Te Otinako 23
23
Te Motikitaeka ae Eti ae boraoi i bukiia aomata nako
E taku te UEA:
1Kam na aki kabutanakoa te uarao ke ni buoka te aomata ae buakaka ni kaotioti i bukin ana kewe. 2Tataekina te koaua n taai nako i nanon tain te kabowi, e ngae ngkana a bane aomata n karaoa te raoiroi ao n tei ni kawain te motikitaeka ae eti. 3Kam na aki tei i bukin te aomata ae e maiu ni kainano ti i bukina ngke e maiu ni kainano. 4Ngkana kam kunea te kao mm'aane ke te aati ae e m'arua, kam na kaokia nakon te aomata are ana man, e aoria naba ngkana ana man ami kairiribai. 5Ngkana arona b'a e rangi n rawaawata uotan te aati ao e a b'aka, kam riai ni karaoa ae ko konaa ni buokia, e aoria ngkana ana man te aomata temanna ae e aki taatangiringkami. #23.5 tatangiringkami: Teuana mai buakon nanon te taeka n Ebera ae e matoatoa nanona n aron ane oti n te kibu 5.
6Kam na kakoauaa raoi b'a a anganaki te motikitaeka ae eti raoi n te kabowi aomata aika kainano. 7Kam na aki anga te tuua ae e kairua nakoia aomata nako ke n anga motikan te aomata ae akea ana bure b'a e na tiringaki. N na bon aki kab'araa ami bure ngkana kam karaoa aei.
8Kam na aki butim'aea te anai nano. A matakii taan moti ao ni b'aoua nako aia motikitaeka ae eti n taian anai nano.
9Kam na aki kateibuaka nakoia iruwa. Bon iruwa ngkami ngkoa i Aikubita, ao kam bon noora arona.
Tuan te Taabati
E taku te UEA:
10Uniki arokami ao taii uaan arokami i nanon onoua te ririki, 11ma kamotirawaa te aba n te kaitiua n ririki. A na am'arake aomata aika maiu ni kainano man ami tawaana, ao katikui nikirana nakoia maan aika aki manana. 12Kam na m'akuri ni bong ake onobong n te wiiki, ao kam na motirawa ma ni katoki kuami n te kaitiua ni bong. E na aki ti b'ainaki te tua aei i roumi, ma irouia naba ami kaomm'aane, aati, ao ami toro, ai uana naba ma iruwa akana a maeka i buakomi.
13Ma kakoauaa raoi b'a kam ongotaeka nakoni b'aai nako aika I a tia n taekin. Kam na aki tataro nakoia anti tabem'aang ke n atong araia.
Taian Toa aika Tenua n te Ririki
(Te Oti 34.18-26; Te Tua 16.1-17)
E taku te UEA:
14Kam na karaoi taian Toa aika tenua ni katoa ririki b'a karineau.
15Kam na karaoa te Toa are te Kariki are Aki Karikaki ngkana kam kana te kariki are e aki karikaki, n aron are I a tia ni mwiokoingkami iai. #23.15 N aron are I a tia ni mwiokoi ngkami iai: Noora 12.14-20. Kam na karaoa aei n taina raoi n te nam'akaina are Abibi,#23.15 Abibi: Noora te taeka ane n 12.2. 16Kam na karaoa te Toa ae M'anganikaai #23.16 te Toa ae M'anganikaai: E aranaki naba n aia tataneiai kain te aba n arana ae Toan taiani Wiiki ao n ataaki n tain te Nu Tetemanti b'a te “Bentekota”. ni katoa taai ngkana e a kaan banen bongin te aumeaang ngkana kam moana taian ami uita, ngkana kam karaoa te Toa ae M'anganikaai. #23.16 Te Toa are M'angani kaai: N te boki n Ebera e koreaki ae e kaangai, “Te Toa are Booboti (ao e mena naba n 34.22), are bon te kabanea n tai i bukin uaan taian uita ao taian uanikai i m'aain rokon te karau ni banen bongin maiaki. Ma arana ae b'ainaki riki bon “Te Toa are m'aangan Kaai”.
17A na riai n roko ami mm'aane n te Toa aei ni katoa ririki n taromauriai.
18Kam na aki anga te kariki ae itinaki ngkana kam kareana te man nako iu. Ao kam na kakoaua raoi b'a e na bue raoi nenean te man n te bong naba anne.
19Kam na katoa ririki ni uota m'akoron ami moa ni uaa aika kabanea n raoiroi nakon te tabo n taromauri.
Kam na aki kaburoa te bun ni kooti i nanon mirikin tinana.
Te Berita ao te Kauring
E taku te UEA:
20N na kanakoa te anera b'a e na kaawakiningkami ma ni kairiingkami nakon te aba are I a kaman anganingkami. 21Ongotaeka raoi nakon b'aai nako akana e na tuangkami te anera, b'a I anganna te m'aaka ni kabane, ao e bon aki konaa ni kariaia te kamangao. 22N na riki b'a te kairiribai ae tiritiri nakoia ami kairiribai ngkana kam ongotaeka raoi nako ina. 23E na kairingkami au anera nakon abaia kaain Amora, Eta, Berita, Kanaan, Iwa ao Iebuti, ao N na kamaunaiia nako. 24Kam na aki taromauri antiia ke ni kakairi n aia katei. Ma, kam na kamaunai aia bouannanti ma ni kamaenikuni aia atiibu ake taian banna.
25Kam na ti taromauriai, Ngai ae te UEA ae Atuami! N na kakab'aiai ngkami n taian am'arake ao te ran ao N na kakorakorai ngkami. 26A na kariki buumi ni bungiia natiia aika a marurung, ao a na bane n anaanau maiuia aomata ni kabane.
27N na kakamaakuia botannaomata aikai ma ni kamangaongaoiia ami kairiribai n te aro are a na biri nako mai roumi. 28N na kakamakuia kaain Iwa, kaain Kanaan, ao kaain Eta ngkana kam niiniia. 29Ma I aki karaoi baikai ni kabane n te moan ririki, i bukina b'a e na riki ni mate te aba aei iai, ao a na mena maan aika aki manana n taabo nako. 30N na bon kakioia nako ami kairiribai teutana i mwiin teutana ao n angan abami ana tai ni karikirakea korakorana n taua te aba. 31N na nooria raoi b'a e roko tian abami n Taari are Uraura#23.31 Taari are Uraura: N Ebera, E nanonaki ikai te Marawa are Aqaba, ao ni kananonaki karababan abaia mai meangmainikun Taari are Uraura. (Noora te taeka ane n 13.18). nakon te Karaanga are Iuberetiti nakon Taari are te Mereterenian n toki n te rereua. N na karaoiko b'a ko na konaiia aomata ake a maekana ikekei, ao ko na kakioia nako. 32Ma kam na aki karaoa te boraraoi teuana ma ngaiia ke ma antiia. 33Kam na aki katikuia i abami. B'a ane ana kam'aneingkami iai ni karaoi buure aika a kaitaraai ao kam na taromauriia antiia iai.
Избрани в момента:
Te Otinako 23: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте