SOERA MOZE II. FAZA 15.
FAZA 15.
I. Fanoenõ Ndraono Gizeraëli ba wangorifi andrõ, sahõlihõli dõdõ. II. Fangami idanõ andrõ ba Mara.
1I. Me loeo daʼõ lalaoe zinoenõ andre Moze ba Iraono Gizeraëli, wanoeno Jehowa, lamane wanoenõ: ”Daʼoesoeno Jehowa, me no salaw̃a seboea ia; koedo ba si fakoedo jaw̃a, ba no itoeliʼõ ba nasi. 2Faʼabõlõgoe Jehowa ba fanoenõgoe, me no sangorifi jaʼodo ia; Lowalangigoe ia, andrõ oesoeno ia — Lowalangi namagoe andrõ, oeʼeboeaʼõ doeriania. (Sam. II. 22, 2. Sin. 18, 3. Jes. 12, 2. Fam. 15, 3). 3Sabõlõ ba wanoewõ Jehowa andrõ; Jehowa dõinia. 4Koereta andrõ chõ Waraʼo ba sabõlõ andrõ chõnia, ba no itoeliʼõ ba nasi, ba nitoetoejoe andrõ, si fasõndra moroi ba goereta jaw̃a, ba no alõmõ ba nasi zoechoe. (Neh. 9, 11). 5No ibaloegõ ira namõ nasi; ba dawoejoe ahõndrõ ira, hoelõ gara. 6Si so lachõmi dangaoe kambõlõ, jaʼoegõ, Jehowa, ba waʼabõlõnia andrõ. Tangaoe kambõlõ andrõ, jaʼoegõ, Jehowa, ba irasa nemali. 7Ba ba waʼasalaw̃amõ andrõ, si no eboea sibai, ba õhori zi faʼoedoe chõoe. Na õbeʼe tesao mbachoehachoe dõdõoe, ba iʼā ira, si mane femanga galitõ dõla wache. 8Ba wehõfoehõfoemõ, ba wõnoemõ, tobaʼa nidanõ; abeʼe hohooe, hoelõ mbaʼabaʼa; hoelõ zi bakoe hooe nasi. 9Imane emali: Daʼoegohi ira, oechamõ dania: oefaosa dania niraboe, oeʼaboesoiʼõ ndraʼo ba chõra. Oedõni ziʼõli; ihori ira tangagoe andre. 10Õfatõrõ hanoehanoemõ andrõ, ba ihawoei ira asi; ahõndrõ ira, hoelõ zimo, ba nasi seboea sibai. 11Ha niha Lowalangi si fagõlõgõlõ chõoe, jaʼoegõ. Jehowa! Ha niha zi fagõlõgõlõ chõoe, jaʼoegõ, salaw̃a seboea lachõmi, jaʼoegõ, sataʼoe ita, ba wolaoemõ andrõ, seboea toeria, solaoe sahõlihõli dõdõda! (Sin. 72, 18). 12Õʼoroʼõ dangaoe, ba itõlõ ira tanõ. 13No õfasao faʼeboea dõdõoe soi andrõ si no õʼefaʼõ; no õʼohe ba nahiaoe niʼamoniʼõ andrõ, faʼabõlõoe. 14Me larongõ niha baero, ba manizinizi ira; ihawoei Ndrawa Wilisiti faʼataʼoe. 15Tobali dõdõ zalaw̃a Ndraono Gedomo, ba ihawoei zolohe Iraono Moabi fogichi dõdõ; aragoeragoe dõdõ mbanoea ba danõ Ganaʼana fefoe. (Jos. 2, 9). 16Ihawoei ira faʼatobali dõdõ ba faʼataʼoe; ba nilaoe dangaoe andrõ, si no eboea, tobali hoelõ gara ira, ba latõrõ banoeaoe, jaʼoegõ, Jehowa; latõrõ banoea andrõ, nitoejoemõ chõoe. 17No õʼohe ira ba no õtanõ ira ba hili andrõ, ba hili tána chõoe andrõ, ba nahia andrõ, nihaogõoe chõoe, jaʼoegõ, Jehowa, enaʼõ ba daʼõ sosoʼõ, ba niʼamoniʼõ andrõ, jaʼoegõ, Soʼaja, ba nihaogõ dangaoe. 18Razo Jehowa, gõtõgõtõ waʼara! (Sin. 93, 1). 19Me laroegi nasi koedo Waraʼo, awõ goereta, awõ zi fakoodo, ba ifoeli fahalõ jaw̃ara hooe nasi ibeʼe Jehowa; ba Iraono Gizeraëli, ba no latõrõ nasi, ba zi no otoefo.” 20Ba itoejoe waritia Mirija samaʼeleʼõ andrõ, ira alawe, talifoesõ Gaʼaroni, ba laʼoʼõ ia ira alawe fefoe, laʼohe waratia ba manari ira. (Sin. 68, 26). 21Ba manoenõ Mirija, imane: ”Miʼanoenõ chõ Jehowa, me no salaw̃a seboea ia; no itoeliʼõ ba nasi koedo, fabaja si fakoedo jaw̃a!”
22II. Ba ifofanõ Ndraono Gizeraëli Moze, laʼoroi nasi zoechoe, ba lasaw̃a danõ si mate Soeri; tõloe ngaloe ba tõloe mbongi latõrõ danõ si mate, ba lõ lasõndra nidanõ. 23Awena laroegi Mara; ba tebai labadoe nidanõ andrõ, bõrõ waʼafetonia. Safeto sa ia, andrõ wa labeʼe tõi naha andrõ Mara (Safeto). (Moz. IV. 33, 8. Raz. II. 2, 19). 24Ba koemõkõkõkõ zato chõ Moze, lamane: Ha mabadoe idanõ? 25Ba iʼangarõfi li Jehowa, ba iʼoromaʼõ chõnia geoe Jehowa, daʼõ itiboʼõ ba nidanõ andrõ, ba ami saʼae nidanõ. Ba daʼõ ibeʼe chõra gamachõita ba hoekoe ba ba daʼõ itandraigõ ira, 26imane: Na õʼoʼõ niw̃aʼõ Lowalangioe Jehowa ba na õlaoe zatoelõ dõdõnia famaigi, na õʼoʼõ goroisania ba na lõ olifoeʼõ gamachoitania andrõ fefoe, ba sambalõ lõ oefatõrõ chõoe famakao andrõ nifatõrõgoe ba Ndrawa Miseraji mege; jaʼo, Jehowa, zamadõhõ fõchõoe. (F. 23, 25). 27Ba laroegi Gelima, ba felendroea lasõndra ba daʼõ oemboe nidanõ ba fitoe ngafoeloe ngaʼeoe dõla nohi; ba molombase ira ba daʼõ ba zinga nidanõ. (Moz. IV. 33, 9).
Избрани в момента:
SOERA MOZE II. FAZA 15.: NIA
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.