Tơlơi Tơbiă 6
6
Ơi Adai ƀuăn či pơklaih ƀing Israel
1Yêhôwa laĭ kơ Môis: “Ră anai ih či ƀuh tơlơi Kâo či ngă kơ Pharaôn. Sĭt biă mă, hăng tơngan kơtang Kâo, pơtao anŭn či brơi ƀing ană Israel tơbiă nao; hăng tơngan kơtang Kâo, pơtao anŭn či puh pơđuaĭ ƀing gơñu tơbiă mơ̆ng čar ñu.”
2 #
Čơd 17:1; 28:3; 35:11; Tơb 3:13-15. Ơi Adai laĭ hăng Môis dơ̆ng: “Kâo jing Yêhôwa. 3Kâo hmâo pơƀuh brơi laih kơ Abraham, Isak laih anŭn Yakôp kơ tơlơi Kâo jing Ơi Adai Dưi Kơtang,#6:3 Boh hră phŭn jing: El Sadai. samơ̆ Kâo akă bơrơđah ôh kơ gơñu thâo anăn Kâo jing Yêhôwa. 4Kâo hmâo pơjing laih kơnol pơgop hăng gơñu, kiăng brơi kơ gơñu čar Kanaan, jing čar gơñu hmâo dŏ kar hăng ƀing tuai. 5Kâo ăt hmư̆ mơ̆n tơlơi ur krao ană plei pla Israel yua kơ ƀing Êjip pơjing gơñu jing hlŭn, laih anŭn Kâo hơdơr glaĭ kơ tơlơi kơnol pơgop Kâo. 6Yua kơ anŭn, brơi ih laĭ kơ ană plei pla Israel tui anai: ‘Kâo jing Yêhôwa Kâo či ba ƀing gih rơngai mơ̆ng tơlơi kơtraŏ ƀing Êjip laih anŭn pơklaih ƀing gih mơ̆ng tơlơi jing hlŭn. Kâo či yơr đĭ tơngan, hăng tơlơi phat kơđi prŏng Kâo song mă ƀing gih. 7Kâo či yap ƀing gih jing ană plei pla Kâo, laih anŭn Kâo či jing Ơi Adai kơ ƀing gih. Ƀing gih či thâo Kâo jing Yêhôwa Ơi Adai kơ ƀing gih, Pô hmâo pơrơngai ƀing gih mơ̆ng tơlơi kơtraŏ ƀing Êjip. 8Kâo či ba ƀing gih mŭt amăng lŏn čar Kâo hmâo ƀuăn pha brơi kơ Abraham, Isak, Yakôp, laih anŭn pha brơi čar anŭn kơ ƀing gih ngă kong ngăn: Kâo jing Yêhôwa.’” 9Môis laĭ abih tơlơi anŭn kơ ană plei pla Israel, samơ̆ gơñu ƀu hmư̆ Môis ôh, yua kơ bơngăt jua gơñu tơdu laih anŭn tơlơi jing hlŭn kơtraŏ biă mă.
10Yêhôwa pơhiăp hăng Môis: 11“Nao laĭ bĕ kơ Pharaôn pơtao Êjip. Kiăng kơ pơtao anŭn brơi ană plei pla Israel tơbiă mơ̆ng čar ñu” 12Samơ̆ Môis laĭ glaĭ kơ Yêhôwa: “Ơ Khua Yang, kâo ƀu jing sa čô mơnuih rơgơi pơhiăp ôh; ană plei pla Israel ăt ƀu či hmư̆ kâo ôh, hyư̆m pơtao Pharaôn dưi hmư̆ kâo lĕ?” 13Yêhôwa laĭ glaĭ kơ Môis hăng Arôn, pơđar dua gơñu khŏm nao pơ ană plei pla Israel laih anŭn Pharaôn, pơtao Êjip, kiăng ba ană plei pla Israel tơbiă mơ̆ng čar Êjip.
Kơnŭng djuai Ruben
14Anai jing khua kơnŭng djuai kơ ƀing kơnŭng djuai Israel: Ƀing ană đah rơkơi Ruben, ană kơčoa Israel, jing: Hanôk, Palu, Hêsron, laih anŭn Karmi. Anŭn jing kơnŭng djuai Ruben. 15Ƀing ană đah rơkơi Simêôn jing: Jêmuêl, Jamin, Ôhat, Jakin, Sôhar, laih anŭn Saul jing ană mơ̆ng bơnai ñu mơnuih Kanaan. Anŭn jing kơnŭng djuai Simêôn.
Kơnŭng djuai Lêwi, ơi adon kơ Môis hăng Arôn
16 #
Yap 3:17-20; 26:57-58; I Čih 6:16-19. Anai jing anăn ƀing ană đah rơkơi Lêwi, tui hăng kơnŭng djuai gơñu: Gersôn, Kôhat, laih anŭn Mêrari. Lêwi dŏ hơdip hmâo sa rơtuh klâo pluh tơjuh thŭn. 17Ƀing ană đah rơkơi Gersôn, tui hăng rĭm kơnŭng gơñu: Lipni laih anŭn Simei. 18Ƀing ană đah rơkơi Kôhat: Amram, Ishar, Hêbron, laih anŭn Usiêl. Kôhat dŏ hơdip hmâo sa rơtuh klâo pluh klâo thŭn. 19Ƀing ană đah rơkơi Mêrari: Mahli laih anŭn Musi. Anŭn jing ƀing kơnŭng djuai Lêwi, tui hăng kơnŭng djuai gơñu.
20Amram dŏ kơ HʼJôkêbet, adơi đah kơmơi ama ñu pô, laih anŭn gơ̆ tơkeng kơ Arôn hăng Môis. Amram dŏ hơdip hmâo sa rơtuh klâo pluh tơjuh thŭn. 21Ƀing ană đah rơkơi Ishar: Kôra, Nêphek, laih anŭn Sikri. 22Ƀing ană đah rơkơi Usiêl: Misaêl, Êlsaphan, laih anŭn Sithri. 23Arôn dŏ kơ HʼÊlisêba ană đah kơmơi Aminadap, adơi Nahsôn; gơ̆ tơkeng kơ ñu Nadap, Abihu, Êlêasar, laih anŭn Ithamar. 24Ƀing ană đah rơkơi Kôra: Asir, Êlkana, laih anŭn Abiasap. Anŭn jing kơnŭng djuai Kôra.
25Êlêasar, ană đah rơkơi Arôn, dŏ bơnai sa čô amăng ƀing ană đah kơmơi Putiel laih anŭn gơ̆ tơkeng kơ ñu Phinêas. Anai yơh jing ƀing khua kơnŭng djuai amăng ƀing Lêwi tui hăng kơnŭng djuai gơñu.
26Arôn hăng Môis yơh jing mơnuih Yêhôwa hmâo pơđar kơ gơñu: “Ba tơbiă bĕ ƀing ană plei pla Israel mơ̆ng čar Êjip tui hăng rĭm kơnŭng djuai gơñu.” 27Ăt Môis hăng Arôn mơ̆n hmâo pơhiăp hăng Pharaôn pơtao Êjip kơ bruă ba ană plei pla Israel tơbiă mơ̆ng čar Êjip.
28Amăng hrơi Yêhôwa pơhiăp hăng Môis amăng čar Êjip, 29Ñu hmâo laĭ hăng Môis: “Kâo jing Yêhôwa. Ruai glaĭ bĕ kơ Pharaôn, pơtao Êjip abih tơlơi Kâo hmâo pơhiăp hăng ih.” 30Samơ̆ Môis laĭ kơ Yêhôwa: “Anai nê, kâo ƀu jing mơnuih rơgơi pơhiăp ôh, hyư̆m Pharaôn dưi hmư̆ kâo lĕ?”
Избрани в момента:
Tơlơi Tơbiă 6: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.