Tơlơi Tơbiă 5
5
Môis hăng Arôn Nao Bưp Pharaôn
1Tơdơi kơ anŭn, Môis hăng Arôn nao ruai kơ Pharaôn tui anai: “Yêhôwa Ơi Adai kơ ƀing Israel hmâo laĭ: ‘Brơi bĕ ană plei pla kâo nao kiăng kơ gơñu pơkra mơnơ̆ng kơkuh pơpŭ kơ kâo amăng tơdrŏn har.’” 2Samơ̆ Pharaôn laĭ glaĭ: “Hlơi Yêhôwa jing kiăng kơ kâo gưt asăp ñu laih anŭn brơi ană Israel tơbiă nao? Kâo ƀu thâo krăn Yêhôwa ôh laih anŭn kâo kŏn či brơi ƀing Israel nao lơi”. 3Môis hăng Arôn laĭ: “Ơi Adai kơ ƀing Hêbrơ hmâo pơƀuh laih kơ ƀing gơmơi. Rơkâo kơ ih brơi kơ gơmơi nao klâo hrơi rơbat amăng tơdrŏn har, kiăng pơyơr mơnơ̆ng ngă yang kơ Yêhôwa, Ơi Adai gơmơi, hwĭ kơ Ñu tuh trŭn tơlơi ruă kheng ƀôdah đao gưm kơ ƀing gơmơi.” 4Pơtao Êjip laĭ kơ gơñu: “Ơ Môis laih anŭn Arôn, hyư̆m ƀing gih ngă kơ ană plei pla lui hĭ bruă? Nao bĕ ngă bruă ƀing gih!” 5Pharaôn laĭ dơ̆ng: “Anai nê, ană plei pla amăng čar anai jing lu biă mă, samơ̆ dua ƀing gih pŭng kơ kiăng brơi gơñu pơdơi bruă gơñu hă”.
Pharaôn pơđĭ tơlơi tơnap kơ ƀing ană plei pla
6Amăng hrơi anŭn mơtam, Pharaôn pơđar kơ ƀing khua wai bruă laih anŭn ƀing khua wai lăng ană plei pla hăng laĭ: 7“Ƀing gih anăm pha brơi dơ̆ng ôh adrăng kơ ană plei pla ngă lŏn čeh kar hăng hlâo adih. Brơi gơñu nao hơduah mă bĕ adrăng kơ gơñu pô. 8Brơi ƀing gih pơtă kơ gơñu ngă lŏn čeh ăt mơdum hăng gơñu ngă hlâo mơ̆n, anăm ƀing gih pơhrŏ hĭ ôh. Yua kơ rơhông bruă yơh gơñu pơjak tơdruă gơñu: ‘Nao pơyơr bĕ mơnơ̆ng ngă yang kơ Ơi Adai ƀing ta!’ 9Jao thim bĕ bruă kơtraŏ kơ gơñu kiăng kơ yua kơ tơlơi pơgŭn bruă mă, gơñu ƀu pơmĭn nao ôh kơ khul tơlơi arăng pơhiăp ƀlor anŭn.”
10Ƀing khua wai bruă laih anŭn ƀing khua wai lăng laĭ kơ ană plei pla: “Tui anai tơlơi Pharaôn laĭ: ‘Kâo ƀu pha dơ̆ng tah adrăng kơ ƀing gih, 11nao hơduah mă bĕ gih pô adrăng pơpă anih ƀing gih dưi ƀuh; samơ̆ ƀu pơhrŏ ôh bruă gih.’” 12Tui anŭn ană plei pla hyu tar ƀar amăng čar Êjip kiăng duñ akŏ adrăng pơala kơ adrăng. 13Ƀing khua bruă pơjač kơ gơñu hăng laĭ: “Ngă pơgiơ̆ng bĕ bruă ƀing gih, rĭm hrơi khŏm ngă tum mrô hmâo pơkă laih kar hăng hlăk pha brơi adrăng.” 14Ƀing khua wai bruă mơnuih Israel yua mơ̆ng khua wai bruă Pharaôn hmâo dưm brơi kiăng kơ lăng sŭ ƀing mơnuih Israel pơkŏn, arăng taih gơñu hăng tơña gơñu: “Yua hơgĕt tŏm brôi laih anŭn hrơi anai ƀing gih ƀu ngă tum ôh mrô lŏn čeh hmâo pơkă brơi laih hrup hăng hlâo dih?”
15Ƀing khua wai lăng mơnuih Israel nao ur rơkâo kơ Pharaôn: “Hyư̆m ih ngă tui anŭn kơ ƀing ding kơna ih? 16Arăng ƀu pha ôh adrăng kơ ƀing ding kơna ih, samơ̆ arăng ăt pơgŏ: ‘Ngă bĕ lŏn čeh’. Anai nê, ding kơna ih arăng hmâo taih amang, samơ̆ tơlơi soh jing yua mơ̆ng ană plei pla ih pô soh.” 17Pơtao laĭ glaĭ: “Ƀing gih alah! Ƀing gih alah! Yua kơ anŭn ƀing gih laĭ: ‘Brơi ƀing ta nao bĕ pơyơr mơnơ̆ng ngă yang kơ Yêhôwa!’ 18Ră anai, nao mă bruă bĕ; arăng ƀu či pha adrăng kơ ƀing gih ôh, samơ̆ ƀing gih ăt khŏm ngă tum mrô lŏn čeh arăng brơi kơ ƀing gih ngă hlâo mơ̆n.”
Tơlơi ƀing ană Israel brŏk ƀuah
19Ƀing khua wai ƀing ană plei pla Israel ƀuh arăng pơtơnap gơñu tơdang arăng laĭ: “Ƀing gih ƀu dưi pơhrŏ hĭ ôh mrô lŏn čeh hmâo pơkă laih rĭm hrơi.” 20Tơ gơñu tơbiă mơ̆ng sang Pharaôn, gơñu bưp Môis hăng Arôn hlăk dŏ tơguan ƀơi anŭn. 21Gơñu laĭ kơ Môis hăng Arôn: “Ƀing gih hmâo ngă brơi gơmơi jing hĭ mơnơ̆ng bơrơmŭt ƀơi anăp Pharaôn laih anŭn ƀing ding kơna pơtao, hmâo jao laih đao gưm amăng tơngan gơñu kiăng kơ pơdjai ƀing gơmơi. Rơkâo Yêhôwa kơsem lăng hăng phat kơđi kơ dua gih!”
22Môis wơ̆t glaĭ hăng pơhiăp hăng Yêhôwa: “Ơ Khua Yang! Yua hơgĕt Ih ngă pơtơnap ƀing ană plei pla anai? Yua hơgĕt Ih hmâo pơđar kâo rai pơ anai? 23Čơdơ̆ng mơ̆ng kâo bưp Pharaôn laih anŭn hăng anăn Ih kâo pơhiăp, samơ̆ pơtao anŭn ngă pơtơnap ană plei pla anai, laih anŭn Ih ƀu pơklaih ôh ană pla ih.”
Избрани в момента:
Tơlơi Tơbiă 5: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.