JENESIS 25
25
1Go Abraham e piragi nagoroi p̃ota sikai, go nagisana e pei Keturah. 2Go e maneana dape Simran, go Yokshan, go Medan, go Midian, go Ishbak, go Shuah. 3Go Yokshan e pesi Sheba, go Dedan. Go Dedan natuna naanoai maga eu pei Ashurim, go Letushim, go Leummim. 4Go Midian natuna naanoai maga; Efah, go Efer, go Hanok, go Abida go Eldaah. Tea mamau puti wanogoe eu pei Keturah natuna maga. 5Go Abraham e dua Isaak tea mamau puti waina e peani ra. 6Ma natu maga ni narup̃a dua, waina Abraham e peani ra, Abraham e dua ra navituaana maga; go e dip̃aki lua ra m̃elu dua ki natuna Isaak pano, ragi waina e ko mauri doko, paki ist, paki navanua ni ist pano. 7Go tea maga waia eu pei naaleatia maga ni natau maga ni namauriana ki Abraham waina e mauri asa, natau p̃onotia sikai rualima takuna larua tamate lima. 8Go Abraham e marodua ki namerona, po mate ragi waina e kapuara p̃ia, tea matua, po pura ki natau maga; po pei tea saisaikiana paki namatarau aneana maga. 9Go natuna dua Isaak go Ishmael ero ova ki nia valea ni Makpelah, vanua ki Efron natu ni Sohar nawora ni Heth, waina e doko narae ni Mamre; 10Vanua waina Abraham e pakotovi a paki Heth natuna maga: tokora wanogoe Abraham e pei tea ovakiana asa, nara ma anagoroi Sarah. 11Go e pakilina edaku ki namateana ki Abraham, naga Sup̃e e pasa m̃ata ki natuna Isaak; go Isaak e doko pisari Beer‐lahai‐roi doko.
12Go tea maga waia eu pei navakilinaana maga ni Ishmael, Abraham natuna naanoai, waina Hakar nagoroi ni Ityipt, tea suasua nagoroi ki Sarah, e magi Abraham dape a: 13Go tea maga waia eu pei nagisa ni Ishmael natuna naanoai maga, nagisada maga, pae navakilinaana adeada maga: tea takalapa ni Ishmael, Nebaioth; go Kedar, go Adbeel, go Mibsam, 14Go Mishma, go Dumah, go Massa; 15Hadad, go Tema, Yetur, Nafish, go Kedemah: 16Tea maga wanogoe eu pei Ishmael natuna naanoai maga, go tea maga wanogoe eu pei nagisada maga, pae natokoana adeada maga, go nasum̃a ni p̃aaka adeada maga; tea maraki rualima sikai tamate dua pae nalauna adeada maga. 17Go tea maga waia eu pei natau ni namauriana ki Ishmael, natau p̃onotia sikai rualima takuna dolu tamate larua: go e marodua ki namerona po mate; po pei tea saisaikiana paki namatarau aneana maga. 18Go eu doko pae Havilah pa pa paki Assiria waina e doko narae ni Ityipt, napua waina ku pae asa paki Assiria: e doko narae ni taina mamau puti.
19Go tea maga waia eu pei navakilinaana maga ni Isaak, Abraham natuna: Abraham e pesi Isaak. 20Go Isaak e pei tea ni natau rualima pati ragi waina e piragi Rebekah, natu ni Bethuel nawora ni Aram ni Padan‐aram, gore ni Laban nawora ni Aram, naga ega vei anagoroi. 21Go Isaak e magi anagoroi pavara ni Yehovah, nalakena e dim̃o: go Yehovah e dogo navavaraniana aneana, go anagoroi Rebekah e diena. 22Go natuna dua ero dum̃ada pau ra nap̃alauna; go e noa, E pe tapala nogoe, ekasana a dapala waia? Go e pano naga ega vusuusu paki Yehovah. 23Go Yehovah e noa ki nia, e naga,
Nalauna dua ero doko nap̃elem̃a,
Go narei dua eroga wo pei tea tap̃otaeana pae namaritam̃a:
Go narei sikai ega wo kasua liu narei kerua;
Go tea takalapa ega wo magi tea takariki suasua.
24Go ragi waina naaleatia aneana maga eu nopu naga ega visola, p̃a leo, nedue ero doko nap̃elena. 25Go tea vea e pakilina e miala, e mamau dakiusi sugoro kovagoro sikai ni nam̃au; go eu soso nagisana ki Esau. 26Go edaku ki tea wanogoe taina e pakilina, go nam̃elearuna e puati nam̃ago natua ni Esau; go nagisana e pei tea sosoana ki Yakob: go Isaak e pei tea ni natau rualima latesa ragi waina e dape ra. 27Go piakiki naanoai wanogoe ero atum̃aki: go Esau e pei naatam̃oli atae navalakoana, naatam̃oli ni namalasi: go Yakob e pei naatam̃oli matemate, e doko tap̃aup̃au maga. 28Go Isaak e dodomi Esau, nalakena e gani tea valakokiana aneana: go Rebekah e dodomi Yakob; 29Go Yakob e peni tea veniana ni pan: go Esau e pae namalasi umai go e manainai: 30Go Esau e noa ki Yakob, e naga, P̃a tua au aga kani seara ni tea miala, tea miala waia, a pavara ni ko asa; nalakena a manainai: nalakena tea wanogoe nagisana e pei tea sosoana ki Edom. 31Go Yakob e noa, P̃a sori paki nau masoso tea ni navei‐takalapa‐ana anigo. 32Go Esau e noa, P̃a leo, kinau a m̃aladigi mate: go aga kasa ki tea ni navei‐takalapa‐ana waia? 33Go Yakob e noa, P̃a vivisa paki nau masoso; go e pivisa paki nia: go e sori paki Yakob tea ni naveitakalapa‐ana aneana. 34Go Yakob e dua Esau bred go lentil veniana ni pan; go e ganikani po munu, po duleana, po pano: go Esau e midoaki p̃alo ki tea ni navei‐takalapa‐ana aneana.
Избрани в момента:
JENESIS 25: NTB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Bible Society of the South Pacific