Te Otinako 22
22
Tuan te B'aib'ai
E taku te UEA:
1Ngkana arona b'a ko iraea te kao mm'aane ao ko tiringnga ke ko kaboa nako, ao ko na kabooa mwiina n niiman taian kao mm'aane; ngkana ko iraea te tiibu ao ko tiringnga ke ko kaboa nako, ko na kaboa mwiina n aman te tiibu. 2Ma ngkana ko aki konaa ni kabooa mwiina n te man, ko na kabooaki nako b'a te toro ngkoe i bukin te b'ai are ko a tia n iraea. 3Ngkana ko iraea te kao mm'aane, te aati, ke te tiibu, ao a bon maiu, ao ko na kataboroa m'aitiia n anga nakon are ana man. 4Ngkana arona b'a ko bure n tiringa te tia kimoa ae e ninia am auti ngke e a roo, ao ko aki bure iai. Ao ngkana ko tiringa te aomata ae e ninia am auti n te ngaina, ko na reke n te bure n tiritiri iai.
5 Ngkana arona b'a ko kaotinakoa am man man am tabo ao ni kakana te uteute#22.5 ke ni kang “b'aai ni kabane.” n ana tawaana ke ana nne ni kureebe temanna, ko na riai ni kabooa mwiin ana urub'ai am man man uaan am tai n am kureebe ao taian uita aika taiani kabanea n tamaroa.
6Ngkana ko aki taratara raoi ngkana ko kauraura ao e a raka nako nakon aban temanna, ko na riai ni kabooi mwiin taian aroka ke taian tawaana ake a uruaki n te ai nakon te aomata are ana b'ai.
7Ngkana arona b'a iai ae e buutiiko b'a ko na kawakina ana tirewa ke b'aai aika a kakaawaki n am auti, ao a manga iraeaki b'aai akanne. E na kabooi mwiin b'aai akanne te aomata are e kimoai ngkana e reke. 8Ma ngkana e aki reke te aomata are e kimoai, a na iangoia taan moti b'a ko na kabooa mwiina ke ko na aki.
9Ngkana arona b'a iai uoman aomata aika uneakina te kao ke te tiibu ke te kunnikai ae ti teuana. A na iangoa te kangaanga aei taani moti, ao te aomata are e reke n te bure, e na kataboroa m'aitin te b'ai anne nakon are bon oin ana b'ai.
10Ngkana arona b'a iai kaain rarikim ae na m'ananga moa nakon te tabo teuana ao e butiiko b'a ko na kaawakina ana aati ke te kao mm'aane ke te tiibu ke maan riki tabeua, ao e a ti mate naba ke e ikoaki ke e kimoaaki ngke akea ae e nooria. 11Ngkana ko bon tuea ma Ngai b'a am tia kakoaua b'a ko bon aki kaikoaka te man anne, ao ko riai n aki kabooa mwiina. E riai n rau nanon te tia b'aib'ai n am kaotioti. 12Ma ngkana arona b'a e iraeaki te man ngke e mena iroum, ao ko na kabooa mwiina. 13Ngkana arona b'a e tenaaki te man irouia maan ni kaakang ao e mate, ao ko na kaota nikiran rab'atana nakon te aomata are ana man, ao ko na aki kabooa mwiina.
14Ngkana arona b'a ko tangoa te man iroun ae kaain rarikim, ao e manga ikoaki ke e mate ngke e aki mena ikekei te aomata are bon ana man. Ko riai ni kabooa mwiina. 15Ma ngkana arona b'a iai te b'ai ae e riki nakon te man ngke e bon mena ikekei te aomata are ana man, ao ko na aki kabooa mwiin te man anne. Ma ngkana kam riitina te man anne, ao e na riki te m'ane are kam anga b'a kabooan mwiin te kabuanib'ai are e riki nakoina.
Tuan Te Maiu N Te Bong Koraki
E taku te UEA:
16Ngkana arona b'a e tuai mani mare te ataeinaine temanna ao e tuai naba ni kainrou. Ao ngkana arona b'a e tuangnga b'a e na wene ni bure ma ngaia, e na riai moa ni kab'aka boon te kainrou, ao i mwiina, e a mare ma ngaia. #22.16 boon te kainrou: Bon te katei b'a e na riai ni kabooa buuna te mm'aane irouia ana karo ana kainrou i m'aain tain te mare. 17Ma ngkana arona b'a e rawa taman te aine ni marea natina te aine ma te mm'aane anne, e na bon kab'akaaki naba boona.
18Tuaan te tabunea bon te tiringaki.
19Tuaan te wene ni bure ma maan bon te tiringaki.
20Tuaan te angakarea nakoia anti tabem'aang, bon te tiringaki akea riki b'a bon ti Ngai.
21Kam na aki kabuakakaia Iruwa aika maeka i buakomi. Uringnga b'a bon iruwa ngkami i Aikubita.
22Kam na aki karaoa ae e aki raoiroi nakoia aine aika a mate buuia ke ataei aika akea aia karo. 23Ngkana kam karaoa anne, ao ane a na buubutiai buokaia, ao N na roko ni kamaiuia. 24Ae N na bon rangi n un n te aro are N na tiringiia ami mm'aane ao ni karikiia buuia b'a aine aika a mate buuia ao natiia b'a ataei aika akea tamaia.
25Kam na aki tangira rakan te m'ane ae kam anga b'a e na taarauaki irouia aomata nako aika a maiu ni kainano. 26Ko na riai ni kaoka te kabaraaki are te kooti are ko anaia b'a te b'ai ni kakoaua i bukin te roun, ao ko riai ni waekoa ni kaokia nako ina i m'ain bungin taai, 27b'a bon ti anne rabunan te aomata ae maiu ni kainano are e na rabunna iai ngkana e matu n te tairiki. Bon te Atua Ngai ae I akoi, ao ngkana arona b'a a weteai, ao N na bon roko ni buokiia.
28Kam na aki taekina ae e buakaka nakon Iu ke nakon ami tia kairiiri.
29Kam na kakaonimaki n anga te karea are te uita ao te wain ake bon au b'ai.#22.29 Kam na kakaonimaki... Ngai: Teuana mai buakon nanon te taeka n Ebera ae e matoatoa nanona.
Kam na katabuia natimi mm'aane b'a au b'ai 30ao moan natiia naba ami kao ma ami tiibu. Katikuia maan i rarikin tinaia i nanon itiua te bong, ao te kawani bong kam na anganai, Ngai ae Atuami.
31Bon au aomata ngkami aika kam rineaki, ma ngaia ae kam na aki kang irikon taiani kao ke ami tiibu aika a tiringaki irouia maan aika moaanti. Ma kam kam'arakeia iai ami kamea.
Избрани в момента:
Te Otinako 22: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте