Tơlơi Tơbiă 7
7
Ơi Adai pơkiaŏ Môis nao bưp Pharaôn dơ̆ng
1Yêhôwa pơhiăp hăng Môis: “Anai nê, kâo pơjing ih hrup hăng Ơi Adai kơ Pharaôn; bơ kơ Arôn ayŏng ih či jing mơnuih pơhiăp pơala#7:1 Boh hră phŭn: pô laĭ lui hlâo. brơi kơ ih. 2Brơi ih ruai glaĭ abih tơlơi Kâo hmâo pơtă pơtô kơ ih; laih anŭn Arôn ayŏng ih či ruai hăng Pharaôn kiăng kơ ñu brơi ană plei pla Israel tơbiă mơ̆ng čar Êjip. 3#Bruă 7:36.Samơ̆ kâo či ngă brơi Pharaôn khăng hĭ pran jua, wơ̆t dah kâo thim đĭ khul tơlơi mơsêh mơyang, tơlơi yom pơphan amăng čar Êjip, 4Samơ̆ Pharaôn ăt ƀu či hmư̆ ƀing gih ôh. Kâo či yơr tơngan phat kơđi prŏng pơ čar Êjip, kiăng ba tơbiă tơhan kâo, jing ană plei pla Israel tơbiă mơ̆ng čar anŭn. 5Tơ kâo yơr tơngan pơkơdơ̆ng glaĭ ƀing Êjip kiăng ba ană plei pla Israel tơbiă mơ̆ng anŭn, ƀing Êjip či thâo kâo jing Yêhôwa” 6Môis hăng Arôn ngă tui hăng boh pơhiăp Yêhôwa hmâo pơtă laih kơ gơñu. 7Hlăk gơñu nao bưp Pharaôn, Môis hmâo sa păn pluh thŭn, Arôn hmâo sapăn pluh klâo thŭn.
Gai Jra Arôn jing hĭ ala
8Yêhôwa pơhiăp hăng Môis laih anŭn Arôn: 9“Tơdah Pharaôn laĭ kơ ƀing gih: ‘Ngă bĕ tơlơi mơsêh mơyang,’ brơi ih laĭ kơ Arôn tui anai: ‘Mă gai jra ih laih anŭn glŏm ñu ƀơi anăp pơtao Pharaôn, ñu či jing sa drơi ala.’” 10Tui anŭn Môis hăng Arôn nao ƀơi anăp Pharaôn laih anŭn ngă tui hăng Yêhôwa hmâo pơtă laih. Arôn glŏm gai jra ñu ƀơi anăp Pharaôn hăng ƀing ding kơna ñu, gai jra jing hĭ sa drơi ala. 11Pharaôn iâu pơƀŭt ƀing kơhnâo, ƀing pơjâu laih anŭn ƀing pơjâu čar Êjip rai, gơñu ăt yua pơjâu ngă kar hăng anŭn mơ̆n. 12Rĭm čô glŏm gai jra gơñu, gai jra gơñu ăt jing hĭ ala mơ̆n. Samơ̆ gai jra Arôn lun hĭ gai jra gơñu. 13Pran jua Pharaôn ăt dŏ khăng kơpĭl, ƀu kiăng hmư̆ Môis hăng Arôn, djơ̆ kar hăng tơlơi pơhiăp Yêhôwa hmâo laĭ.
Tơlơi Răm Ruă Tal Sa: Ia Krong Jing Hĭ Drah
14Yêhôwa pơhiăp hăng Môis: “Pran jua Pharaôn khăng kơpĭl laih. Ñu hơngah ƀu brơi ană plei pla Israel đuaĭ nao ôh. 15Brơi ih nao bưp Pharaôn ƀơi mơguah hlăk ñu tơbiă nao pơ hang ia krong. Brơi ih tơguan ñu ƀơi hang ia krong laih anŭn djă gai jra hlâo anŭn hmâo blư̆ hĭ laih jing ala. 16Brơi ih laĭ kơ pơtao Pharaôn, Yêhôwa jing Ơi Adai kơ ƀing Hêbrơ hmâo pơkiaŏ kâo rai bưp ih laih anŭn laĭ hăng ih: ‘Brơi bĕ ană plei pla kâo tơbiă nao kiăng kơ gơñu kơkuh pơpŭ kơ kâo amăng tơdrŏn har, samơ̆ truh pơ ră anai ih ăt ƀu tui gưt ôh.’ 17#Bơrđ 16:4.Yua kơ anŭn, Yêhôwa laĭ: ‘Mơ̆ng bruă anai ih či thâo kâo jing Yêhôwa.’ Anai nê, kâo či taih ia krong hăng gai jra kâo amăng tơngan kâo, laih anŭn ia či jing hĭ drah. 18Akan amăng ia krong či djai, hnoh krong či ƀâu brŭ, ƀing Êjip ƀu či khĭn mơñum dơ̆ng ôh ia krong anŭn.”
19Yêhôwa pơhiăp hăng Môis: “Laĭ bĕ kơ Arôn: ‘Mă bĕ gai jra ih laih anŭn yơr tơngan ih ƀơi phŭn hlâo ia čar Êjip, jing khul ia krong prŏng, ia krong anĕt, dơnao ia anĕt, laih anŭn dơnao ia prŏng, kiăng kơ ia anŭn pơblih jing hĭ drah. Drah či hmâo pơ djŏp djang anih amăng čar Êjip, wơ̆t kơ amăng khul get ngă hăng kơyâo, hăng boh pơtâo.’” 20Arôn hăng Môis ngă tui hăng tơlơi pơhiăp Yêhôwa hmâo pơtă. Ƀơi anăp Pharaôn laih anŭn ƀing ding kơna ñu, Arôn yơr đĭ gai jra laih anŭn taih ia krong Nil, abih bang ia krong leng kơ pơblih jing hĭ drah. 21Akan amăng ia krong Nil djai, hnoh krong jing hĭ ƀâu brŭ, ƀing Êjip ƀu dưi mơñum dơ̆ng ôh ia krong. Amăng čar Êjip djŏp anih leng kơ hmâo drah. 22Samơ̆ ƀing pơjâu čar Êjip ăt yua pơjâu ngă kar hăng anŭn mơ̆n anŭn yơh pran jua Pharaôn ăt dŏ khăng kơpĭl, ƀu hmư̆ tơlơi pơhiăp Môis hăng Arôn, djơ̆ kar hăng tơlơi pơhiăp Yêhôwa hmâo laĭ laih. 23Pharaôn wơ̆t glaĭ pơ sang pơtao, ñu ƀu hyơ̆k bơngơ̆t ôh kơ tơlơi anŭn. 24Bơ kơ abih bang ană plei pla Êjip, gơñu klơi ia dơmun kơtuai hang ia krong Nil kiăng kơ hơduah ia yua kơ gơñu ƀu dưi mơñum ôh ia krong.
25Bruă anai hmâo truh tơjuh hrơi yap mơ̆ng Yêhôwa brơi tơlơi răm ruă ƀơi ia krong Nil.
Избрани в момента:
Tơlơi Tơbiă 7: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.