Ma‘ake 16
16
Ko e Toetu‘u ʻa Si̇̄suú
(Mātiu 28:1-8; Luke 24:1-12; Sione 20:1-10)
1Pea ʻi he hili ʻa e Sāpaté, naʻe ō atu leva ʻa Mele Makitaline, mo Mele faʻē ʻa Sēmisi̇́, mo Sālome, ‘o fakatau mai ha ngaahi lolo fakanamulelei kehekehe, ke nau ʻave ‘o tākai ʻaki ʻa e sino ‘o Sīsuú. 2Pea kei hengihengi ʻaupito ʻi he ʻuluaki ʻaho ‘o e uiké,#16:2 Ko e ʻaho ia ‘oku hoko mai ki he Sāpate ʻa e kakai Siú. naʻa nau uhu atu ki he fonualotó, kuo hopo hake ʻa e laʻaá. 3Pea nau fepehēʻaki, ‟Ko hai nai te ne teka‘i ʻa e maka tāpuni̇́?” 4Ka ʻi heʻenau hanga atu ki ai̇́, naʻa nau fakatokangaʻi tā kuo ‘osi teka‘i ʻa e maka tāpuni̇́ ia, he ko e fu‘u maka lahi ʻaupito.
5Pea ʻi he hūatu ʻa e kau fefiné ki he fonualotó, naʻa nau mamata ai ki ha talavou, ʻoku tangutu ʻi he tafaʻaki toʻomataʻú, kuó ne tui ha kofu hinehina tōtōlofa. Pea kamata leva ke nau manavahē.
6Ka naʻe lea mai ʻa e talavoú ki he kau fefiné, ‟‘Oua te mou manavahē! Ko ho‘omou omi̇́ ke kumi kia Si̇̄sū mei Nāsaleti̇́, ʻa ē na‘e tutuki ki he kolosi̇́, ‘oku ‘ikai ke ʻi heni ia, he kuó ne toetuʻu. Sio mai! Ko e feituʻu ē na‘e fakatokoto ai hono sinó. 7Ka mou ō leva ‘o tala ki heʻene kau akó, pea kia Pita foki, ‛kuó ne ʻosi mu‘omu‘a atu ia ʻiate kinautolu ki Kāleli. Pea te nau toki sio ai kiate ia, ‘o hangē pē ko e me‘a na‘á ne folofolaʻaki atú.’ ”
8Pea hola fakavave atu leva ʻa e kau fefiné mei he fonualotó, he kuo nau tetetete heʻenau fuʻu ʻohovalé. Pea na‘e ‘ikai te nau toe talanoa ki ha taha ʻa e me‘a kuo hokó, he ko e mo‘oni̇́ na‘á nau manavahē ʻaupito.
Ko e Hā ʻa Si̇̄sū kia Mele Makitaline
(Mātiu 28:9-10; Sione 20:11-18)
9Pea hili ʻa e toetu‘u ʻa Si̇̄sū mei he maté, ʻi he hengihengi ‘o e ʻuluaki ʻaho ‘o e uiké, na‘á ne fuofua hā kia Mele Makitaline, ʻa ē na‘á ne kapusi mei ai ʻa e fanga tēvolo ‘e toko fitu. 10Pea ʻalu leva ʻa Mele Makitaline ‘o fakahā ki he fa‘ahinga na‘e kau mo Sisu, ʻa ia naʻa nau lolotonga tangi mo tēngihia; 11Pea ʻi heʻenau fanongo ki he‘ene pehē: Kuo toe mo‘ui ʻa Sīsuú, pea kuó ne mamata ki ai̇́, naʻe faingataʻa ke nau tui ki ai.
Ko e Hā ʻa Si̇̄sū ki he Toko Ua He‘ene Kau Akó
(Luke 24:13-25)
12Pea hili ʻa e ngaahi meʻa ko iā, pea toe hā ʻa Si̇̄sū, kuo fōtunga kehe ia, ki he tokoua ʻo ʻene kau akó naʻá na lolotonga fononga atu ki ʻuta. 13Pea naʻe foki hake ʻa e toko ua ko iā ‘o fakahā ki he kau ako ko ē, ka na‘e ‘ikai pē foki te nau tui kiate kinaua.
Koe Hā ʻa Si̇̄sū ki he Toko Hongofulu-Mā-Tahá
(Mātiu 28:16-20; Luke 24:36-49; Sione 20:19-23; Ngāue 1:6-8)
14Pea toki hā fakamuimui taha ʻa Si̇̄sū ki he kau ako ‘e toko hongofulu mā tahá, lolotonga naʻe fai ʻenau ma‘u me‘atokoni. Pea na‘á ne valoki‘i kinautolu koeʻuhi̇̄ ko ʻenau ta‘e tuí mo ʻenau ta‘efiefalala ki he lau ʻa e fa‘ahinga na‘e siotonu kiate ia kuó ne toetuʻú. 15Pea naʻe talaange kiate kinautolu, ‟Mou ō ‘o malanga ʻaki ʻa e Ongoongo Lelei̇́ ki he meʻafakatupu kotoa pē. 16‘Ilonga ha taha ‘e tui̇́, pea papitaisó, ‘e fakamo‘ui ia. Peá ka ‘ilonga ha taha ‘e ‘ikai tui̇́, ‘e fakamalaʻiaʻi ia. 17Pea ko e ngaahi me‘a fakaofo ʻeni kakai ‘e hoko kiate kinautolu ʻe tui kiate aú. Te nau kapusi tēvolo ʻaki hoku hingoá. Te nau lea ʻaki foki ha ngaahi lea kehekehe. 18Pea kapau te nau ala ki ha ngata, pē inu ha me‘akona, ‘e ‘ikai te nau mate ai. Te nau hilifaki honau nimá ki ha kau mahaki, pea ‘e mo‘ui leva ʻa e kakai ko iā.”
Ko e Hā‘ele Hake ʻa Si̇̄sū ki he Langi̇́
(Luke 24:50-53; Ngāue 1:9-11)
19Pea hili ʻa e folofola ʻaki ‘e he ʻEiki ko Si̇̄suú ʻa e ngaahi me‘a ko iā kiate kinautolú, na‘e ‘ohake ia ki he langi̇́ ‘o ne ʻafio mei he nima to‘omata‘u ‘o e ‘Otuá. 20Ka na‘e ō atu ʻa e kau akó ‘o malanga ʻi he feitu‘u kotoa pē. Pea na‘e kaungāngāue fakataha mo kinautolu ʻa e ʻEiki̇́, ‘o naʻe fakamo‘oni‘i ʻenau malangá ʻaki ʻa e ngaahi mana na‘e hoko.
Избрани в момента:
Ma‘ake 16: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.