SOERA MOZE II. FAZA 16.
FAZA 16.
I. Koemõkõkõkõ Ndraono Gizeraëli, ba waʼolofo. Ibalazoi ira Lowalangi siʼate ba ”mána” andrõ. II. Ifachoi chõra Moze, he wisa wangozaragõ ”mána” andrõ, balazo ba zabato.
1I. Ba laheta ira ba Gelima ba laroegi danõ si mate Sini, Iraono Gizeraëli fefoe, tanõ si mate ba gotaloeara Gelima andrõ Zinaʼi, ba doeli ba mbaw̃a si doea, iʼotarai aheta ira ba danõ Miseraji. 2Ba koemõkõkõkõ Ndraono Gizeraëli fefoe chõ ndra Moze Aʼaroni ba danõ si mate andrõ. 3Lamane chõra Iraono Gizeraëli: Enaʼõ na mate mege ndraʼaga ba danga Jehowa, ba danõ Miseraji, me doemadaoga ba ngai mbowoa ndriwo chõma ba me aboesoga koee; ba no miʼohega ba danõ si mate andre, ba wameʼe mate olofo Ndraono Gizeraëli fefoe. 4Ba imane Jehowa chõ Moze: Laoe! Daʼoebeʼe atoroe moroi ba mbanoea si jaw̃a koee, amaedola daw̃a deoe, ba acha mõi ira, acha laʼerogõ maʼṍchõ wangozaragõ sogoena chõra maʼṍchõ. Ba daʼõ dania oetandraigõ ira, na edõna laʼoʼõ nifachoigoe, ba na lõʼõ. (Neh. 9, 15. Sin. 78, 24. Joh. 6, 31. Kor. I. 10, 3). 5Ba na laʼasiwai nihalõra ba loeo wangõhõna, ba no mendroea faʼoja niʼozaragõra na loeo bõʼõ. 6Ba lamane ba Ndraono Gizeraëli fefoe ira Moze Aʼaroni: Owī dania, ba aboto ba dõdõmi, wa no Jehowa zangeheta jaʼami ba danõ Miseraji; 7ba mahemoloe mbanoea, ba oroma chõmi lachõmi Jehowa; noa sa irongo wekõkõkõkõmi chõ Jehowa; ba hadia ndraʼaga, wa chõma koemõkõkõkõ ami? 8Ba imane na Moze: Me ibeʼe dania chõmi Jehowa, owī dania, ba õmi diwo, ba mahemoloe mbanoea, ba sabõnõ koee, ba me no irongo wekõkõkõkõmi chõma Jehowa — hadia sa ndraʼaga andre? Tenga chõma moekõkõkõkõ ami, tobali sa chõ Jehowa! 9Ba imane Moze chõ Gaʼaroni: Õmane ba Ndraono Gizeraëli fefoe: Miʼondrasi Jehowa: noa sa irongo wekõkõkõkõmi andrõ. 10Ba me no iw̃aʼõ daʼõ ba Ndraono Gizeraëli fefoe Aʼaroni, ba laʼotahõgõ danõ si mate wamaigi; ba iʼozoemagõ oroma lachõmi Jehowa ba lawoeo andrõ. 11Ba imane Jehowa chõ Mose: 12No oerongo wekõkõkõkõ Ndraono Gizeraëli; õmane chõra: Owī dania, ba so gõmi diwo, ba mahemoloe mbanoea, ba aboeso ami koee, ba jaʼaboto ba dõdõmi, wa no jaʼo Jehowa, Lowalangimi. 13Ba me aracha bongi, ba so moroi si tooe zi ate, lahawoei golombasew̃a. 14Ba mahemoloe mbanoea, ba aechoe namo ba zi tefasoei olombasew̃a. Ba me taja namo andrõ, ba hiza tooe ba danõ si mate zi no ideʼide, mongawoea, faʼeboea dambõni, ba danõ tooe. 15Ba me laʼila Iraono Gizeraëli, ba faoma lamane chõ nawõra: Hadia daʼõ? lõʼõ sa laʼila hadia. Ba imane chõra Moze: Daʼõ koee andrõ, boeala Jehowa chõmi, õmi.
16II. Daʼõ niʼoroiʼõ Jehowa: Miʼozaragõ ha waʼoja mogoena, õ zamõsana, sadoemba zamõsa; balazi ha daoega zi samba ose, ba wangaimi. 17Ba laʼoʼõ daʼõ Iraono Gizeraëli, laʼozaragõ; samõsa, ba oja iʼozaragõ ba samõsa, ba ambõ faʼoja. (Kor. II. 8, 15). 18Ba me lasoeʼa ba doemba, ba lõ si tõra ba zi no oja mangai, ba lõʼõ gõi ambõ ba zambõ faʼoja niʼozaragõ, ha ndrohoendrohoe zogoena, õ zamõsana, niʼozaragõra. 19Ba imane chõra Moze: Samõsa lõ sameʼe jaw̃a, irege mahemoloe. 20Ba lõ lafondrondrongo li Moze, so zameʼe jaw̃a õsa, irege mahemoloe õ. Ba mokoekoeõ ba obooe. Ba mofõnoe chõra Moze. 21Ba ero mahemoloe mbanoea laʼozaragõ, ndrohoendrohoe zogoena õ zamõsana. Ba na aoechoe zino, ba maniõ. 22Ba me loeo wangõhõna, ba no mendroea waʼoja niʼozaragõra, õra, no doea doemba zamõsa. Ba mõi zatoea mbanoea fefoe, ba wangombacha daʼõ chõ Moze. 23Ba imane chõra: Jaʼia niw̃aʼõ Jehowa: Mahemoloe loeo wolombase, sabato, niʼamoniʼõ chõ Jehowa. Hadia zomasi ami misala, ba misala, ba hadia nirino, ba mirino; hadia zi tosai, ba mibeʼe jaw̃a, ba wanenagõ jaʼia, õ mahemoloe. 24Ba labeʼe jaw̃a irege mahemoloe, dali niw̃aʼõ Moze, ba lõ obooe ba lõʼõ gõi koekoeõ bacha. 25Ba imane Moze: Õmi maʼõchṍ; sabato chõ Jehowa sa maʼõchṍ; lõ misõndra hadia ia ba danõ maʼõchṍ. 26Õnõ ngaloeo miʼozaragõ ia, ba ba loeo si fitoe, ba zabato, ba lõ jaʼia. 27Ba so zi mõi baero, me loeo sabato, ba wangozaragõ, ba lõ hadia ia lasõndra. 28Ba imane Jehowa chõ Moze: Ha waʼara tõ na techõmi miʼoʼõ goroisagoe ba amachoitagoe? 29Hiza, Jehowa zameʼe chõmi sabato andrõ, doea ngaloeo balazo ibeʼe chõmi, na loeo wangõhõna; mihonogõ ami jomo; samõsa bõi jamõi tooe, na loeo sabato. 30Ba laʼamoniʼõ loeo sabato. 31Ba ”mána” labeʼe tõinia Iraono Gizeraëli: No afoesi, hoelõ lada safoesi, ba faʼaminia, ba hoelõ koee nilaoe w̃e w̃ani. (Moz. IV. 11, 7). 32Ba imane Moze Daʼõ niw̃aʼõ Jehowa: Sadoemba laʼirõʼõ ba ngaʼõngaʼõtõ mitooe, enaʼõ laʼila gõ andrõ, nibeʼegoe balazomi ba danõ si mate, me oeheta ami ba danõ Miseraji. (Heb. 9, 4). 33Ba imane Moze chõ Gaʼaroni: Halõ migõ, sadoemba beʼe bacha ”mána”, ba beʼe jaw̃a fõna Jehowa, enaʼõ teʼirõʼõ, gõtõgõtõ waʼara. 34Ba iʼoʼõ daʼõ Aʼaroni, dali niw̃aʼõ Jehowa chõ Moze; ibeʼe fõna zoera goroisa Aʼaroni, ba wangirõʼõ jaʼia. 35Ba õfa woeloe fache waʼara laʼagaʼaga ”mána” Iraono Gizeraëli, irege laroegi danõ si so niha; ”mana” gõra, irege lachamõ nola danõ Ganaʼana. (Jos. 5, 12). 36Ba si sadoemba, ba samboea niʼofoeloe zi samba Efa [chõra].
Избрани в момента:
SOERA MOZE II. FAZA 16.: NIA
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.