Čơdơ̆ng Phŭn 41
41
Yôsep Pơblang Tơlơi Rơpơi Brơi Kơ Pharaôn
1Dua thŭn tơdơi kơ anŭn, Pharaôn hmâo tơlơi rơpơi tui anai: ñu dŏ dơ̆ng ƀơi hang ia krong Nil. 2Anai nê, hmâo tơjuh drơi rơmo hiam, rơmŏng tơbiă mơ̆ng ia krong, ƀơ̆ng rơ̆k amăng tơdrŏn trang bô. 3Tơdơi kơ anŭn, hmâo dơ̆ng tơjuh drơi rơmo pơkŏn, sat laih anŭn rơwang, tơbiă đĭ mơ̆ng ia krong, rai dŏ jĕ tơjuh drơi rơmo hlâo anŭn, ƀơi hang ia krong Nil. 4Tơjuh drơi rơmo sat, rơwang lun ƀơ̆ng hĭ tơjuh drơi rơmo hiam laih anŭn rơmŏng. Giơ̆ng anŭn Pharaôn mơdưh hĭ.
5Ñu pĭt dơ̆ng laih anŭn rơpơi tal dua. Ñu ƀuh tơjuh amŭng pơdai asar laih anŭn hiam biă mă čăt đĭ hrŏm mơ̆ng sa phŭn pơdai. 6Tơdơi kơ anŭn, hmâo tơjuh amŭng pơdai pơkŏn, hơbo laih anŭn gliu kro yua kơ angĭn mơ̆ng gah ngŏ, čăt đĭ tơdơi kơ amŭng pơdai tal hlâo. 7Tơjuh amŭng pơdai hơbo lun hĭ tơjuh amŭng hmâo asar laih anŭn hiam. Pharaôn mơdưh hĭ, laih anŭn thâo anŭn jing tơlơi rơpơi.
8 #
Đaniel 2:2. Truh mơguah hrơi tơdơi kơ anŭn, bơngăt ñu rŭng răng, ñu brơi arăng iâu abih bang ƀing pơjâu laih anŭn abih bang ƀing kơhnâo amăng čar Êjip. Pharaôn ră ruai kơ ƀing gơ̆ tơlơi ñu rơpơi, samơ̆ ƀu hmâo hlơi dưi pơblang tơlơi rơpơi anŭn brơi kơ Pharaôn ôh.
9Hlăk anŭn pô khua pŭ ia tơpai laĭ hăng Pharaôn: “Hrơi anai kâo hơdơr glaĭ khul tơlơi soh kâo. 10Hlâo adih, hlăk ih hmâo tơlơi hil kơ ƀing ding kơna ih, ih hmâo krư̆ hĭ kâo hăng khua pŭ ƀañ tơpŭng amăng sang pô khua gĭt gai kơ tơhan gak. 11Amăng sa mlam anŭn, ñu hăng kâo hmâo tơlơi rơpơi, laih anŭn dua tơlơi rơpơi anŭn hmâo pơblang phara phara. 12Hmâo sa čô hlăk ai mơnuih Hêbrơ arăng krư̆ ñu hrŏm hơbĭt hăng ƀing gơmơi, ñu jing hlŭn kơ khua gĭt gai kơ ƀing tơhan gak. Ƀing gơmơi ră ruai brơi kơ ñu tơlơi ƀing gơmơi rơpơi, laih anŭn ñu hmâo pơblang laih tơlơi rơpơi ƀing gơmơi. 13Abih bang bruă hmâo truh sĭt djơ̆ kar hăng tơlơi ñu pơblang laih: Kâo dưi hmâo glaĭ bruă kâo hrup hăng hlâo, laih anŭn arăng rot hĭ tơkuai pô khua pŭ ƀañ tơpŭng.”
14Tui anŭn Pharaôn pơkiaŏ brơi arăng iâu Yôsep. Tañ mơtam arăng brơi ñu tơbiă mơ̆ng sang mơnă, kuah blâu kang ñu, pơblih sum ao, laih anŭn mŭt nao ƀơi anăp Pharaôn. 15Pharaôn laĭ kơ Yôsep: “Kâo hmâo sa tơlơi rơpơi samơ̆ ƀu hmâo hlơi dưi pơblang ôh. Kâo hmư̆ arăng laĭ ih kơnơ̆ng hmư̆ arăng ruai glaĭ tơlơi rơpơi đôč, tui anŭn ih dưi pơblang yơh.” 16Yôsep laĭ glaĭ kơ Pharaôn: “Ƀu djơ̆ kâo ôh, samơ̆ Ơi Adai yơh či brơi tơlơi laĭ glaĭ hiam klă kơ ih.” 17Pharaôn laĭ kơ Yôsep: “Anai nê, amăng tơlơi rơpơi kâo ƀuh kâo dŏ dơ̆ng ƀơi hang ia krong Nil. 18Hmâo tơjuh drơi rơmo rơmŏng laih anŭn hiam tơbiă mơ̆ng ia krong Nil laih anŭn dŏ ƀơ̆ng rơ̆k amăng tơdrŏn trang bô. 19Giơ̆ng anŭn hmâo tơjuh drơi rơmo pơkŏn sat laih anŭn rơwang tơbiă rai mơ̆n. Sĭt biă mă, kâo aka ƀuh djơ̆ ôh rơmo sat laih anŭn rơwang kar hăng anŭn amăng čar Êjip anai. 20Tơjuh drơi rơmo sat rơwang anŭn lun ƀơ̆ng hĭ tơjuh drơi rơmo rơmŏng, 21lun hĭ ƀing gơñu amăng hlŭng samơ̆ lăng hrup hăng ƀu lun ôh, yua kơ khul rơmo anŭn ăt dŏ sat laih anŭn rơwang hrup hăng hlâo mơ̆n. Giơ̆ng anŭn kâo mơdưh hĭ. 22Tơdơi kơ anŭn, kâo ƀuh dơ̆ng tơlơi rơpơi pơkŏn, hmâo tơjuh amŭng pơdai asar laih anŭn hiam bluh hrŏm mơ̆ng sa phŭn pơdai. 23Laih anŭn hmâo tơjuh amŭng pơdai hơbo, gliu kro, laih anŭn pơđŭng yua kơ angĭn mơ̆ng gah ngŏ, bluh tơdơi kơ amŭng pơdai tal hlâo. 24Tơjuh amŭng pơdai hơbo lun hĭ tơjuh amŭng pơdai asar hiam. Kâo ră ruai laih tơlơi rơpơi anŭn brơi kơ ƀing pơjâu, samơ̆ ƀu hmâo hlơi dưi pơblang brơi kâo ôh.”
25Yôsep laĭ hăng Pharaôn: “Dua tơlơi ih rơpơi anŭn kơnơ̆ng hmâo sa tơlơi pơblang đôč. Ơi Adai hmâo pơthâo brơi kơ ih khul bruă Ñu či ngă. 26Tơjuh drơi rơmo rơmŏng hiam anŭn jing tơjuh thŭn, laih anŭn tơjuh amŭng pơdai asar hiam anŭn ăt jing tơjuh thŭn mơ̆n; dua tơlơi rơpơi anŭn kơnơ̆ng jing hasa đôč. 27Tơjuh drơi rơmo sat, rơwang tơbiă tơdơi kơ tơjuh drơi rơmo tơbiă hlâo jing tơjuh thŭn; laih anŭn tơjuh amŭng pơdai hơbo, kro laih yua kơ angĭn mơ̆ng gah ngŏ ăt kar kaĭ mơ̆n, anŭn jing tơjuh thŭn hmâo tơlơi ư̆ rơpa. 28Kar hăng tơlơi kâo hmâo laĭ laih kơ Pharaôn: Ơi Adai hmâo brơi ih ƀuh laih khul bruă Ñu či ngă. 29Amăng abih čar Êjip či hmâo tơjuh thŭn rơbeh blai braih pơdai. 30Samơ̆ tơdơi kơ tơjuh thŭn anŭn či hmâo tơjuh thŭn tơlơi ư̆ rơpa. Amăng abih čar Êjip či wơr bĭt hĭ abih bang tơlơi rơbeh rơbai gơñu hmâo laih hlâo adih, laih anŭn tơlơi ư̆ rơpa či pơrai hĭ lŏn čar. 31Yua kơ tơlơi ư̆ rơpa rai tơdơi anai jing prŏng biă mă, hnŭn yơh arăng ƀu či hơdơr dơ̆ng ôh kơ tơlơi rơbeh rơbai anŭn. 32Tơlơi ih rơpơi hmâo lơ̆k glaĭ dua wơ̆t, tơlơi anŭn kiăng laĭ Ơi Adai hmâo khư̆p ư laih kơ tơlơi anŭn, laih anŭn Ñu či brơi truh tañ mơtam. 33Tui anŭn ră anai brơi ih ruah bĕ sa čô mơnuih thâo pơmĭn laih anŭn kơhnâo, laih anŭn brơi ñu wai lăng lŏn čar Êjip. 34Brơi ih dưm bĕ ƀing khua mă bruă amăng abih čar Êjip, laih anŭn mă sa črăn amăng rơma pơdai kơtor čar Êjip amăng tơjuh thŭn hmâo tơlơi rơbeh rơbai. 35Rơkâo ih pơtă bĕ kơ gơñu pơkom pioh abih bang mơnơ̆ng ƀơ̆ng huă amăng hơdôm thŭn djơ̆ bơyan či truh, laih anŭn brơi gơñu dưi pơkom pioh pơdai blê amăng rĭm boh plei kiăng ngă mơnơ̆ng ƀơ̆ng huă. Brơi gơñu gak wai khul sang pioh mơnơ̆ng ƀơ̆ng huă anŭn. 36Hơdôm mơnơ̆ng ƀơ̆ng huă anŭn či pơkom pioh brơi kơ tơjuh thŭn ư̆ rơpa či truh amăng čar Êjip, kiăng kơ čar anai ƀu či răm rai ôh yua kơ tơlơi ư̆ rơpa.”
Arăng Brơi Yôsep Jing Khua Čar Êjip
37Hơdră anai ngă bơmơak kơ Pharaôn wơ̆t hăng abih bang ƀing ding kơna amăng sang pơtao. 38Pharaôn laĭ hăng ƀing ding kơna ñu: “Pơpă ƀing ta dưi hơduah ƀuh sa čô mơnuih pơkŏn kar hăng pô anai, sa čô mơnuih hmâo bơngăt mơyang Ơi Adai dŏ amăng ñu?” 39Pharaôn laĭ kơ Yôsep: “Yua kơ Ơi Adai pơrơđah laih kơ ih thâo abih tơlơi anai, hnŭn yơh ƀu hmâo ôh sa čô pô pơkŏn thâo pơmĭn laih anŭn kơhnâo hloh kơ ih dơ̆ng. 40Tui anŭn, ih či wai lăng sang kâo, abih bang ană plei pla kâo či ngă tui tơlơi ih pơđar. Kâo prŏng hloh kơ ih, kơnơ̆ng yua kơ kâo hmâo gre pơtao đôč.”#Bruă 7:10. 41Pharaôn laĭ kơ Yôsep: “Anai nê, kâo brơi ih wai lăng abih čar Êjip.” 42Pharaôn toh hĭ rơbưn gru kơđŏm mơ̆ng tơngan laih anŭn čŭt ƀơi tơngan Yôsep, pơđar arăng buh brơi Yôsep ao ngă hăng bơnal hơbuă, laih anŭn băk brơi ƀơi tơkuai ñu sa ară añŭ mah.#Đaniel 5:29. 43Pharaôn brơi Yôsep đĭ rơdeh aseh pioh brơi kơ pô tal dua tŏ tui ñu, laih anŭn hmâo mơnuih nao hlâo ur ƀơi anăp ñu: “Tŏ tơŭt bĕ!” Tui anŭn, ñu brơi gơ̆ wai lăng abih čar Êjip. 44Pharaôn laĭ dơ̆ng hăng Yôsep: “Kâo jing Pharaôn, samơ̆ tơdah ƀu hmâo ôh tơlơi pơđar mơ̆ng ih, tui anŭn ƀu hmâo ôh sa čô mơnuih amăng čar Êjip anai dưi pơpư̆ pơgơi tơkai tơngan.” 45Pharaôn pơanăn brơi Yôsep jing Saphênat Panêah,#41:45 Saphênat Panêah: kiăng pia jing “pô pơklaih ƀôdah pô djă pioh tơlơi hơdip”. laih anŭn ñu brơi Yôsep sa čô đah kơmơi anăn ñu HʼAsênat, ană đah kơmơi Pôtipêra, khua ngă yang plei Ôn, jing hĭ bơnai Yôsep. Tui anŭn Yôsep hmâo tơlơi dưi wai lăng abih čar Êjip yơh.
46Yôsep hmâo klâo pluh thŭn tơdang ñu čơdơ̆ng mă bruă kơ Pharaôn, pơtao Êjip. Yôsep tơbiă mơ̆ng anăp Pharaôn kiăng đuaĭ hyu tar ƀar čar Êjip. 47Amăng tơjuh thŭn hmâo tơlơi rơbeh rơbai, lŏn ba rai boh bơnga lu biă mă. 48Yôsep pơƀŭt pơkom abih bang mơnơ̆ng ƀơ̆ng huă amăng tơjuh thŭn rơbeh rơbai anŭn amăng čar Êjip, laih anŭn răk pioh amăng lu boh plei. Gơnam ƀơ̆ng huă ñu pơƀŭt pơkom mơ̆ng khul đang hmua jum dar plei pă, tui anŭn ñu răk pioh hĭ amăng plei anŭn yơh. 49Yôsep pơƀŭt pơkom pơdai lu biă mă, lu hrup hăng čuah amăng ia rơsĭ, tơl ñu ƀu kiăng yap dơ̆ng ôh, yua kơ ƀu dưi yap ôh.
Yôsep tơkeng rai Manasê laih anŭn Êphraim
50Hlâo kơ thŭn ư̆ rơpa truh, HʼAsênat, ană đah kơmơi Pôtipêra, khua ngă yang plei Ôn, tơkeng brơi kơ Yôsep dua čô ană đah rơkơi. 51Yôsep pơanăn brơi ană kơčoa jing Manasê,#41:51 Manasê: Ană anai hmâo dơnai arăng pơđok hrup hăng boh hră ƀing Hêbrơ kiăng pia jing “ngă brơi wơr bĭt hĭ”. laih anŭn ñu laĭ: “Ơi Adai hmâo ngă brơi kâo wơr bĭt hĭ abih tơlơi tơnap tap kâo laih anŭn sang anŏ ama kâo.” 52Ñu pơanăn brơi ană tal dua jing Êphraim,#41:52 Êphraim: Anăn anai hmâo dơnai arăng pơđok hrup hăng boh hră ƀing Hêbrơ hmâo tơlơi kiăng pia jing “hmâo mơboh lu hloh”. laih anŭn ñu laĭ: “Ơi Adai ngă brơi kâo hmâo tơlơi pơdrŏng sah amăng lŏn čar kâo tŭ lu tơlơi tơnap tap.”
Tơlơi ư̆ rơpa
53Tơjuh thŭn hmâo tơlơi rơbeh rơbai amăng čar Êjip abih hĭ laih. 54Tơjuh thŭn hmâo tơlơi ư̆ rơpa čơdơ̆ng truh, djơ̆ kar hăng tơlơi Yôsep laĭ laih. Abih bang čar pơkŏn leng kơ ư̆ rơpa soh sel, samơ̆ amăng abih čar Êjip hmâo mơnơ̆ng ƀơ̆ng huă.#Bruă 7:11. 55Giơ̆ng anŭn abih čar Êjip ăt hmâo tơlơi ư̆ rơpa mơ̆n, ƀing ană plei pla ur kơwưh kơ Pharaôn kiăng hmâo mơnơ̆ng ƀơ̆ng huă. Pharaôn laĭ kơ abih bang ƀing Êjip: “Nao bĕ pơ Yôsep laih anŭn ngă tui hơgĕt tơlơi ñu pơđar.”#Yô 2:5. 56Tơ tơlơi ư̆ rơpa truh pơ djŏp djang anih amăng čar, Yôsep pŏk khul atông pơdai blê, laih anŭn sĭ pơdai brơi kơ ană plei pla Êjip. 57Abih bang lŏn čar pơkŏn ăt trŭn nao pơ čar Êjip kiăng blơi pơdai mơ̆ng Yôsep, yua kơ tơlơi ư̆ rơpa ngă pơtơnap kơ djŏp djang anih amăng lŏn tơnah.
Избрани в момента:
Čơdơ̆ng Phŭn 41: JRA2016
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016 United Bible Societies. All rights reserved.