Te Otinako 12
12
Te Riao
1E taetae te UEA nakon Moote ma Aaron i Aikubita ni kaangai, 2“E na riki te nam'akaina aei b'a ami moan nam'akaina i Buku n te ririki. #12.2 Te nam'akaina aei: Abibi (e atongaki naba b'a Nitian), te moan nam'akaina n te karenta n Ebera, are moa man nukan Maati nakon nukan Eberi. 3Kam na anga taian kaetieti aikai nakoia Iteraera ni kabane: a na riai mm'aane n tatabemaniia nako n rinea tao te tiibuteteei ke te kootiteteei i bukiia kaain aia auti ni kabane. 4Ngkana e rangi n uarereke ana utu temanna n te aro are e aki konaa ni kana te man ae e b'anin, ao e na i buobuoka te man temanna ma kaain rarikina, n tib'aia raoi nakon te m'aiti ae e konaa ni kanna temanna. 5Ko na rinea te tiibu ke te kooti, ko na anaa ae teuana ana ririki ni maiu ae te mm'aane ae akea toabuakan rab'atana. 6Ao i mwiina, n tairikin te katebwi ma aua ni bong n te nam'akaina, a na bane Iteraera n tiringiia maan. 7A na riai aomata nako n uota teuana te raraa ma ni kaaki i aon bouan mataroan aia auti are a na kana iai te man. 8E na riai n umunaki te iriko ni man, ao e na kanaki ikekei n tannaaki ma aroka aika mao ao kariki aika aki renganaki ma te iti. 9Kam ma aki kang am'arake aika aki m'ai ke aika a kaburoaki, ma kam na kanna ngke umunaki ni kab'aninaki, n reitaki ma atuuna, rangana, ao kanoan nanona. 10Akea teutana ae kam na kanikiranaa nakon te moaningabong; ngkana iai nikirana, ao e na riai ni kabuokaki. 11Kam na kanna ni kawikoaingkami, b'a kam na katauraoingkami nakon te m'ananga ni karin kunnikaimi, ami kauniwae ao okomi i nanon baimi. Bon aei te Toa are te Riao i bukin karineau Ngai ae te UEA.
12N na ri nanon te aba are Aikubita nakon te tairiki, n tiringiia karimoa mm'aane; natiia aomata ma maan, ao N na katuaaia antin Aikubita. Bon te UEA Ngai. 13E na riki te raraa are i aon bouan mataroan ami auti b'a te kanikina i bukin auti ake kam maeka iai. Ngkana I noora te raraa, N na riaoingkami ao N na aki tiringkami ngkana I katuaaia kaain Aikubita. 14Kam na bukamarua te bong aei b'a te bong ae te toa are kauringaakimi n te b'ai are E a tia n karaoia te UEA. Kam na kaakaraoia n taai nako ni boong aika a na roko.”
Te Toa are Te Kariki ae Aki Karikaki
15E taku te UEA, “Kam na aki kana te kariki ae karikaki i nanon itiua te bong—Kam na tii kana are aki karikaki. Ao n te moani bong kam na kanakoi taian iti man ami auti nako, b'a ngkana iai ane e kana te kariki ae karikaki i nanon boong akana itibong akanne, ao e na aki atongaki b'a au aomata. 16N te moani bong ao n te kaitiua ni bong kam na bootaki n taromauri. Bon akea te m'akuri ae na karaoaki i nanon boong akanne, ma kam riai ni katauraoa te am'arake. 17Kam na kaawakina te toa aei i bukina b'a aio te bong are I kaotinakoi ngkami iai mai Aikubita. Kam na riai ni kaakaraoa ami bootaki ni boong ni kabane aika na roko i aon te bong aei b'a te toa. 18Kam na aki kana te kariki are e karaoaki ma te iti man tairikin te katebwi ma aua ni bongin te moan nam'akaina nakon tairikin te kauabwi ma teuana ni bong. 19Akea te iti ae kariaiakaki i nanon taiani mwenga, e aoria ngkana bon te Iteraera ke tiaki. Ngkana kam reke ni kana te b'ai ae e karaoaki man te iti, ko na aki manga atongaki b'a te Iteraera ngkoe. 20Kam na kararoaingkami man te iti, e aki tabe te aba b'a ko maeka ia. Bon akea temanna ae e kariaiakaki ni kana te b'ai ae e karaoaki man te iti.
21E weteia ni kabane taani kairiiri mai buakoia Iteraera Moote ao e taku nako ia, “Kam na rinea te tiibuteteei ke te kooti te teei ngkami n tatabemaningkami nako ao kam na tiringnga, b'a a aonga ami utu ni konaa ni kauringa te Riao. 22Kam na anaa m'aangan te utob'a, ao kateboa i nanon te boora ae kakanoa n raraan te man, ao kabira bouan mataroan ami auti ma kain naba te mataroa ake mai eta. Bon akea temanna mai buakomi ae e na kiitana ana auti n karokoa te moa n ingabong. 23Ngkana E m'ananga te UEA b'a E na tiringiia kaain Aikubita, e na noora te raraa i aon kain etan ami mataroa ma bouana ao E na aki karina Aneran te Mate b'a e na rin n ami auti n tiring ngkami. 24Kam na riai n iri taian tua aikai ma natimi n taai nako. 25Kam na karaoa te aekaki ni bootaki ae aron aei ngkana kam rin n te aba are E a tia ni berita iai te UEA b'a e na angani ngkami. 26Ao ngkana a titirakini ngkami natimi ni kaangai, “Tera nanon te aekaki n taromauri ae aron aei?” 27ao kam na kaeka ni kaangai, “Bon karean te Riao i bukin karinean te UEA, i bukina ngke E riaoia aia auti Iteraera i Aikubita. E tiringiia kaain Aikubita, ma E kamaiura.”
A katorobubua Iteraera n taromauri. 28Ao i mwiin arei, a nako ma ni karaoi b'aai ake E tuangiia te UEA n aron ana mwioko nakon Moote ma Aaron.
Mateia Naati Karimoa Mm'ane
29Ngke e a nuukanibong E a tiringiia naati karimoa mm'aane te UEA i Aikubita, ni moa mairoun natin te uea te mm'aane, ni karokoa natin te bure are i nanon te karabuuti; a bane naba n tiringaki karimoa mm'aane aika natiia maan. 30Ao a bane n uti n te tairiki anne, te uea, ana mataniwi, ao kaain Aikubita ni kabane ake tabem'aang. E a taona aon Aikubita ni kabutaa n te tang ae korakora, i bukina ngke a bane ni mate naati mm'aane n taiani mwenga ni kabane. 31Ao te uea, e kanaanako weteaia Moote ma Aaron ni bon te tairiki naba anne ao e taku, Otinako, ngkoe ma am botannaomata ane Iteraera. Kiitana abau; naako taromauriia te UEA n aron are kam buubuti iai. 32Kairiia ami tiibu, kooti, ao ami kao, ao an naako. Ao kam na tataro i bukin kakab'aiaau.”
33Ao kaain Aikubita a ienikuriia aomata b'a a na kawaekoaia ni kiitana te aba; ao a taku, “Ti na bane ni mate ngkana kam aki nako.” 34 Ma ngaia are, a kanoai boora ni kaboburawa n te kariki ae e a tia ni kabooaki ae e tuai itinaki, ao a rabun n taiani kunnikai, ao a uoti i aon angaia. 35A karaoi b'aai ni kabane ake a tuangaki Iteraera iroun Moote, ao a buubutiia kaain Aikubita te koora ma te tirewa ao taiani kunnikai ni katamaroa. 36E karaoia kaain Aikubita b'a a na karineia aomata ao a anganiia b'aai ake a buubuti. Ao n te aro aei, a uoti nako iai kaub'aia kaain Aikubita.
Kitanan Aikubita Irouia Iteraera
37Ao a waaki nako n nakonako i aon waeia Iteraera mai Rameteti ni kakioa Tukota. E kaaniia onobubua tengaa bootan te mm'aane, n aki warekaki aine ma ataei. 38Ao iai naba te koraki n aomata ae korakora ae a iriia aika a m'aiti naba aia tiibu, kooti, ao aia kao aika a kairiia. 39Ao a kam'aa te kariki ae e aki karikaki man te buraawa are e a tia ni kabooboaki are a uotia mai Aikubita, i bukina ngke a kataweaki ni kanakoaki n aki reke aia tai ni katauraoi kanaia ke ni katauraoi aia buraawa are e a tia ni kabooaki ae e aki itiinaki.
40A tia ni maeka Iteraera i aon Aikubita n te maan ae abubua tenibwi te ririki. 41N tokin te ririki ae abubua tenibwi, a bane n nako iai barongan nako ana aomata te UEA ni kiitana Aikubita. 42Bon te tairiki te tai are e tarataraia iai ana aomata te UEA ngke kaotinakoia mai Aikubita, ao e katabuaki te tairiki naba anne b'a Ana b'ai te UEA n taai nako, b'a te tairiki are a na taratara iai Iteraera ni kabaneia.
Kaetieti i bukin Te Riao
43E taku te UEA nakon Moote ma Aaron, “Aikai taian kaetieti i bukin te Riao: akea te ianena ae e na kana am'araken te Riao, 44ma a na konaa ni kanna tooro akana kam a tia ni kabooia ti ngkana a tia moa ni korotabonim'aneaki. 45Akea te iruwa ke te tia m'akuri ae kabooaki ana m'akuri ae e na kanna. 46E na kanaki ni kabaneaki te am'arake i nanon te auti are katauraoaki iai; e na aki uotaki nako tinaniku. Ao kam na aki otea riin te man teaina. 47A na riai Iteraera ni kabane ni bukamarua te toa aei, 48ma akea te mm'aane ae tuai ni korotabonim'aneaki ae na kanna. Ngkana iai te ianena ae maeka i buakomi ae tangiria n ira te kauring i bukin te Riao, a na riai moa ni korotabonim'aneia m'anen te auti anne ni kabane. Ao i mwiina, e a tib'a aranaki b'a ataeinimm'aanen Iteraera ni koaua ao e a konaa n ira te toa. 49E na kamanenaaki naba te kaetieti aei nako ia naba aika bon ataeinimm'aanen raoi Iteraera ao nakoia naba ianena ake a maeka i buakomi.” 50A ongotaeka Iteraera ni kabane ao a karaoi b'aai ake E a tia ni mwiokoia iai Moote ma Aaron te UEA. 51N te bong anne, ao te UEA e kairiia aia baronga Iteraera ni kaotinakoia mai Aikubita.
Избрани в момента:
Te Otinako 12: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте