Tơlơi Tơbiă 10
10
Tơlơi Răm Ruă Tal Sapăn: Kơtop
1Yêhôwa pơhiăp hăng Môis: “Nao bưp Pharaôn bĕ, yua kơ kâo hmâo pơkhăng pran jua ñu laih anŭn pran jua ƀing ding kơna ñu kiăng kơ kâo dưi pơrơđah khul gru mơsêh mơyang tơ̆ng krah gơñu, 2laih anŭn kiăng kơ ih ruai glaĭ kơ ană tơčo ih hơdôm bruă Kâo hmâo ngă kơ ană plei pla Êjip, wơ̆t kơ khul gru mơsêh mơyang Kâo hmâo ngă laih tơ̆ng krah ƀing gơñu, yua mơ̆ng anŭn ƀing gih thâo Kâo jing Yêhôwa.”
3Môis hăng Arôn nao pơ Pharaôn laih anŭn laĭ: “Yêhôwa jing Ơi Adai kơ ană Hêbrơ laĭ: ‘Ih ƀu luă gŭ ƀơi anăp kâo hơdôm sui dơ̆ng? Brơi bĕ ană plei pla kâo nao kiăng kơ gơñu kơkuh pơpŭ kơ kâo. 4Tơdah ih ƀu brơi ană plei pla kâo đuaĭ nao, anai nê, hrơi pơgi kâo či pơkiaŏ nao kơtop mŭt amăng čar ih bă blai. 5Kơtop či gom lŏn čar tơl arăng ƀu thâo ƀuh lŏn tơnah dơ̆ng ôh. Gơñu či ƀơ̆ng abih bang mơnơ̆ng ăt dŏ glaĭ mơ̆ng ia hơjan pler taih. Gơñu ăt ƀơ̆ng abih bang phŭn kơyâo čăt amăng hmua ƀing gih, 6gơñu či mŭt bă sang pơtao ih, abih bang sang ƀing ding kơna ih laih anŭn abih bang sang ƀing Êjip. Anai jing tơlơi ama ih, ơi ih laih anŭn ơi adon ih aka ƀuh djơ̆ ôh mơ̆ng hrơi gơñu hmâo ƀơi lŏn tơnah truh kơ hrơi anai.’” Giơ̆ng kơ pơhiăp, Môis tơbiă đuaĭ mơ̆ng sang Pharaôn.
7Ƀing ding kơna Pharaôn laĭ: “Hơdôm sui dơ̆ng pô anai či jing čơđong ƀơč kơ ƀing ta? Brơi bĕ ană plei pla Israel nao kiăng gơñu kơkuh pơpŭ kơ Yêhôwa Ơi Adai gơñu. Ih aka ƀu thâo ôh hă čar Êjip hlăk hmâo tơlơi răm rai?” 8Tui anŭn arăng nao iâu Môis hăng Arôn nao pơ Pharaôn dơ̆ng. Pơtao laĭ kơ gơñu: “Nao bĕ, kơkuh pơpŭ kơ Yêhôwa Ơi Adai ƀing gih. Samơ̆ hlơi ƀing či nao?” 9Môis laĭ glaĭ: “Ƀing gơmơi či nao hăng abih bang muai tha dra dăm laih anŭn khul triu, khul rơmo, yua kơ ƀing gơmơi khŏm pơkra hrơi phĕt kơ Yêhôwa.” 10Pharaôn laĭ: “Tui anŭn, brơi Yêhôwa dŏ bĕ hăng ƀing gih nanao, ƀing gih či thâo kâo či brơi ƀing gih laih anŭn ană bă ƀing gih tơbiă nao hrŏm hơbĭt mơ̆! Sĭt yơh, ƀing gih hmâo tơlơi pơmĭn sat ƀai! 11Ƀu dưi ôh! kơnơ̆ng kơ đah rơkơi ƀing gih đôč nao laih anŭn kơkuh pơpŭ kơ Yêhôwa, yua kơ anŭn jing tơlơi ƀing gih hmâo rơkâo laih.” Giơ̆ng gơñu puh pơđuaĭ Môis hăng Arôn mơ̆ng Pharaôn.
12Yêhôwa pơhiăp hăng Môis: “Brơi ih yơr bĕ tơngan ƀơi čar Êjip, kiăng brơi kơtop rai bă blai amăng čar, ƀơ̆ng abih bang kơyâo rơ̆k laih anŭn abih bang mơnơ̆ng mơnuă ăt dŏ glaĭ mơ̆ng hơjan pler.” 13Tui anŭn Môis yơr đĭ gai jra ƀơi Êjip. Yêhôwa ba angĭn mơ̆ng ngŏ thut amăng čar Êjip hrơi hăng mlam amăng hrơi anŭn; mơguah hrơi tơdơi, angĭn mơ̆ng gah ngŏ ba rai kơtop truh. 14#Bơrđ 9:2-3.Kơtop bă blai djŏp čar Êjip laih anŭn gơñu plĕ trŭn amăng abih čar anŭn. Gơñu lu biă mă ƀu thâo yap ôh; hlâo dih aka hmâo djơ̆ ôh laih anŭn tơdơi kŏn hmâo lơi hrup hăng anŭn. 15Gơñu gom abih čar tơl lŏn jing hĭ jŭ tĭt, gơñu ƀơ̆ng abih bang rơ̆k kơyâo pơ hmua laih anŭn khul boh troh mơ̆ng hơjan pler pioh glaĭ. Djŏp čar Êjip phŭn kơyâo ƀôdah rơ̆k tơk pơ hmua đơsĕt ƀu hmâo dŏ glaĭ ôh.
16Pharaôn jač mač iâu Môis hăng Arôn rai laih anŭn laĭ: “Kâo hmâo ngă soh hăng Yêhôwa Ơi Adai ƀing gih laih anŭn hăng ƀing gih dơ̆ng mơ̆n. 17Ră anai kâo rơkâo kơ ƀing gih, pap brơi tơlơi soh kâo, kơnơ̆ng sa wơ̆t anai đôč, iâu laĭ kơ Yêhôwa Ơi Adai ƀing gih, kiăng kơ Ñu mă hĭ mơ̆ng kâo tơlơi răm ruă djai mơnuih anai.” 18Môis tơbiă mơ̆ng sang Pharaôn laih anŭn iâu laĭ kơ Yêhôwa. 19Yêhôwa ba rai angĭn mơ̆ng gah yŭ kơtang biă mă pưh ba hĭ abih bang kơtop laih anŭn pơlĕ hĭ ƀing gơñu amăng Ia Rơsĭ Mriah.#10:19 Boh hră phŭn: Ia Rơsĭ Trang Bô. Amăng abih čar Êjip ƀu hmâo sa drơi kơtop dŏ glaĭ dơ̆ng ôh. 20Samơ̆ Yêhôwa ngă brơi pran jua Pharaôn khăng kơpĭl, ñu ƀu brơi ană plei pla Israel đuaĭ nao ôh.
Tơlơi răm ruă tal dua rơpăn: Tơlơi kơnăm mơmŏt tĭt
21Yêhôwa pơhiăp hăng Môis: “Yơr đĭ bĕ tơngan ih pơ adai kiăng kơ tơlơi kơnăm mơmŏt gom hĭ čar Êjip, tơlơi kơnăm mơmŏt tơl arăng dưi ruaih.” 22#Adoh 105:28; Bơrđ 16:10.Tui anŭn Môis yơr đĭ tơngan pơ adai, tơlơi kơnăm mơmŏt gom hĭ abih bang čar Êjip amăng klâo hrơi. 23Amăng klâo hrơi anŭn arăng ƀu thâo ƀuh tơdruă ôh, ƀu hmâo hlơi dưi đuaĭ mơ̆ng anih ñu. Samơ̆ pơpă anih ană plei pla Israel dŏ, pơ anŭn hmâo tơlơi bơngač.
24Pharaôn iâu Môis rai laih anŭn laĭ: “Nao bĕ kơkuh pơpŭ kơ Yêhôwa. Ană bă ƀing gih ăt nao hăng ƀing gih mơ̆n, kơnơ̆ng pioh glaĭ khul triu laih anŭn rơmo ƀing gih đôč.” 25Samơ̆ Môis laĭ glaĭ: “Ih khŏm brơi kơ ƀing gơmơi hmâo hlô mơnơ̆ng ngă yang laih anŭn mơnơ̆ng pơyơr kiăng kơ ngă yang čuh pơyơr đĭ kơ Yêhôwa Ơi Adai gơmơi. 26Khul hlô mơnơ̆ng ƀing gơmơi ăt khŏm tui gơmơi, ƀu pioh glaĭ ôh sa pŏk čôp. Ƀing gơmơi či yua gơñu kiăng kơkuh pơpŭ kơ Yêhôwa Ơi Adai ƀing gơmơi, tơ truh pơ anih anŭn kah ƀing gơmơi dưi thâo mơnơ̆ng hơgĕt khŏm yua kiăng kơkuh pơpŭ kơ Yêhôwa.” 27Samơ̆ Yêhôwa pơkhăng pran jua Pharaôn, ƀu brơi ană plei pla Israel tơbiă nao ôh. 28Pharaôn laĭ kơ Môis: “Đuaĭ bĕ mơ̆ng ƀô̆ mơta kâo. Răng bĕ! Anăm lăng ƀô̆ mơta kâo dơ̆ng ôh; yua kơ hrơi pă ih ƀuh ƀô̆ mơta kâo, ih či djai.” 29Môis laĭ: “Djơ̆ kar hăng ih laĭ, kâo ƀu či ƀuh ƀô̆ mơta ih dơ̆ng ôh.”
Избрани в момента:
Tơlơi Tơbiă 10: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.