Lebi 15
15
Bơta boh lam bơh bơta ò goh tòm să jan
1Yàng Jehôwa đơs mơ Môise mơ Arôn lah: 2“Yal tĕ mơ cau Israel mơ đơs tĕ mơ bol khai lah: Tòm tŭ cau klau lơi gơhòr lik bơh di să khai gen bơta gơhòr lik hơ̆ lơh khai in gơlik ò goh. 3Bulah gơhòr lik sùm bơh di să khai hala gơ dơh wơl, gơ rơp lơh khai in ò goh. 4Cơnòng lơi mơ cau klau gơs gơhòr lik hơ̆ bic hơđang gen gơ rơp la ò goh, mơ phan lơi khai nggui hơđang rơp la ò goh. 5Cau lơi ƀư di cơnòng bic cau hơ̆ dê gen pal pìh ală ồi ào he dê mơ um tòm dà, mơ khai rơp la ò goh jơl tus di trồ mho. 6Cau lơi nggui hơđang phan lơi mơ cau klau neh gơs gơhòr lik neh nggui hơđang gen cau hơ̆ pal pìh ală ồi ào he dê mơ um tòm dà, mơ khai rơp la ò goh jơl tus di trồ mho. 7Cau lơi ƀư di cau klau gơs bơta gơhòr lik bơh să pal pìh ồi ào he dê mơ um tòm dà, khai rơp la ò goh jơl tus di trồ mho. 8Dilah cau klau gơs gơhòr lik hơ̆ choh dà diau di cau lơi geh goh gen cau hơ̆ pal pìh ală ồi ào he dê mơ um tòm dà, mơ khai rơp la ò goh jơl tus di trồ mho. 9Phan lơi cau hơ̆ nggui hơđang tòm tŭ hào ơseh gen gơ rơp la ò goh, 10mơ cau lơi ƀư di phan lơi cau hơ̆ neh nggui hơđang rơp la ò goh jơl tus trồ mho; cau lơi tă cèng ală phan hơ̆ pal pìh ală ồi ào he dê mơ um tòm dà, mơ khai rơp la ò goh jơl tus di trồ mho. 11Cau lơi mơ cau gơs gơhòr lik ƀư mơ tê ò rào mơ dà gen cau hơ̆ pal pìh ală ồi ào he dê mơ um tòm dà, mơ khai rơp la ò goh jơl tus trồ mho. 12Dô nơm gri mơ ù kơnàng mơ cau hơ̆ neh ƀư gen pal jan bơcah, mơ phan lơi lơh mơ chi pal rào goh mơ dà.
13Tòm tŭ dô nă cau klau neh geh goh rau bơh di ală phan gơhòr lik bơh di să khai, khai gơs poh ngai tơnơ̆ mơ hơ̆ nàng lơh khai in gơs goh jat bơta sồr lam duh khoai; khai pal pìh ală ồi ào khai dê mơ um să tòm khai tòm dà, mơ khai rơp geh goh.
14Tòm ngai dơ̆ phàm, khai pal ai bàr nơm sềm ntòp hala bàr nơm sềm ntòp hui gam dềt mơ lòt tus di đap Yàng Jehôwa di tiah mut Sàl Tòm Mat mơ cèng gơ cau gơnoar ơn phan duh khoai in. 15Cau gơnoar ơn phan duh khoai pal ơn bol gơ, dô nơm lơh gơs phan ơn tơwài glài mơ dô nơm ne lơh gơs phan ơn chu pơrguc. Lơh behơ̆, gen khai lơh gơs bơta tơwài glài di đap Yàng Jehôwa cau hơ̆ in tài bơh bơta gơhòr lik bơh di să khai.
16Tòm tŭ dô nă cau klau gơlik is gơ dê kung be tòm tŭ khai bic mơ bau ùr, khai pal um jơh să khai mơ dà, mơ khai gơlik ò goh jơl tus di trồ mho. 17Dilah gơđềt di ồi ào hala phan mơ gơltau lơi gen phan hơ̆ pal pìh mơ dà, mơ phan hơ̆ gơlik ò goh jơl tus trồ mho.
18Tòm tŭ dô nă cau klau bic mơ dô nă cau ùr mơ gơlik jat òs gơ dê gen jơh bàr nă pal um mơ dà, mơ bol khai gơlik ò goh jơl tus di trồ mho.
19Phan lơi cau ùr bic hơđang tòm tŭ khai gơlơh să gen phan hơ̆ gơlik ò goh, mơ phan lơi khai nggui hơđang gen rơp gơlik ò goh. 20Ală phan mơ cau ùr hơ̆ bic hala nggui tòm ală ngai gơlơh să gen la ò goh. 21Cau lơi ƀư di cơnòng bic cau ùr hơ̆ dê gen pal pìh ồi ào he dê mơ um mơ dà, mơ khai rơp gơlik ò goh jơl tus trồ mho. 22Cau lơi ƀư di phan cau ùr hơ̆ nggui hơđang gen pal pìh ồi ào he dê mơ um mơ dà, mơ khai rơp gơlik ò goh jơl tus trồ mho. 23Bulah cơnòng bic hala phan lơi cau ùr hơ̆ nggui hơđang, tòm tŭ cau lơi ƀư di phan hơ̆ gen khai gơlik ò goh jơl tus trồ mho. 24Dilah dô nă cau klau bic mơ cau ùr hơ̆ mơ phan gơlik să cau ùr dê gơđềt di khai, khai rơp gơlik ò goh tòm poh ngai, cơnòng lơi khai bic hơđang gen rơp gơlik ò goh.
25Tòm tŭ dô nă cau ùr gơlik mhàm tòm dô dơ̆ jŏ ngai krơi is mơ bơta gơlơh să hala gơs bơta gơlik mhàm pơnjat tơnơ̆ mơ gơlơh să kòp kơnhai, gen khai gơlik ò goh tòm ală ngai khai gơlik mhàm tòm toh kung be tòm tŭ khai gơlik să. 26Cơnòng bic lơi mơ khai neh bic hơđang tòm tŭ khai gơlik mhàm pơnjat tơnơ̆ mơ gơlơh să gen cơnòng hơ̆ gơlik ò goh kung be cơnòng bic khai dê tòm tŭ khai gơlơh să kòp kơnhai, mơ phan lơi khai nggui hơđang rơp gơlik ò goh kung be tòm tŭ khai gơlơh să. 27Cau lơi ƀư di ală phan hơ̆ rơp gơlik ò goh; khai pal pìh ală ồi ào khai dê mơ um mơ dà, mơ khai rơp gơlik ò goh jơl tus trồ mho. 28Tòm tŭ cau ùr hơ̆ neh gơlik gơs goh bơh di bơta gơlik mhàm khai dê, khai kòp poh ngai gen tơnơ̆ mơ hơ̆ khai gơlik gơs goh jat bơta sồr lam duh khoai dê. 29Tòm ngai dơ̆ phàm, khai pal cèng bàr nơm sềm ntòp hala bàr nơm sềm ntòp hui gam dềt tus mơ cau gơnoar ơn phan duh khoai di tiah mut Sàl Tòm Mat dê. 30Cau gơnoar ơn phan duh khoai pal ơn dô nơm lơh gơs phan ơn tơwài glài, mơ dô nơm ne lơh gơs phan ơn chu pơrguc. Lơh behơ̆, gen khai lơh gơs bơta tơwài glài cau ùr hơ̆ in di đap Yàng Jehôwa bơh bơta ò goh bơta gơlik mhàm khai dê.
31Bol mê pal kơrmap gàr cau Israel cah ngài bơh di ală bơta lơh bol khai in gơlik ò goh, tồ bol khai rơp ò chơt tòm bơta ò goh bol khai dê bơh lơh gơlik ƀơ̆ ƀơl tiah ơm sùm Añ jê#15:31 hơ̆ la Hìu Duh Khoai. digùl bol khai.
32Hơ̆ la bơta sơnio lam bơh dô nă cau klau gơs bơta gơhòr lik bơh să, bơh cau lơi gơlik ò goh bơh bơta gơlik tòm tŭ bic mơ cau ùr, 33bơh dô nă cau ùr gơlơh să kòp kơnhai, bơh dô nă cau klau hala dô nă cau ùr gơs bơta gơhòr lik, bơh dô nă cau klau bic mơ dô nă cau ùr ò goh jat bơta sồr lam duh khoai dê.”
Избрани в момента:
Lebi 15: KPM2018
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018 United Bible Societies. All rights reserved.