Yohanes 16
16
Ka kete mitliur Yesus
16:1-4
1“Yakw kfwalak kabanir monuk ye ber a kmi lo nema kete kabanir monuk ye nose ma to milele Yakw mpa mitliur Yakw. 2Ma keta tomwatar rose rteri kmi ma mtyi das sampangar. Ma to lan iane, nempa keta ni tewat e tomwatar rfen a kmi fali rafliak feti sir rose rlarat Ratu Ni mpempeang. 3Sir rose farane ber a kmi fali sir to rafai Yakw ma to rafai Amangw a nbal. 4aNempa kfwalak kabanir monuk ye ber a kmi lo, nema noak ma tomwatar rose suse kmi, ka minremi feti kfwalak kabanir monuk a ne ber a kmi lo.”
Ratu Smwangtany nkarya na tomwatar nir momorip
16:4-15
4bNe Yesus nfalak a nbal, “Luryain e to kfwalak kabanir monuk ye ber kmi a fuky, fali noak a ne Yakw lolone kor a kmi.
5Nempa lere ye Yakw kose ma ktwi kukmat Amangw ma nsiduk Yakw ne. Ma to tomwate fen lese nbal nof a kmi ma nenrat Yakw feti mose ma mtwi mpe? 6Ma Yakw kfwalak kabanir monuk a ne ber a kmi, mpa dalmir suse feti keta ktwi a ktwate kmi. 7Nempa safe ma kfwalak ye botuan. Mpa farlan Yakw ktwi e iane nangafel desar ber a kmi. Fali farlan to ktwi e keta Ratu Smwangtany to nma ma nakmat a kmi. Ma farlan ktwi e keta kswiduk Ratu Smwangtany ma nma ma nor a kmi. I a ne ma nlikur Yakw ma ntulung a kmi. 8Ma farlan I nma e keta I nose ma tomwatar na saryamprene ye rfenai feti rose sale lo. Ma I nose nbal ma sir rafai feti Yakw kmworip e kumlonry na Ratu sounlury, ma rafai feti keta Ratu nukun tomwatar na saryamprene. 9Ratu Smwangtany keta nose ma tomwatar na saryamprene ye rfenai feti rose sale lo fali sir to ralele Yakw. 10I keta nose ma rafai feti Yakw kmworip e kumlonry, fali keta ktwi kukmat Amangw, ma to msyalan Yakw lo. 11Ratu Smwangtany keta nose ma sir rafai feti Ratu keta nukun tomwatar na saryamprene ye, fali Ratu nukun smwangat yatkar nir ulun lo. Smwangat yatkar nir ulun a ne ma nkuase saryamprene ye.
12Lolone ngriar yadin ma kose ma kfwalak ber a kmi, nempa lere ye kmi to bise ma mkyaul myal ngriar a ne fuky. 13Nempa noak ma Ratu Smwangtany a nma e keta naftutu kabain botunar na Ratu. Ma I keta nose ma kmi mkyaul myal anftutw botunar monuk. Ma keta I to natanuk nlarat Ni mpempeang, nempa nlarat safe ma I ndengar nof Ratu. Ma keta I nafbotin ber a kmi na kabanir ma rbotin na lere ma nma ne. 14I keta nose ma tomwatar rdangin Yakw, fali safe-safe monuk ma I nafbotin ber a kmi a ne, I ndengar nof Yakw. 15Safe-safe monuk ma Amangw Nie, iane Yakw Ningu nbal. Iane nwayat ma kfwalak, safe ma Ratu Smwangtany nafwibar ber a kmi a ne I nlangun nof Yakw.”
Tomwatar ma ralele Yesus keta dalmir suse nempa famudi e rsenang noak ma ratungan
16:16-33
16Yesus nfalak ber Ni manglartar, “To dodo a nbal e kmi to mkyeban Yakw lo. Nempa keta to dodo e msyalan Yakw nbal e lo.”
17Lama Yesus nfalak farane Ni manglartar a ne ketnir a raenrat sir, “Safema nfalak feti to dodo e to tsalan I lo, ma to dodo a nbal e keta tsalan I? Ma safema nfalak a nbal feti I nti ma nakmat Amany?” 18Ne sir dedesar ma raenrat sir, “I nfalak feti to dodo e iane farpe. Kam to mkaul mal feti I nfalak safe ne?”
19Nempa Yesus nafai feti sir rose ma renrat kabar sa rof I. Mpa nfalak ber sir, “Kmi mienrat a kmi a na safe ma betno kfwalak ye nre, feti keta to dodo e to mkyeban Yakw lo, ma keta to dodo nbal e mkyeban Yakw lo.”
20Mdyengar fen ngamone safe ma kfwalak ye. Ni botuan e kmi keta mtyasing ma milol, nempa tomwatar na saryamprene ye keta rsenang. Luryain e kmi mtyasing, nempa famudi e keta kmi msyenang resi. 21Safe ma kmi mkyoman a ne feleles farlan bate ma nose ma namtoranbab. Baluan e i nkoman suse fuky, nempa lama namtoranbab e to ndaun ni suse ne lo, fali i nsenang feti anaky a ntompur lo. 22Feleles farlan kmi a nbal. Lere ye kmi dalmir suse, nempa keta kbwali Yakw ma kswalan a kmi a nbal, ma keta mimpumpuki resi kmi. Ma to tomwate fen lese nbal ma nose nteri kmi ma mimpumpuki kmi.
23Ma na lere ma Yakw kmworip a kbwali keta kmi to myenrat sasaf myof Yakw lo. Mpa mdyengar fen ngamone safe ma kfwalak ye. Ni botuan e safe-safe ma mtyak myof Amangw, keta I nal ber a kmi fali milele Yakw. 24Kmi dalmir lese myor Yakw lo nempa terik lere ye kmi to mtyak sasaf myof Yakw fuky. Mpa lere ye mtyak lo, ma Ratu keta nal safe-safe ma kmi mtyak a ne, nema mir senange nlie nlengan.
25Yakw kfwalak kabanir monuk ye ber a kmi kor tnyanuk pupule. Nempa nait ni tewat e to kutanuk kor tnyanuk pupule ber a kmi lo, nempa keta kfwalyole na Amangw desar ber a kmi. 26Na lere ne koko kmi bise ma mtyak safe-safe myof Amangw, fali kmi dalmir lese myor Yakw lo. Ma Yakw to ktwak sasaf kof Amangw ma ber a kmi lo. 27Fali Amangw nkamis desar a kmi. I nkamis a kmi fali kmi mkyamis Yakw, ma milele feti Yakw kmwa kof Amangw. 28Botuan feti Yakw kmwa kof Amangw ma kmwa saryamprene ye. Nempa lere ye ktwi a ktwate saryamprene ye ma kbwali Yakw ma kukmat Amangw.
29Lama Ni manglartar rdengar farane sir rfalak, “Maken, lere ye Ko to mutanuk mor tnyanuk pupule lo nempa Ko mfwalak desar ngrie ye ber kam. 30Lere ye kam mafai feti Ko mufai safe-safe monuk lo, mpa tomwatar to rperlu ma renrat safe-safe rof Ko lo. Iane nwayat ma kam malele feti Ko mwa mof Amninrar Ratu.”
31Ne Yesus nfalak ber sir, “Mpa lere ye milele botuan Yakw lo e? 32Ka minremi! Keta nait ni tewat, ma lere ye ni tewat lo. Keta mifla buiyefar a kmi ma mtyi mir dasar mpane, ma mtyi a mtyate Yakw ma koko Yakw motak. Nempa to koko Yakw, fali Amangw dedesar ma nor Yakw.
33Yakw kfwalak kabanir monuk ye ber a kmi nema myorip na maline, fali dalmir lese myor Yakw lo. Ma keta mkyoman suse na saryamprene ye, nempa ka mifkoran dalmir fali kufufu kuasar monuk na saryamprene ye lo.”
Избрани в момента:
Yohanes 16: YMD
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Yayasan Pemberdayaan Masyarakat Desa © Wycliffe Bible Translators, Inc. All rights reserved.