Lebi 14
14
Lơh goh bơta kòp dun
1Yàng Jehôwa đơs mơ Môise lah: 2#Mat 8:4; Mak 1:44; Luk 5:14; 17:14.“Do la ală bơta sồr lam gơwèt hơ cau gơkòl dun tòm tŭ khai ơn phan lơh goh, tòm tŭ cau lam khai tus hơ cau gơnoar ơn phan duh khoai: 3Cau gơnoar ơn phan duh khoai pal lik lòt hơ đah bơdìh sàl ơm nàng sền sơwì khai. Dilah cau hơ̆ neh geh bòi bơh bơta dun tòm gơltau, 4gen cau gơnoar ơn phan duh khoai pal ai jơnau sồr cèng tus cau hơ̆ in bàr nơm sềm goh mơ dô gơl chi nho rề bò, brài dà gur, mơ ntê nha biap ƀô.#14:4 Jơnau cau Yoan la kin yơ̆i, ntê «bài hương». 5Lồc behơ̆ cau gơnoar ơn phan duh khoai rơp ai jơnau sồr tơnchơt dô nơm sềm hơđang dà sàng ơn tòm dô nơm gri mơ ù kơnàng. 6Gen khai ai dô nơm sềm gam kis mơ iurŭ gơ bal mơ chi nho rề bò, brài dà gur mơ ntê nha biap ƀô tòm mhàm sềm neh tơnchơt hơđang dà sàng. 7Khai rơp rsìh poh dơ̆ hơđang cau geh goh bơh di bơta sồt dun hơ̆ mơ yal tơlik lah khai geh goh. Lồc behơ̆ khai pal tơngklàs sềm gam kis tòm ƀlàng sre. 8Cau neh geh goh pal pìh ală ồi ào khai dê, koah jơh sơnò mơ um tòm dà, gen khai rơp geh goh jat bơta sồr lam duh khoai. Tơnơ̆ mơ hơ̆ khai rgơi mut tòm sàl ơm làng bol dê, mơya khai pal ơm bơdìh sàl ơm khai dê tòm poh ngai.
9Tòm ngai dơ̆ poh, khai pal koah jơh sơnò; khai pal koah sŏ, sơnò tềp, sơnò kồ mat mơ jơh ală sơnò ndai. Khai pal pìh ală ồi ào khai dê mơ um să khai mơ dà, gen khai rơp geh goh. 10Tòm ngai dơ̆ phàm, khai pal cèng tus bàr nơm belàt dam gam dềt, mơ dô nơm belàt me tơl dô nam, kòp nơm pal ò gơs tềl sồt, bal mơ pe pơnah jơt epha#14:10 pơgap 6,5 lit. kơmbuh phe rhền bơcă bal mơ mơñà nàng lơh gơs phan ơn mơ kòi mbo, mơ dô lok#14:10 Js: “dùl lok” dròm mơ 1/3 lit. mơñà. 11Cau gơnoar ơn phan duh khoai la cau rơp yal tơlik cau hơ̆ la goh pal lam cau geh goh bal mơ ală phan ơn cau hơ̆ dê tus di đap Yàng Jehôwa di tiah mut Sàl Tòm Mat dê.
12Gen cau gơnoar ơn phan duh khoai pal ai dô nơm tòm bàr nơm belàt kòn mơ ơn gơlơh gơs phan ơn tơwài glài, bal mơ dô pơnah pe lit mơñà; khai pal tơyài ală phan hơ̆ di đap Yàng Jehôwa lơh gơs dô nơm phan ơn tơyài. 13Khai pal hàl tơnchơt belàt kòn tòm tiah sàng goh la tiah hàl tơnchơt phan ơn tơwài glài mơ phan ơn chu pơrguc. Kung be phan ơn tơwài glài, phan ơn tơwài glài bơta gơtup tìs gơrê hơ cau gơnoar ơn phan duh khoai; gơ la sàng goh rlau jơh. 14Cau gơnoar ơn phan duh khoai pal ai dô êt mhàm phan ơn tơwài glài gơtup tìs dê mơ ơn gơ di plai tồr đah ma cau rơp geh goh dê, di tê me mpàng tê đah ma khai dê, mơ di jơng me mpàng jơng đah ma khai dê. 15Gen cau gơnoar ơn phan duh khoai rơp ai dô pơnah pe lit mơñà, tuh gơtòm mpàng tê đah kiau să tòm khai dê, 16iurŭ tê cong đah ma di mơñà tòm mpàng tê khai dê, mơ rsìh poh dơ̆ di đap Yàng Jehôwa. 17Cau gơnoar ơn phan duh khoai pal ơn dô êt mơñà gam wơl tòm tê khai dê hơđang plai tồr đah ma cau rơp geh goh dê, hơđang tê me mpàng tê đah ma khai dê mơ hơđang jơng me mpàng jơng đah ma khai dê, hơđang mhàm phan ơn tơwài glài bơta gơtup tìs dê. 18Mơñà gam wơl tòm mpàng tê cau gơnoar ơn phan duh khoai dê rơp ơn di bồ cau rơp geh goh dê mơ lơh gơs bơta tơwài glài khai in di đap Yàng Jehôwa. 19Lồc behơ̆, cau gơnoar ơn phan duh khoai pal ơn phan ơn tơwài glài mơ lơh gơs bơta tơwài glài cau in rơp geh goh bơh di bơta ò goh khai dê. Tơnơ̆ mơ hơ̆, cau gơnoar ơn phan duh khoai rơp hàl tơnchơt phan ơn chu pơrguc 20mơ ơn gơ hơđang cơnòng duh khoai, bal mơ phan ơn mơ kòi mbo, mơ lơh gơs bơta tơwài glài cau hơ̆ in, mơ khai rơp geh goh.
21Bulah behơ̆, dilah cau hơ̆ rƀah mơ ò rgơi gơs ală phan hơ̆, khai pal cèng dô nơm belàt dam lơh gơs phan ơn tơwài glài bơta gơtup tìs ơn tơyài ma kiau nàng lơh gơs bơta tơwài glài khai in, bal mơ dô pơnah jơt epha#14:21 pơgap 0,3 lit. kơmbuh phe rhền bơcă bal mơ mơñà nàng lơh gơs phan ơn mơ kòi mbo, dô pơnah pe lit#14:21 pơgap 2 lit. mơñà, 22mơ bàr nơm sềm ntòp hala bàr nơm sềm ntòp hui gam dềt mơ khai rgơi gơs, dô nơm lơh gơs phan ơn tơwài glài mơ dô nơm ne lơh gơs phan ơn chu pơrguc. 23Tòm ngai dơ̆ phàm khai pal cèng ală phan hơ̆ tus hơ cau gơnoar ơn phan duh khoai di tiah mut Sàl Tòm Mat di đap Yàng Jehôwa nàng lơh khai in gơs goh.
24Cau gơnoar ơn phan duh khoai pal ai belàt lơh gơs phan ơn tơwài bơta gơtup tìs, bal mơ dô pơnah pe lit mơñà, mơ tơyài ală phan hơ̆ di đap Yàng Jehôwa lơh gơs phan ơn tơyài ma kiau. 25Khai rơp hàl tơnchơt belàt lơh gơs phan ơn tơwài glài bơta gơtup tìs mơ ai dô êt mhàm gơ dê mơ ơn di plai tồr đah ma cau rơp geh goh dê, di tê me mpàng tê đah ma khai dê mơ di jơng me mpàng jơng đah ma khai dê. 26Cau gơnoar ơn phan duh khoai pal tuh dô êt mơñà tòm tê đah ma să tòm khai dê, 27mơ ai tê cong đah ma rsìh dô êt mơñà bơh di mpàng tê khai dê tòm poh dơ̆ di đap Yàng Jehôwa. 28Khai pal ai dô êt mơñà tòm mpàng tê khai dê mơ ơn di ală tiah mơ khai neh ơn mhàm phan ơn tơwài glài bơta gơtup tìs dê, hơ̆ la di plai tồr đah ma cau rơp geh goh dê, di tê me mpàng tê đah ma khai dê mơ di jơng me mpàng jơng đah ma khai dê. 29Mơñà gam wơl tòm mpàng tê khai dê gen cau gơnoar ơn phan duh khoai rơp ơn hơđang bồ cau rơp geh goh dê nàng lơh gơs bơta tơwài glài khai in di đap Yàng Jehôwa. 30Lồc behơ̆ khai rơp ơn ală sềm ntòp mơ ală sềm ntòp hui mơ cau hơ̆ rgơi gơs, 31dô nơm lơh gơs phan ơn tơwài glài mơ dô nơm ne lơh gơs phan ơn chu pơrguc, bal mơ phan ơn mơ kòi mbo. Lơh behơ̆ gen cau gơnoar ơn phan duh khoai rơp lơh gơs bơta tơwài glài di đap Yàng Jehôwa cau rơp geh goh in.”
32Hơ̆ la ală sồr lam cau lơi in gơs bơta sồt dun tòm gơltau mơ cau lơi in ò rgơi gơs ală phan ơn jat be òs nàng lơh khai in geh goh.
Lơh goh bơh di bơta but bơsềt
33Yàng Jehôwa đơs mơ Môise mơ Arôn lah: 34“Tòm tŭ bol mê mut tòm lơgar Kanaan mơ Añ ai bol mê in lơh gơs phan tòm bol mê dê, mơ Añ lơh bơta but bơsềt be tềl dun tòm dô nơm hìu tòm lơgar hơ̆, 35cau tòm hìu hơ̆ pal lòt yal mơ cau gơnoar ơn phan duh khoai lah: ‘Añ neh gŏ dô bơta gơlơh kung be but bơsềt tòm hìu añ jê.’ 36Cau gơnoar ơn phan duh khoai pal ai jơnau sồr tă tơlik jơh ală phan bơh tòm hìu hơ̆ lài mơ tŭ khai mut nàng sền sơwì bơta but bơsềt nàng ò gơs phan lơi tòm hìu rơp kòl yal tơlik la ò goh. Tơnơ̆ mơ hơ̆ gen cau gơnoar ơn phan duh khoai rơp mut mơ sền sơwì hìu. 37Khai pal sền sơwì bơta but bơsềt hơđang ală dơrñang, mơ dilah gŏ gơs ală tiah dà tơlir dô êt hala pơrhê dô êt gơlơh jrô rlau mơ mat dơrñang, 38gen cau gơnoar ơn phan duh khoai rơp lik bơh di mpồng dờng mơ kal hìu hơ̆ tòm poh ngai. 39Tòm ngai dơ̆ poh, cau gơnoar ơn phan duh khoai rơp rê wơl mơ sền sơwì hìu hơ̆ tai. Dilah tiah but bơsềt neh gơ sa rì hơđang ală dơrñang, 40khai pal ai jơnau sồr tă tơlik ală lŭ neh gơtòp bơta but bơsềt mơ sang tòm dô bă tiah ò goh đah bơdìh ƀòn dờng. 41Khai pal sồr cau koah jơh đah dơlam ală dơrñang hìu dê mơ pal cèng sang ală sù siă neh koah hơ̆ tòm dô bă tiah ò goh đah bơdìh ƀòn dờng. 42Lồc behơ̆ bol khai pal ai ală lŭ ndai mơ bơt wơl ala ală lŭ neh tă sang, mơ ngui ù kơnàng pa nàng lềr hìu.
43Dilah bơsềt gơ but wơl tai tòm hìu tơnơ̆ mơ tŭ neh tă sang ală lŭ mơ hìu neh koah mơ lềr wơl rau, 44gen cau gơnoar ơn phan duh khoai pal lòt tus mơ sền sơwì gơ, dilah bơta but bơsềt neh gơ sa rì tòm hìu, hơ̆ la dô bơta but bơsềt lơh tơnroh; hìu hơ̆ ò goh. 45Hìu hơ̆ pal sòr tơrlah, ală lŭ gơ dê, ală chi mpàn gơ dê mơ jơh ală phan ngui nàng lềr hìu pal sòr tơrlah mơ cèng tus hơ dô bă tiah ò goh đah bơdìh ƀòn dờng. 46Cau lơi mut tòm hìu hơ̆ tòm tŭ neh kal rau rơp gơlik gơs ò goh jơl tus di trồ mho. 47Cau lơi bic mang hala nggui sa tòm hìu hơ̆ pal pìh ală ồi ào khai dê.
48Mơya dilah cau gơnoar ơn phan duh khoai tus mơ sền sơwì hìu hơ̆ mơ bơta but bơsềt ò gơ sa rì tơnơ̆ mơ tŭ hìu neh lềr rau, khai rơp yal tơlik hìu hơ̆ la goh, tài bơh bơta but bơsềt neh ò gam tai. 49Kòñ lơh goh hìu hơ̆ khai pal ai bàr nơm sềm mơ dô êt chi nho rề bò, brài dà gur mơ ntê biap ƀô. 50Khai pal tơnchơt dô nơm tòm bàr nơm sềm hơđang dà sàng tòm dô nơm gri mơ ù kơnàng. 51Lồc behơ̆ khai pal ai mpàn chi pơnàng, ntê biap ƀô, brài dà gur mơ dô nơm sềm gam kis, iurŭ bol gơtòm mhàm sềm neh chơt mơ tòm dà sàng, mơ rsìh tòm hìu poh dơ̆. 52Khai rơp lơh goh hìu in bơh mhàm sềm, dà hòr, sềm gam kis, mpàn chi pơnàng, ntê biap ƀô mơ brài dà gur. 53Gen khai pal tơngklàs sềm gam kis tòm ală ƀlàng sre đah bơdìh ƀòn dờng. Lơh behơ̆ gen khai rơp lơh gơs bơta tơwài glài hìu in, mơ gơ rơp geh goh.”
54Hơ̆ la ală bơta sơnio lam bơh ală bơta sồt dun, bơh bơta toh kiat tòm gơltau, 55bơh bơta but bơsềt tòm ồi ào hala tòm dô nơm hìu, 56bơh bơta as, bơh sồt dun hala dô nơm tềl sồt, 57nàng lơh nền tŭ lơi bơta lơi la goh hala ò goh. Hơ̆ la ală bơta sơnio lam bơh bơta sồt dun tòm gơltau mơ bơta but bơsềt.
Избрани в момента:
Lebi 14: KPM2018
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018 United Bible Societies. All rights reserved.