Mātiu 12
12
Ko e fehu‘i he Sāpaté
(Ma‘ake 2:23-28; Luke 6:1-5)
1Pea ʻikai loko fuoloa mei ai, naʻe fou atu ‘a Si̇̄sū mo ʻene kau akó ‘i ha ngoue‘anga uite, ʻi ha ʻaho Sāpate. Pea kuo fiekaia ʻene kau akó, ‘o nau hanga ʻo kamata toli ʻa e uité ‘o kai. 2Ka ʻi he sio ki ai ʻa e kau Fālesi̇́, naʻa nau pehē ange kia Sīsū: ‟Ko e hā ‘oku toli uite ai ho‘o kau akó he Sāpaté? Ko e me‘a ia ‘oku tapu ʻi he Laó!”
3Pea tali ‘e Sīsū: ‟Kuo teʻeki koā ke mou lau ʻi he Tohitapú ʻa e talanoa ki he me‘a na‘e fai ‘e Tēvita mo ʻene kau tangatá, ‘i he‘enau fiekaia? 4ʻA ʻenau hū ki he fale ‘o e ‘Otuá ‘o kai ʻa e maá, ʻa ia ko e kau taulaʻeiki̇́ pē na‘e ngofua ke nau kai̇́. 5Pea kuo te‘eki koā ke mou lau hifo he kupu‘i Folofola ko ʻeni̇́ ʻi he Lao ‘a Mōsesé: ‘Oku maumau‘i ‘e he kau taulaʻeiki̇ ʻo e Temipalé ʻa e Lao ʻo e Sāpaté, ‘i he Sāpate kotoa pē, ka ‘oku ‘ikai fakahala‘i kinautolu ‘e ha taha? 6Pea ko hono mo‘oni̇́ ʻeni ‘oku ou tala atú, ‘oku ‘i heni ha meʻa ‘oku toe makehe ange ia ‘i he Temipalé. 7He kapau naʻe mahino kiate kimoutolu ʻa e ʻuhinga ʻo e leá, ‛Ko e ‘ofá ‘oku ou fiema‘u, ‘o ‘ikai ko e feilaulaú’ pehē na‘e ‘ikai te mou fakahalaia‘i ʻa e kau tonuhia ko eni̇́.
8He ko e Foha ‘o e Tangatá, ko e ‘Eiki ia ‘o e Sāpaté.”
Ko e Tangata Nima Mamatea
(Ma‘ake 3:1-6; Luke 6:6-11)
9Pea ‘alu atu ‘a Si̇̄sū mei ai ‘o hū ki ha falelotu ‘o e kakai Siú; 10Pea kuo nofo mai ai ha tangata nima mamatea. Pea ʻeke ange ‘e ha niʻihi ʻi ai kia Si̇̄sū: ‟‘Oku ngofua koā he Laó ke fai ha faito‘o ‘i he ‘aho Sāpaté?” He naʻa nau kumi ki ha ʻuhinga, ke tukuakiʻi ai ‘a Si̇̄sū ki ha kovi.
11Pea fehu‘i ange ‘e Si̇̄sū kiate kinautolu: ‟Ka ‘i ai ha taha ‘iate kimoutolu ‘e tō ha‘ane sipi ki ha luo ʻi he ‘aho Sāpaté, ‘ikai te ne feinga‘i hake ia? 12ʻOku mahu‘inga ange ʻa e tangatá he sipi̇́! Pea ko ia, ‘oku fakangofua ai ʻi he Laó ke tau fai ha lelei ʻi he Sāpaté.”
13Pea folofola leva ‘a Si̇̄sū ki he tangata nima mamateá: ‟Fakahangatonu atu ho nimá.” Peá ne ‘ai atu hono nimá, pea tā kuo mo‘ui ia, ‘o tatau matematē mo hono nima ‘e tahá.
14Pea mātuku atu ai ʻa e kau Fālesi̇́ ‘o kamata faʻufaʻu ha founga ke nau tāmate‘i ai ‘a Si̇̄sū.
Ko e Tamaioʻeiki Na‘e Fili ‘e he ‘Otuá
15Pea ʻi he meaʻi leva ‘e Si̇̄sū ʻa e faʻufaʻu ʻa e kau Fālesi̇́ ke tāmate‘i iá, naʻá ne ‘alu mei he feitu‘u ko ia. Pea kuo muimui kiate ia ʻi ai ha fu‘u kakai tokolahi, pea naʻá ne fakamoʻui honau kau mahakiʻiá; 16Pea naʻe fekau ke ‘oua te nau tala ki ha taha ʻene ngaahi me‘a kuo fai̇́; 17Pea naʻe fakamoʻoniʻi ai ʻa e lau ʻa e palōfita ko ‘Aiseá, ʻo pehē:
18‟Ko ʻeni ia ʻa e sevāniti kuo u fili̇́.
‘A ē ʻoku ou ʻofa ai̇́,
ʻA e Toko Taha ‘oku hoa ʻene moʻui̇́ mo hoku lotó.
Te u tuku ke nofoʻia ia ʻe hoku Laumālié,
pea te ne fakahā ʻa e fakamaau totonú ki he ngaahi pule‘angá.
19He‘ikai fakakikihi mo kaikaila,
pē ‘e ʻikai foki ongona hono le‘ó ‘i he ngaahi hala ‘o e koló.
20He‘ikai te ne fesiʻi ha vaʻa kofe kuo mapelu,
pē te ne tāmate‘i ha maama kuo ulo kovi,
kae‘oua kuo ikuna ʻene fakamaau totonú.
21Pea ʻoku tuʻu ʻi hono huafá ʻa e ʻamanaki ʻa e kakai kotoa pē.”
Ko e Ui ‘o Si̇̄sū ko e Pule Tēvolo
(Ma‘ake 3:20-30; Luke 11:14-23; 12:10)
22Pea naʻe toki ‘omi kia Si̇̄sū ha tangata puke fakatēvolo ʻa ia na‘e toe kui mo noa, pea na‘e fakamo‘ui ia ‘e Si̇̄sū, ‘o ne lea mo ʻā. 23Pea ofo kotoa ai ʻa e kakai̇́ ‘o nau pehē: ‟Ko e ‘Alo nai ʻeni ‘o Tēvitá?”
24Pea fanongo ai ʻa e kau Fālesi̇́ ʻo nau pehē: ‟Ko e kapusi tēvolo ‘a Sīsūú ‘oku faiʻaki e ivi ‘o e Pule ʻo e fanga tēvoló!”
25Pea ‘ilo ‘e Si̇̄sū ‘enau fakakaukaú, pea naʻe pehē: ‟ʻIlonga ha fonua ‘e nofo fetuʻusi, ‘e ‘auha. ʻIlonga ha kolo pē ko ha fāmili ‘e vāvākovi, ‘e movete. 26He kapau ‘oku vāvākovi ʻa e fale ‘o Sētané, pea ‘e tolonga fēfē hono pule‘angá? 27Pea kapau ‘oku fai ‘eku kapusi tēvoló ʻaki ʻa e ivi ‘o e Pule ʻo e fanga tēvoló, pea ‘oku fai ‘ia hai ʻa e kapusi tēvolo ‘a ho‘omou kau akó? Tā ko ho‘omou kau akó pē te nau fakahalaia‘i kimoutolú. 28Ka ʻokapau leva ‘oku faiʻaki ‘eku kapusi tēvoló ʻa e Laumālie ‘o e ‘Otuá, pea tā kuo ‘osi hoko mai ʻa e Pule‘anga ‘o e ‘Otuá kiate kimoutolu. 29He ‘e lava fēfē ke hū ha taha ki ha fale ‘o ha tangata toʻa ‘o fa‘ao ‘ene koloá? ‘Ikai te ne tomu‘a ha‘i ia ka ne toki lava ‘o fa‘ao ʻene koloá?
30ʻIlonga ha taha ‘oku ‘ikai kau mo aú, ‘oku angatu‘u ia kiate au. ʻIlonga ha taha ‘oku ‘ikai kau mo au ʻi he ututaʻú, ‘okú ne maumau‘i ʻa e ta‘ú.
31Ko hono mo‘oni̇́, ‘e ala fakamolemole‘i ha angahala kuo fai ‘e ha taha, pē ko ha‘ane lea kovi. Ka ko ia ‘oku lea kovi ki he Laumālie Mā‘oni‘oni̇́, ‘e ‘ikai ala fakamolemole‘i ia. 32Pea ʻilonga ‘a ia ‘oku lea kovi ki he Foha ‘o e Tangatá, ‘e ala fakamolemole‘i. Ka ko e lea kovi ki he Laumālie Mā‘oni‘oni̇́, ‘e ‘ikai fakamolemole‘i ia ‘i he maama ko eni̇́, pea mo e maama kaha‘ú.”
Ko e ‘akaú mo Hono Fua
(Luke 6:43-45)
33‟ʻIlonga ha fu‘u ʻakau ‘oku mo‘ui lelei̇, ‘e fua lelei. Ka ai ha fu‘u ʻakau ‘oku ‘ikai mo‘ui lelei̇, ‘e fua kovi. ‘Oku ʻiloʻi ʻa e faʻahinga ‘akaú mei hono fuá.
34ʻA e fanga ngata fekai! ‘E lava fēfē ke mou leaʻaki ha lelei, ‘osi angé ‘oku fonu homou lotó ʻi he kovi̇́? Kuo pau ke fakalea atu mei homou ngutú ʻa e me‘a ‘oku fonu ‘i homou lotó.
35ʻIlonga ha taha lelei, ‘e ‘alu hake mei hono lotó ha ngaahi fakakaukau lelei. Pea ʻilonga ha taha kovi, ‘e ‘alu hake mei hono lotó ha ngaahi fakakaukau kovi.
36Ko hono mo‘oní, ka hoko ʻa e ‘Aho Fakamāaú, ‘e ‘eke ki he taha kotoa pē ʻene lea noa kotoa pē naʻe fai. 37He ko e me‘a kotoa pē naʻe leaʻaki ‘e ha taha, kuo pau ke sivi‘i ʻi he ‘aho ko ia pē ‘oku tonuhia ai pē halaia.”
Ko e Fie Ma‘u Fakamo‘oni mei Langi
(Ma‘ake 8:11-12; Luke 11:29-32)
38Pea naʻe toki haʻu ai ha kau faiako Lao ‘a Mōsese ‘e ni‘ihi mo ha kau Fālesi ʻo nau pehē ange kia Si̇̄suú, ‟Tangata‘eiki, fai ange mu‘a ha fo‘i mana fakaofo ke mau mamata ki ai.”
39Pea talaange ‘e Si̇̄sū: ‟He toki kakai kovi mo ta‘etui ‘Otua ko kimoutolu! Ko ho‘omou kole mái koā ke u fai ha mana fakaofo? He‘ikai te u fai ki ai! Ko e mana pē taha te u fai̇́, ‘a ē na‘e hoko ki he palōfita ko Sioná. 40He hangē tofu pē ko e nofo ‘a Siona he ‘aho ‘e tolu mo e pō ‘e tolu ‘i he kete ‘o e iká, ʻe pehē pē ʻa e nofo ʻa e Foha ʻo e Tangatá ʻi he ‘aho ‘e tolu mo e pō ‘e tolu ‘i faʻitoká. 41‘Oka hokomai ʻa e ‘Aho Fakamāaú, pea ‘e tutu‘u hake ‘a e kakai Ninivé ‘o talatalaaki‘i kimoutolu. He na‘á nau fanongo ʻi he malanga ‘a Sioná pea nau tafoki ki he ‘Otuá. Pea ko hono moʻoni̇́ ʻeni ‘oku ou tala atu, ‘oku ‘i heni ha taha ‘oku toe makehe atu ia meia Siona. 42Peá ka hoko mai ʻa e ‘Aho Fakamāaú, pea ‘e tu‘u hake ʻa e Kuini ‘o Sipá ‘o talatalaaki‘i kimoutolu. He na‘e hā‘ele mai ia mei he ngataʻanga ʻo māmani̇́ ke fanongo ki he poto ʻo Solomoné. Ka ‘oku ‘i heni ha taha ‘oku toe makehe ange ia meia Solomone!”
Ko e Toe Foki ‘a e Laumālie Kovi
(Luke 11:24-26)
43‟Peá ka mavahe ha laumālie ʻuli mei ha taha, kuo pau ke ‘alu holo ia ‘i ha ngaahi feitu‘u lala ‘o toe kumi ha feitu‘u ke mālōlō ai. Ko ʻene fiu pē ʻi hono kumi ha feitu‘u pehē: 44Pea naʻe toki pehē leva ‘e ia, ‛Te u toe foki ki he fale na‘á ku mavahe mei ai̇́.’ Pea foki atu ia ki ai̇, tā ‘oku ‘ikai ke nofo‘i ʻa e falé ia, pea ‘oku kei ma‘a mo maau. 45Peá te ne toe ‘alu ‘o ui mai mo ha laumālie ʻuli ‘e fitu kehe ʻa ia ‘oku toe kovi ange ‘iate ia, ke omi ke nau nofo. Pea ko e me‘a ‘oku hokó, ‘oku toe kovi ange ‘aupito ʻa e tuʻunga ‘oku ‘i ai ʻa e toko taha ko ia ‘i hono tuʻunga kimu‘á. ʻE pehē pē foki ʻa e fai kiate kimoutolu ʻo e toʻutangata angakovi̇́.”
Ko e Fa‘ē mo e Ngaahi Tokoua ‘o Si̇̄sū
(Ma‘ake 3:31-35; Luke 8:19-21)
46Pea lolotonga ʻene kei lea ki he kakai̇́, mo e a‘u mai ʻene fa‘eé mo hono ngaahi tehiná ‘o tutu‘u mei tu‘a ko e fie lea ki ai. 47Pea pehē ange ‘e he toko taha kia Si̇̄sū: ‟Ko ho‘o fa‘eé eni, mo ho ngaahi tehiná, ‘oku nau tutu‘u mei tu‘a ko e fie talanoa mo koe.”
48Pea tali ange ‘e Si̇̄sū: ‟He ko hai ‘eku fa‘eé? Pea ko hai hoku ngaahi tehiná?”
49Pea mafao atu ‘e Si̇̄sū hono nimá ki heʻene kau akó mo ne pehē: ‟Ko ‘eku fa‘eé ē mo hoku ngaahi tehiná! 50ʻIlonga ha taha te ne fai ʻa e finangalo ‘o ‘eku Tamai fakalangi̇́, ko hoku tokoua ia, mo hoku tuofefiné, mo ‘eku fa‘ēé.”
Избрани в момента:
Mātiu 12: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.