JENESIS 26
26
1Go navitoloana sikai e doko navanua, e edaku ki navitoloana vea waina e doko naaleatia maga ki Abraham. Go Isaak e pano punusi Abimelek nawota ki Filistine maga paki Cerar. 2Go Yehovah e pakilina ki nia, po noa, P̃a ta siwo paki Ityipt pano mau; p̃a toko navanua waina aga wo noa ki‐go asa: 3P̃a m̃enaki atatoko navanua waia, go aga wo sikoti ko doko, po pasa m̃ata ki‐go; nalakena aga wo dua mu, ma naworaworam̃a, navanua mamau puti waia, go aga wo lawosoki navivisaana waina a pivivisa paki tamam̃a Abraham asa; 4Go aga wo mari naworaworam̃a euga wo laapa dakiusi m̃asoe maga ni nakoroatelagi, go aga wo dua naworaworam̃a navanua mamau puti waia; go naworaworam̃a nalauna mamau puti ni maramana euga wo pei tea vasam̃atakiana asa; 5Nalakena waia Abraham e dogo parati ki nadaleogu, po pavaigoro navavaigoroana aginau, natip̃akiana aginau maga, natawonakiana aginau maga, go nawotaeana aginau maga. 6Go Isaak e doko Cerar doko: 7Go naatam̃oli maga ni tokora wanogoe eu pusuusu ki anagoroi; go e noa, Nae e pei goregu: nalakena e mataku noa, Agugoroi, e naga, Naatam̃oli maga ni tokora waia eu pe maripunue au nalakena Rebekah: nalakena nae e pei tea lom̃atakiana. 8Go e pakilina, ragi waina e doko sua tuai tokora wanogoe, naga Abimelek nawota ki Filistine maga e leoduru namata leo, po punusi, go p̃a leo, Isaak e p̃aro ki anagoroi Rebekah. 9Go Abimelek e soso Isaak, po noa, P̃a leo, nae e pei am̃agoroi lomau: go ekasana ku noa, Nae e pei goregu? Go Isaak e noa ki nia, e naga, Nalakena a noa, A pe mate nalakena nae. 10Go Abimelek e noa, Nasava waia ku po mari a paki gami? E pei m̃aladigi sikai ni narei e pe one sikoti am̃agoroi, go nigo ku pe viragi namarinaleosaana umai paki gami. 11Go Abimelek e dip̃aki narei mamau puti, e naga, Te naata e pe kisidogo naatam̃oli waia kite anagoroi e pe wo pei tea maripunueana lomau. 12Go Isaak e sapura ki navanua wanogoe, po pap̃ai natau sikai maau wanogoe paka p̃onotia sikai: go Yehovah e pasa m̃ata ki nia. 13Go naatam̃oli wanogoe e po p̃arua, po do disu po p̃arua pa pa e po p̃arua liu: 14Go e peani naveaniana ni navata maga ni shiip go ni naninani, go naveaniana ni navata maga ni katel warua, go tea suasua laapa: go Filistine maga eu doitoi a. 15Go m̃oru noai mamau puti waina tea suasua maga ki tamana eu kili ra naaleatia maga ki tamana Abraham, Filistine maga eu mari p̃onoti ra, po doni ra ki natano. 16Go Abimelek e noa ki Isaak, e naga, P̃a m̃elu dua ki gami pano; nalakena ku kasua liu p̃arua ki gami. 17Go Isaak e m̃elu dua ki tokora wanogoe pano, po sike tap̃aup̃au aneana ñapaloa ni Cerar, po doko tokora wanogoe doko. 18Go Isaak e moro kili m̃oru noai maga, waina eu kili ra naaleatia maga ki tamana Abraham; nalakena Filistine maga eu mari p̃onoti ra edaku ki namateana ki Abraham: go e soso nagisada pae nagisada waina tamana e soso ra asa. 19Go tea suasua maga ki Isaak eu kilikili nap̃aloa wanogoe, po pap̃ai m̃oru ni noai mauri sikai asa. 20Go tea leoparatiki maga ni katel ni Cerar eu pululu ki tea leoparatiki maga ni katel ki Isaak, eu noa, Noai wanae e pei aginami: go e soso nagisa ni m̃oru noai wanogoe ki Esek; nalakena eu pululu ki nia asa. 21Go eu kili m̃oru noai p̃ota sikai, go eu moro pululu asa: go e soso nagisana ki Sitnah. 22Go e m̃elu dua ki tokora wanogoe pano, po kili m̃oru noai p̃ota sikai; go eu da pululu asa mau: go e soso nagisana ki Rehoboth; go e noa, Nalakena Yehovah e po manigida mari tokora welewelea sikai ragi waia, go tuga wo pavakawora navanua. 23Go e m̃elu dua ki tokora wanogoe sake paki Beer‐sheba pano. 24Go Yehovah e pakilina ki nia nap̃ogiana wanogoe, po noa, Kinau a pei Sup̃e ki tamam̃a Abraham: p̃a ta mataku mau, nalakena kinau a sikoti ko doko, go aga wo pasa m̃ata ki‐go, po mari naworaworam̃a euga wo laapa nalakena tea suasua aginau Abraham. 25Go e davagi wede ni naviriana sikai tokora wanogoe, po soso nagisa ni Yehovah, po sike tap̃aup̃au aneana tokora wanogoe; go tea suasua ki Isaak eu kili m̃oru noai sikai tokora wanogoe. 26Go Abimelek e pae Cerar pano punusi a, nara ma tana ri Ahusath, go Fikol tea maraki taua ni naatam̃oli ni navakalo aneana. 27Go Isaak e noa ki da, e naga, Ekasana ku po umai punusi au, go nimu ku pilosi au, po dip̃aki lua au m̃elu dua ki mu pano? 28Go eu noa, Au punusi po atae naga Yehovah e sikoti ko doko: go au noa, Navivisaana sikai ega toko namawota kakagami go nigo, go auga mari navasasokiana sikai paki‐go; 29Naga p̃a ta mari tea sa paki gami mau, ega takiusi waina au da kisidogo ko mau, go ega takiusi waina au mari tea wia mau paki‐go, po dip̃aki lua ko natam̃ateana: ragi waia nigo ku pei tea vasam̃atakiana ki Yehovah. 30Go e madeada mari nakaniana sikai, go eu ganikani po munu. 31Go eu duleana m̃araverave malip̃ogi, po pivisa dum̃ada paki da: go Isaak e dip̃aki lua ra, go eu m̃elu dua ki nia pano natam̃ateana. 32Go e pakilina naaleatia sikai maau wanogoe, naga tea suasua maga ki Isaak eu rumai, po noakisai a nalo ni m̃oru noai waina eu kili a, po noa ki nia, eu naga, Au po pap̃ai noai. 33Go e soso e ki Shibah: nalakena tea wanogoe nagisa ni natokoana wanogoe e pei Beer‐sheba pa pa paki naaleatia waia.
34Go ragi waina Esau e pei tea ni natau rualima pati e piragi Yehudith natu ni Beeri nawora ni Heth, go Basemath natu ni Elon nawora ni Heth, naga eroga vei anagoroi: 35Go ero pei p̃op̃o susue ki Isaak go ki Rebekah.
Избрани в момента:
JENESIS 26: NTB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Bible Society of the South Pacific