Yohanes 17
17
Yesus nsampayang ber I a nbali
17:1-5
1Lama Yesus nfalak monuk kabanir a ne ber Ni manglartar, I nfon far langit ma nfalak, “O Amo, nait ni tewat lo ma mfwatutu Angkam Yakw ye Ningw dadangin. Ko mose farane nema bise ma kfwatutu Nim dadangin a nbal ber tomwatar. 2Iane feleles farlan ma Ko mwal kuase ber Yakw ma kfwarete tomwatar monuk na saryamprene ye, nema Yakw kal momorip dedesar ber tomwatar ma Ko mwal ber Yakw ne. 3Tomwatar bise ma ronri momorip dedesar farlan sir rafai feti lan Ko ye Ratu ma botuan, ma rafai nbal feti Yakw ye Ray Silai ma Ko mswiduk I a ne. 4Ma nof ma kose ksworu karyayar ma Ko mal ber Yakw ne, Yakw kfwatutu Amangw Ni dadangin ma nlie nlengan na saryamprene ye lo. 5O Amo, ka weni Ko mfwatutu Ningw dadangin na soumlury, feleles farlan kit tadu ninr dadangin ma nlie nlengan noak ma saryamprene to namin a fuky.
Yesus nsampayang ber Ni manglartar
17:6-19
6Ko mwal tomwatar ketnir na saryamprene ye ber Yakw ma kose ma rafai Ko lo. Sir reluk Nim tomwatar nempa Ko mwal sir ber Yakw ma reluk Ningw tomwatar lo, ma sir rose rlarat safe ma Ko mfwalak. 7Ma lere ye sir rafai feti kabanir monuk ma kuftutu ma kose ne botuan feti nof Amangw Ko. 8Yakw kfwalak ber sir na kabanir monuk ma Ko mfwalak ber Yakw ne, ma sir rlangun lo. Ma sir rafai botuan feti Yakw kmwa kof Ko, ma sir ralele nbal feti Ko ye ma mswiduk Yakw.
9Yakw to kswampayang ber tomwatar na saryamprene ye. Nempa Yakw kswampayang ber tomwatar ma Ko mwal sir ber Yakw ne, fali sir a ne ma reluk Nim tomwatar. 10Tomwatar monuk ma reluk Ningw tomwatar a ne, sir reluk Nim tomwatar a nbal. Ma tomwatar monuk ma reluk Nim tomwatar a ne, sir reluk Ningw tomwatar a nbal. Ma keta sir ye ma rfatutu Ningw kuase nema tomwatar rdangin Yakw. 11Ma lere ye kose ma ktwi kukmat Amangw Ko, ma to dodo nbal e Yakw to kumin saryamprene ye lo. Nempa sir a ne lolone ramin saryamprene ye. Amo, manglerap Ko, Yakw ktwak ma mujake sir mor Nim kuase. Kuase ne ma Ko mal ber Yakw. Ko mose farane nema sir dedesar ma dalmir lese, feleles farlan ma Ko dalam lese mor Yakw nbal. 12Noak ma kor sir, Yakw kujake sir kor Nim kuase, iane kuase ma Ko mal ber Yakw. Yakw kujake sir mpa to fen lese nof sir a ne ma rmat dedesar lan tomwate lese. Iane la rafdiat safe ma rarengi na Kitap Lelerap dalam.
13Ma lere ye kmwa ma kukmat Amangw Ko. Ma kfwalak kabanir monuk ye noak ma lolone kumin saryamprene, nema nir senange nlie nlengan farlan Yakw. 14Yakw kufbwotin Nim ngribatnir ber sir lo, iane nwayat ma tomwatar na saryamprene ma to ralele Ko a ne rkedan sir. Ma tomwatar na saryamprene ma to ralele Ko a ne rkedan Ningw manglartar, fali Ningw manglartar to rlarat sir a ne nir andanwar. Iane feleles farlan Yakw ma to klwarat tomwatar na saryamprene ye nir andanwar a nbal. 15Yakw to ktwak ma mwal sir mof saryamprene ye, nempa ktwak ma mujake sir mof smwangat yatkar nir ulun. 16Sir to rlarat tomwatar na saryamprene ye nir andanwar, feleles farlan Yakw, ma to klwarat tomwatar na saryamprene ye nir andanwar a nbal. 17O Amo, Ko Nim anftutwar a ne ma botuan. Mpa Yakw ktwak ma Ko mwal Nim anftutwar a ne ma mfwil a mkwese sir ma reluk Nim tomwatar, nema rafai Ko botuan. 18Yakw kswiduk sir far saryamprene, feleles farlan ma Amangw Ko mswiduk Yakw ma kmwa saryamprene ye lo. 19Ma kunrenre Yakw ber Ko ma fen nir ngamone. Yakw kose farane nema ranrenre sir ber Ko ma rose rlarat Nim anftutw botunar a ne.
Yesus nsampayang ber tomwatar monuk ma reluk Ni manglartar
17:20-26
20Yakw to kswampayang ber lan Ningw manglartar ye. Yakw kswampayang a nbal ber tomwatar ma keta ralele Yakw, fali rdengar safe ma Ningw manglartar raftutu ber sir a ne. 21Ma ktwak ma ka mose ma sir monuk dalmir lese, feleles farlan Amangw Ko dalam lese mor Yakw, ma Yakw dalangw lese kor Ko a nbal. Yakw kose farane ma dalmir lese ror kit, nema tomwatar na saryamprene ye ralele feti Ko mswiduk Yakw. 22Yakw kose ma tomwatar rdangin sir, farlan ma Amangw Ko mose ma tomwatar rdangin Yakw. Yakw kose farane nema sir dalmir lese feleles farlan kit a nbal. 23Yakw kmworip dalam lese kor sir, ma Amangw Ko dalam lese mor Yakw a nbal. Yakw kose farane nema sir monuk dalmir lese botuan, ma keta tomwatar na saryamprene ye rafai feti Amangw Ko ma mswiduk Yakw. Ma rafai nbal feti Ko mkwamis sir farlan ma mkwamis Yakw.
24O Amo, ktwak a nbal ma tomwatar ma Ko mwal ber Yakw ne dedesar ma ror Yakw boloka kumin mpe nre mpe motak. Ko mose farane nema sir bise ma rsalan Ningw kuase ne. Ko mwal kuase ne ber Yakw, fali Ko mkwamis Yakw noak ma to mose saryamprene ye fuky.
25O Amo, lan Ko ye ma mumlonry. Ma tomwatar na saryamprene ye to rafai Ko nempa Yakw e kufai Ko. Ma sir ma reluk Ningw manglartar ye rafai feti Ko ye ma mswiduk Yakw. 26Yakw kufbwotin Ko ber sir lo. Ma keta dedesar ma kufbwotin Ko ber sir. Yakw kose farane nema sir dedesar ma rkamis tomwatar, farlan ma Ko mkwamis Yakw, ma dalmir lese ror Yakw nbal.”
Избрани в момента:
Yohanes 17: YMD
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Yayasan Pemberdayaan Masyarakat Desa © Wycliffe Bible Translators, Inc. All rights reserved.