Čơdơ̆ng Phŭn 40
40
Yôsep Pơblang Tơlơi Rơpơi Brơi Kơ Dua Čô Mơnă
1Tơdơi ƀiă kơ anŭn, pô khua pŭ ia tơpai laih anŭn pô khua pŭ ƀañ tơpŭng kơ pơtao Êjip ngă soh hăng khua ƀing gơñu. 2Pharaôn hil kơ dua čô khua anŭn: khua pŭ ia tơpai laih anŭn khua pŭ ƀañ tơpŭng, 3laih anŭn krư̆ hĭ ƀing gơñu amăng sang mơnă, amăng sang khua gĭt gai kơ ƀing tơhan gak, jing anih arăng hlăk dŏ krư̆ Yôsep. 4Khua gĭt gai kơ ƀing tơhan gak jao brơi Yôsep buih bruă kơ dua čô khua anŭn. Arăng krư̆ ƀing gơñu amăng ƀiă hrơi blan.
5Amăng sa mlam anŭn, tơdang dŏ amăng sang mơnă, khua pŭ ia tơpai hăng khua pŭ ƀañ tơpŭng kơ pơtao Êjip leng kơ hmâo tơlơi rơpơi, rĭm čô hmâo tơlơi rơpơi phara phara, laih anŭn hmâo sa tơlơi kiăng pia phara mơ̆n. 6Mơguah hrơi tơdơi, Yôsep rai buih bruă kơ gơñu laih anŭn ƀuh gơñu rơngot. 7Yôsep tơña: “Yua hơgĕt hrơi anai ƀô̆ mơta ƀing gih rơngot hơning kar hăng anŭn lĕ?” 8Gơñu laĭ glaĭ: “Ƀing gơmơi hmâo tơlơi rơpơi samơ̆ ƀu hmâo pô pơblang ôh.” Yôsep laĭ: “Ƀu djơ̆ ôh hă bruă pơblang tơlơi rơpơi jing lơ̆m kơ Ơi Adai? Rơkâo dua gih ruai glaĭ khul tơlơi rơpơi anŭn kơ kâo bĕ.”
9Khua pŭ ia tơpai ruai tơlơi ñu rơpơi brơi kơ Yôsep hmư̆, ñu laĭ: “Amăng tơlơi rơpơi, kâo ƀuh hmâo sa phŭn boh kơƀâu ƀơi anăp kâo. 10Phŭn boh kơƀâu anŭn hmâo klâo ƀĕ than. Tơdang than ñu čơdơ̆ng čơnăt, bơnga ñu blang mơtam laih anŭn jing hĭ kơtul boh kơƀâu tơsă. 11Tơngan kâo hlăk dŏ djă kơčok Pharaôn. Kâo pĕ boh kơƀâu, djet ia ñu, pioh amăng kơčok giơ̆ng anŭn pơyơr đĭ kơ Pharaôn.” 12Yôsep laĭ kơ ñu: “Anai jing tơlơi kiăng pơblang kơ tơlơi rơpơi anŭn: klâo ƀĕ than boh kơƀâu jing klâo hrơi. 13Amăng klâo hrơi dơ̆ng, Pharaôn či brơi ih tơbiă laih anŭn ba glaĭ bruă kơ ih kar hăng hlâo; ih či pơyơr đĭ ia tơpai ƀơi tơngan Pharaôn kar hăng hlâo adih, hlăk ih jing ding kơna pŭ ia tơpai kơ ñu. 14Samơ̆ tơ abih bang bruă ih hmâo jing hiam hĭ laih, brơi ih hơdơr nao kơ kâo hŏ, rơkâo ih pơhiăp brơi bruă kâo ƀơi anăp Pharaôn, laih anŭn ba tơbiă kâo mơ̆ng anih anai. 15Yua kơ sĭt biă mă, arăng hmâo mă pơgŏ kâo ba tơbiă mơ̆ng čar ƀing Hêbrơ, laih anŭn pơ anai kâo ăt ƀu hmâo ngă ôh tơlơi soh hơgĕt gĕt năng lăp kơ arăng krư̆ hĭ kâo amăng sang mơnă anai.”
16Khua pŭ ƀañ tơpŭng ƀuh tơlơi Yôsep pơblang jing hiam, hnŭn yơh ñu laĭ: “Kâo ăt hmâo sa tơlơi rơpơi mơ̆n: kâo ƀuh kâo đua klâo bai tơpŭng ƀơi akŏ kâo. 17Amăng bai gah ngŏ kơ abih bang bai hmâo djŏp mơta ƀañ pioh brơi kơ Pharaôn, samơ̆ čĭm rai ƀơ̆ng hĭ abih ƀañ amăng bai ƀơi akŏ kâo.” 18Yôsep laĭ glaĭ: “Anai jing tơlơi pơblang kơ tơlơi rơpơi anŭn: klâo boh bai jing klâo hrơi. 19Amăng klâo hrơi dơ̆ng, Pharaôn či rot hĭ tơkuai ih laih anŭn yol đĭ ih ƀơi kơyâo. Khul čĭm či ƀơ̆ng hĭ drơi jan ih.”
20Ƀơi hrơi tal klâo, jing hrơi hơdơr kơ tơlơi tơkeng Pharaôn, ñu ngă tơlơi ƀơ̆ng huă kơ abih bang ƀing khua moa, laih anŭn ñu brơi khua pŭ ia tơpai laih anŭn khua pŭ ƀañ tơpŭng tơbiă mơ̆ng sang mơnă. 21Ñu brơi khua pŭ ia tơpai wơ̆t glaĭ kơ bruă ñu hlâo adih, laih anŭn gơ̆ dưi ba ia tơpai ƀơi tơngan Pharaôn. 22Samơ̆ Pharaôn pơđar arăng rot hĭ tơkuai khua pŭ ƀañ tơpŭng, kar hăng tơlơi Yôsep hmâo pơblang laih.
23Pô khua pŭ ia tơpai ƀu hơdơr kơ Yôsep ôh, ñu wơr bĭt hĭ Yôsep laih.
Избрани в момента:
Čơdơ̆ng Phŭn 40: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.