Čơdơ̆ng Phŭn 28
28
Isak pơđar Yakôp nao pơ Padan Aram
1Isak iâu Yakôp rai, hơơč mơyun laih anŭn pơtă ñu tui anai: “Ih ƀu dưi dŏ sa čô đah kơmơi Kanaan ôh. 2Samơ̆ brơi tơgŭ tañ bĕ, nao pơ Padan Aram, mŭt amăng sang Bêthuel, ơi ih, laih anŭn pơ anŭn ih či mă dŏ sa čô mơnuih amăng ƀing ană đah kơmơi wa ih Laban ngă bơnai. 3Rơkâo kơ Ơi Adai Dưi Kơtang pha brơi tơlơi mơyun hiam kơ ih, ngă brơi ană tơčo ih lar hyu lu biă mă laih anŭn jing hĭ sa tơpul mơnuih hmâo lu djuai mơnuih. 4Rơkâo Ñu pha brơi ih laih anŭn kơnŭng djuai ih tơlơi mơyun hiam Abraham kiăng ih dưi mă tŭ lŏn čar ih hlăk dŏ, jing lŏn čar Ơi Adai hmâo brơi laih kơ Abraham!”#Čơd 17:4-8. 5Tui anŭn, Isak pơkiaŏ Yakôp nao pơ Padan Aram, mŭt amăng sang Laban, ană đah rơkơi Bêthuel mơnuih Aram, jing ayŏng kơ HʼRêbêka, amĭ Yakôp hăng Êsâo.
Êsâo mă dŏ ană đah kơmơi Ismael
6Êsâo ƀuh Isak hmâo hơơč mơyun brơi kơ Yakôp laih anŭn pơkiaŏ nao pơ Padan Aram kiăng hơduah bơnai, laih anŭn amăng mông ñu hơơč mơyun ama ñu pơtă: “Ih ƀu dưi mă dŏ ƀing đah kơmơi Kanaan ôh.” 7Ñu ăt ƀuh Yakôp gưt hiăp amĭ ama nao pơ Padan Aram. 8Êsâo thâo ƀing hơđŭ Kanaan ƀu bơmơak Isak, ama ñu ôh, 9yua kơ anŭn yơh gah rơngiao kơ dua čô bơnai ñu hmâo laih, Êsâo nao pơ sang Ismael laih anŭn mă dŏ HʼMahalat, ană đah kơmơi Ismael, tơčo kơ Abraham laih anŭn adơi kơ Nêbaôt.
Tơlơi Yakôp Rơpơi Pơ Bêthel
10Yakôp đuaĭ mơ̆ng Bêrsêba nao pơ Čaran. 11Ñu nao pơ sa boh anih laih anŭn pơdơi mlam pơ anŭn yua kơ yang hrơi lĕ laih. Ñu mă sa boh pơtâo kiăng đăl akŏ ñu laih anŭn đih pĭt hĭ pơ anŭn. 12Ñu rơpơi ƀuh sa ƀĕ rơñan glong mơ̆ng lŏn truh pơ adai laih anŭn ƀing ling jang Ơi Adai đĭ, trŭn ƀơi rơñan anŭn.#Yô 1:51. 13Anai nê, Yêhôwa dŏ dơ̆ng gah anăp ñu#28:13 Dưi pơblang dơ̆ng mơ̆n: dơ̆ng ƀơi rơñan. laih anŭn laĭ: “Kâo jing Ơi Adai kơ Abraham, ơi adon ih, ăt jing Ơi Adai kơ Isak mơ̆n. Kâo či brơi kơ ih laih anŭn kơnŭng djuai ih lŏn ih hlăk đih pĭt anai.#Čơd 13:14-15. 14Kơnŭng djuai ih či lu kar hăng čuah ƀơi lŏn tơnah, blai hyu djŏp djang anih gah yŭ, gah ngŏ, gah kơdư, gah dơnŭng, laih anŭn abih kơnŭng djuai mơnuih amăng lŏn tơnah či yua mơ̆ng ih hăng kơnŭng djuai ih yơh gơñu dưi hmâo hĭ tơlơi mơyun hiam.#Čơd 12:3; 22:18. 15Anai nê, Kâo dŏ hrŏm hăng ih, pơpă ih nao, Kâo či kiaŏ tui wai lăng ih pơ anŭn, laih anŭn ba ih glaĭ pơ čar anai. Kâo ƀu lui ih ôh tơl Kâo hmâo ngă giơ̆ng laih abih tơlơi Kâo hmâo ƀuăn laih hăng ih.” 16Yakôp mơdưh mơ̆ng pĭt laih anŭn laĭ: “Sĭt Yêhôwa hlăk dŏ pơ anih anai samơ̆ kâo ƀu thâo ôh!” 17Ñu čơdơ̆ng hwĭ laih anŭn laĭ: “Anih anai năng lăp kơ hwĭ biă mă yơh! Anai yơh jing sang Ơi Adai, jing amăng jang kơ plei hiam!”
18Ưm mơguah hrơi tơdơi, Yakôp tơgŭ mơ̆ng ưm, mă boh pơtâo ñu đăl akŏ ñu pioh pơdơ̆ng đĭ ngă tơmeh laih anŭn tuh ia ƀâu mơngưi ƀơi akŏ boh pơtâo anŭn. 19Ñu pơanăn anih anai jing Bêthel;#28:19 Bêthel: Boh hră anai amăng tơlơi Hêbrơ kiăng pia: “Sang khăn” ƀôdah “Sang Ơi Adai”. hlâo adih anăn plei anai jing Lus. 20Yakôp iâu laĭ tui anai: “Tơdah Ơi Adai dŏ hăng kâo, wai lăng kâo hlăk kâo rơbat ƀơi jơlan laih anŭn pha brơi kâo ƀañ ƀơ̆ng, ao buh, 21laih anŭn brơi kâo hmâo tơlơi rơnŭk rơnua wơ̆t glaĭ pơ sang ama kâo, tui anŭn Yêhôwa či jing Ơi Adai kâo. 22Boh pơtâo kâo hmâo pơdơ̆ng ngă tơmeh či jing sang Ơi Adai, laih anŭn kâo pơyơr đĭ kơ Ih sa črăn amăng pluh kơ abih mơnơ̆ng ih hmâo pha brơi kâo.”
Избрани в момента:
Čơdơ̆ng Phŭn 28: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.