ongo mātuá, ka koe‘uhi̇̄ ke fakahāaʻi ‘iate ia ʻa e ngaahi ngāue ʻa e ‘Otuá. 4Kuo pau ke tau fai ʻa e ngaahi ngāue ʻa e Toko Taha naʻá ne fekau mai aú lolotonga ʻoku kei ʻahó, he ʻoku haʻu ʻa e poʻuli̇́, ʻa ia ʻe ʻikai toe lava ai ha taha ke fai ha ngāue. 5Lolotonga ʻoku ou kei ‘i māmani̇́, ko e māama au ‘o māmani.”
6Pea hili ʻene ngaahi lea ko iā, naʻá ne ‘a‘anu ki he kelekelé, ʻo ne ngaohiʻaki ha meʻi pelepela ʻa hono fāvai̇́, pea naʻe vali ʻaki ʻa e mata ʻo e tangata kui̇́. 7Pea naʻe toki folofola kiate ia: ‟‘Alu ‘o fufulu ʻa e pelepelá mei ho matá, ʻi he Vai ko Sailoamé” (ʻa ia ko hono ‘uhingá, ko e ‟Fekau atu.”) Ko ia, naʻá ne ‘alu atu ‘o fufulu ʻa e pelepelá, pea naʻe foki mai, kuo ‘ā hono matá.
8Pea ko hono kaungā‘api̇́ mo e kakai na‘a nau ‘ilo ʻene mo‘ui kolekole ki muʻá, naʻa nau pehē: ‟‘Ikai koā ko e tangata ʻeni na‘e faʻa kolekolé?”
9Pea pehē ‘e he ni‘ihi: ‟Ko ia pē.” Kae pehē ‘e he ni‘ihi: ‟‘Oku ‘ikai ko ia. Ka ‘oku mata tatau mo e tangata ko iā.”
Pea toki lea mai ʻa e tangata na‘e kui̇́: ‟Ko au pē ia.”
10Pea nau pehēange kiate ia: ‟Ka na‘e anga fēfē leva ho‘o lava ‘o sió?”
11Pea tali ‘e he tangatá: ‟Ko e tangata ʻoku ui ko Si̇̄sū, naʻá ne ngaohi ha me‘i pelepela ‘o vali ‘aki hoku matá, pea naʻe talamai kiate au, ʻAlu ki he Vai ko Sailoamé ‘o fufulu ai ʻa e pelepelá. Peá u ‘alu ‘o fufulu hoku matá, pea u ‘ā.”
12Pea nau pehēange kiate ia: ‟Pea ko fē ʻa e tangata ko iā?”
Pea ne pehēange: ‟‘Oku ‘ikai te u ‘ilo ia ‘e au.”
Ko Hono Faka‘eke‘eke ‘e he Kau Fālesí e ‘ā ‘a e Tangata Kuí
13Pea nau taki atu ʻa e tangata naʻe kui̇́, ʻo ʻave ki he kau Fālesi̇́. 14He tā ko e Sāpate ia ʻa ia naʻe ngaohi ai ʻe Si̇̄sū ʻa e pelepela ʻo ne fakaʻāʻaki ʻa hono matá. 15Ko ia, naʻe toe ‘eke ange ‘e he kau Fālesí kiate ia, pē na‘e anga fēfē ʻene toe lava ‘o sió. Pea pehē ange kiate kinautolu: ‟Na‘a ne ʻai ha me‘i pelepela ‘o vali ʻaki hoku matá, pea u fufulu ia, pea ko ʻeni kuo u ʻā.”
16Ko ia, naʻe pehē ‘e ha niʻihi ʻo e kau Fālesi̇́: ‟Tā ko e tangata ko ʻeni̇́ ʻoku ‘ikai ko ʻene hokomai mei he ʻOtuá, he ‘oku ʻikai te ne tauhi ʻa e tapu ʻo e Sāpaté.”
Ka naʻe pehē ‘e he ni‘ihi: ‟‘E lava fēfē ‘e ha tangata angahala ‘o fai ha ngaahi mana pehē?” Pea naʻa nau māvahevahe ai.
17Ko ia, naʻa nau toe pehēange ki he tangata kui̇́: ‟Ko e hā ho‘o lau ‘aʻau ki he tangata naʻá ne faka‘ā ho matá?” Pea pehēange ‘e ia: ‟Ko e palōfita ia!”
18Ka na‘e ‘ikai pē ke tui ʻa e kau Siú, ki he lau, ko e tangata ia na‘e kui kimuʻá, ka kuo ʻā. Ko ia naʻa nau ui mai ʻene ongo matuʻá. 19Pea nau ‘eke ange kiate kinaua: ‟Ko ho‘omo tama koā eni, ʻa ia ʻoku mo pehē: na‘e fanau‘i mai ‘oku kui̇́? Na‘e anga fēfē leva ʻa e ‘ā hono matá?”
20Pea tali ‘e he ongo mātu‘a ʻa e tangatá, ʻo na pehē: ‟‘Okú ma ʻilopau, ko ‘ema tamá eni. Pea ‘okú ma ‘ilopau na‘e fanau‘i mai ia ‘oku kui. 21Ka ko e me‘a ki he ‘ā ko ʻeni hono matá, pea mo hai naʻá ne fakaʻā hono matá, ‘oku ‘ikai ʻaupito te ma ‘ilo ‘ekimaua ki ai. Mou ‘eke ange pē ki ai, he ʻokú ne matuʻotuʻa feʻunga pē ke ne fai haʻane tali.”
22Naʻe tali pehē ʻa e ongo mātu‘a ʻa e tangatá, koe‘uhi̇̄ ko ‘ena ilifia ki he kau Siú, he kuo ʻosi tuʻutuʻuni ʻe he kau Siú, ka ai ha taha te ne fakamoʻoni ko Si̇̄suú ko e Kalaisi̇́ ia, pea ʻe tuli ia mei falelotu. 23Pea ko e ʻuhinga ia ʻa e pehē ʻe heʻene ongo mātuʻá: ‟ʻOkú naʻe matuʻotuʻa feʻunga pē ke mou ʻeke kiate ia.”
24Ko ia, naʻa nau toe ui mai ʻa e tangata naʻe kui̇́, ko hono tuʻo uá ia, pea nau pehēange kiate ia: ‟Tuku kolōlia ki he ʻOtua! He ‘oku mau ‘ilopau ko e tangatá ni ko e angahala.”
25Ko ia, naʻe tali ‘e he tangatá: ‟Kapau ko ha tangata angahala ia, ʻoku ʻikai te u ʻilo ki ai. Ko e me‘a pē ‘oku ou ‘iló, naʻá ku kui, ka kuo u ‘ā.”
26Ko ia, naʻa nau pehēange kiate ia: ‟Ko e hā e me‘a naʻá ne fai kiate koé? Na‘e anga fēfē ʻene fakaʻā ho matá?”
27Pea naʻe tali kiate kinautolu: ‟Kuó u ‘osi talaatu kiate kimoutolu, ka ‘oku ‘ikai te mou fie fanongo ki ai. Ko e hā ‘oku mou holi ai ke u toe fakamatala atú? Kuo mou fie hoko mo kimoutolu foki ko ʻene kau ako?”
28Pea nau toki leakovi kiate ia, ‘o nau pehēange: ‟Ko koe pē ‘okú ke kau heʻene kau akó. Ko e kau ako kimautolu ia ‘a Mōsese! 29‘Oku mau ʻilopau naʻe folofola ʻa e ‘Otuá kia Mōsese, ka ‘oku ‘ikai te mau ‘ilo ‘kimautolu pē ko e tangata ena mei fē.”
30Pea tali ʻe he tangatá, ʻo ne pehē kiate kinautolu: ‟Ko e toki me‘a faikehe ia. ‘Oku ‘ikai te mou ‘ilo pē ko e tangata ia mei fē, ka naʻá ne fakaʻā ʻe ia hoku matá. 31‘Oku tau ‘ilo kotoa pē ‘oku ‘ikai ke fanongo ʻa e ‘Otuá ki ha angahala, ka ʻoka lotu ʻa e faʻahinga ‘oku ‘apasia kiate ia mo fai hono finangaló, ʻokú ne fanongo ki ai̇. 32Talu ʻa e tupu ‘a māmani, mo e te‘eki ke tau fanongo kuo fakaʻā ha taha na‘e fanau‘i mai ‘oku kui. 33Kapau na‘e ‘ikai ko e tangata ʻeni mei he ‘Otuá, ‘e ‘ikai te ne lava ke fai ha me‘a ‘e taha.”
34Pea nau tali kiate ia ʻo pehē: ‟Naʻe fanauʻi pē koe, ko e angahala. ʻOku anga fēfē ai hoʻo ʻai ke faiakonaki mai kiate kimautolu.” Pea nau tuli ia kituʻa mei he falelotú.
35Pea fanongo ‘a Si̇̄sū kuo nau tuli ia kituʻá, pea naʻe maʻu ʻa e tangatá, ʻo ne pehēange kiate ia: ‟‘Okú ke tui ki he Foha ʻo e Tangatá?”
36Pea tali ʻe he tangatá ʻo ne pehē: ‟He ko hai ia, ʻEiki, koeʻuhi̇̄ ka u tui leva ki ai.”
37Pea folofola ‘a Si̇̄sū kiate ia: ‟Kuó ke ‘osi mamata ki ai, he ko ia ia ‘okú ke lolotonga talanoa mo iá.”
38Pea lea ai ʻa e tangatá: ‟‘Eiki, ‘oku ou tui atu,” pea naʻe tūʻulutui ʻo lotu kiate ia.
39Pea folofola ‘a Sīsū: ‟Ko e fai fakamaaú, naʻe ʻuhinga ai ʻeku hokomai ʻaʻaku ki he maama ko eni̇́, koeʻuhi̇̄ ke ʻā ʻa e mata ʻo e kui̇́, kae hoko ‘o kui ʻa e kakai ‘oku ʻā.”
40Naʻe fanongo ai ha niʻihi ʻo e kau Fālesi̇́, pea nau pehēange kiate ia: ‟ʻA ia, ʻoku mau kui mo kimautolu foki?”
41Pea folofola ʻa Si̇̄sū: ‟Kapau na‘a mou kui, naʻe ʻikai haʻamou angahala; ka ko ʻeni ‘oku mou lau ‘oku mou lava ‘o sio, pea tā ‘oku nofomaʻu pē hoʻomou angahalá.”
Избрани в момента:
Sione 9: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.