LUK 18
18
Lizaŋ ko ko-gera in wi-gɔn-kita
1Jesu tɔ̧ɔ̧ lizaŋ'ɛ ha̧ wa woyo mɛ usi'e ndé, wa a̧ kɔ́fí Sɔ̧ ɓɔnsɛnɛ, ká wa mbɔi na. 2«Ŋma wi-gɔn-kita duka so ŋma gasa ye; a̧ yu kɔ̧-a̧ kíí Sɔ̧ na, a̧ tu̧ tɛ bíí na mbɛt. 3Ŋma ko-gera duka so saaye'i mbɛt, ɓɛɛ ko-gera'i tɛ́ tɛ wi-gɔn-kita'i tɔ̧ ha̧ a̧‘e: ‹Ɛ̀nɛ̀ dé ha̧ kita mɛ tik wisɛn kɔ‘m.› 4Ɓɛɛ ɓɔnsɛnɛ wi-gɔn-kita'i bɛ̧ bɛ̧ɛ̧, tɔ̧ nɛnɛ ha̧ a̧‘e: ‹Nɛ̀ mbetɛ, mi yu kíí Sɔ̧ na, in mi yu bíí na mbɛt, 5ɓɛɛ hee mɔ'ɔ nɛ̀ kóò'ɛ gba nɛ́ zu'm ga, mi tɛ gɔn kita nɛ̀ de-a ha̧ a̧ wen ká a̧ tɛ́ɛ̀ tɛ ɓɔnsɛnɛ mɛ gba zu'm.› »
6Ɓɛɛ Gasa Wan tɔ̧ ha̧ wa woyo: «Ɛ̀nɛ̀ zíí wen nɛ̀ ɗaŋ wi-gɔn-kita tɔ̧a̧‘i. 7Hegɔ, bó nɛ́ Sɔ̧ nɛ̀ dúk’ɛ yé kɔ‘i nɛ́ ɗoŋ o wi nɛ̀ hiɗi mɔ sitɛ a̧ zɛ nɛ̀ wese na nde? A̧ tɛ nik so naŋ-a tɛ gbaka wa nde? 8Mi tɔ̧ h’ɛ́nɛ́, a̧ tɛ ye ɗoŋ wa nɛ̀ haya-a. Ɓɛɛ ŋgimbi nɛ̀ Bem ko bíí tɛ pii ɗoŋ, a̧ tɛ kpa kɔ̧ɔ̧ɗɔɔwen zu nù'ɛ ɓɔ nde?»
Fariziɛn in wi-ba-garama
9Jesu tɔ̧ɔ̧ lizaŋ'ɛ woyo wen zu o ŋma bíí nɛ̀ ŋmaŋ kɔ‘i nɛ́ tɛ‘e, wi nɛ́ wi-de-mɔ nɛ̀ yuwar-a, ɓɛɛ nɛ̀ zɔk kɔ‘i o ŋma bíí hee geemɔ ga. 10«O ŋma bíí yiitoo daŋa ye kɔ̧́ Tua ko Sɔ̧ mɛ kɔfi Sɔ̧; ɛ̧ɛ̧ kpɔk nɛ́ Fariziɛn, ɓii-aa nɛ́ wi-ba-garama. 11Fariziɛn yor kɔ‘i yor, kɔfi nɛ̀ Sɔ̧ hee mɔ'ɔ ga: ‹Sɔ̧ kɔ‘m, osoko h’ɛ́nɛ́ wen mi duk hee o dɔka bíí nɛ̀ ya nɛ́ o wi-zuzu, o wi-ɗaŋ in o wi-de-dàlà, kóó hee wi-ba-garama’ɛ ga na. 12Kɔ‘m, mi zim yì war yiitoo tɛ alat kpɔk; mi ha̧ nɛ́ zú-mɔ̀#18.12 zú-mɔ̀: usí nɛ́ mɔ ɓú mɛ́ bà yínɛ́ tɛ́ mɔ gɔmŋmaa lɛ́ŋ nɛ‘i kpá. tɛ mɔ lɛŋ n'am kpa.› 13Wi-ba-garama yora kɔ‘i nɛ̀ nyɛi̧a-a, kɔ̧ kɔ‘i mɛ ɓer yí si yiwese na, ɓɛɛ mbɛr nɛ́ yí-see tɔ̧ nɛnɛ‘e: ‹Sɔ̧ kɔ‘m, ɛ̀nɛ̀ dé ko ha̧‘m wen mi nɛ́ ɗaŋwi.› 14Mi tɔ̧ h’ɛ́nɛ́, tɛ̀ síí ɗoŋ ko wi-ba-garama'i si tɛ kɔ‘i, Sɔ̧ zɔka a̧ hee wi-de-mɔ nɛ̀ yuwar-a ga, ɓɛɛ ko Fariziɛn, bo hegɔ na, wen kóó o ndé nɛ̀ kii mɛ duk si ŋgɔn, Sɔ̧ tɛ gbɔs'a si ɗɔɔ, ɓɛɛ wi nɛ̀ duk si ɗɔɔ, Sɔ̧ tɛ ba a̧ e ŋgɔn.»#Mt 23.12; Lk 14.11
Jesu toka de yoŋgo zu o geɗek bem
(Zɔk Mt 19.13-15; Mk 10.13-16)
15Nɛ́ mɔ'ɔ nɛ̀ wa mgbɔɔ o geɗek bem tɛnɛ ha̧ Jesu mɛ tam tɛ-wa mbɛt; o ŋgaiwi ko Jesu zɔka o wi nɔ‘i ɓɛɛ dik wen a zu wa. 16Jesu saa o bem nɔ‘i pii tɛ, ɓɛɛ tɔ̧: «Ɛ̀nɛ̀ é ha̧ o geɗek bem mɛ tɛ pii tɛ‘m, k’ɛ́nɛ́ dor wa na, wen Wan ko Sɔ̧ nɛ́ ko o wi nɛ̀ duk hee wa ga. 17Nɛ́ kpasawen a̧‘m tɔ̧ h’ɛ́nɛ́, wi nɛ̀ kpɛk Wan ko Sɔ̧ hee geɗek bem ga na, beka ye sɛnɛ na.»
Jesu in wanmbɔi
(Zɔk Mt 19.16-30; Mk 10.17-31)
18Ŋma gasawi aka Jesu: «De wan-usi-mɔ, mɔ n'am tɛ de sɛka'm kpaa duka-kpasa kpoo nɛ kpoo nɛ̀ mɔɔ-oi nɛ́ ge?» 19Ɓɛɛ Jesu ak a̧: «Mɛ́ sa'm'e de-wi wen ge? Ŋma de-wi bo na, ɓaa de-wi nɛ́ Sɔ̧ kpɔk ɓɛɛ. 20Mɛ iŋa o heembea: ká mɛ de dàlà na, ká mɛ gbɛ zu na, ká mɛ zu̧ mɔ na, ká mɛ ɓir wen e nú ŋmà-mɛ na, mɛ̀ tú̧ tɛ dáà kɔ-mɛ in nàà kɔ-mɛ.»#Gboa-a 20.12-16; Wee-ɗoŋ-he 5.16-20 21Ɓɛɛ gasawi'i kifi nú: «Heembea nɔ‘i lɛŋ mi kasa nɛ̀ bem mɛ hɔ kinii.» 22Jesu zia hegɔ, ɓɛɛ tɔ̧ ha̧ a: «Oi mɔ kpɔk nɛ̀ ɓɔna nɛ́ mɔ'ɔ: mɛ̀ ɗɔ́r mɔ kɔ-mɛ lɛŋ a̧ mɛ̀ kɛ̧́ ha̧ o wisan, ɓɛɛ mɛ́ tɛ kpa mbɔi sɛn yiwese mɛ; ɗoŋ mɔ‘i ɓɛɛ mɛ̀ tɛ́ ɗoŋ am.» 23Wi’ɛi zia wen'i hegɔ ɓɛɛ kpa ɗaŋsee, wen a̧ duka so nɛ́ gasa wanmbɔi.
24Jesu zɔka a̧ yaka nɛ̀ tu̧u̧-see, ɓɛɛ tɔ̧: «Ɔ ŋgaya ha̧ o wanmbɔi mɛ ye tɛ Wan ko Sɔ̧! 25Gboa-a ko ŋgeloba nɛ̀ kɔ̧́ woi-si̧ɔ̧ ɔ yɛ́kɛ́ɗɛ́ gan yea-a ko wanmbɔi tɛ Wan ko Sɔ̧.» 26O bíí nɛ̀ zia wen'i tɔ̧ɔ̧ ha̧ Jesu: «Kà nɛ́ bòò hegɔ, ɓɛɛ nɛ́ o'o tɛ kpasi o?» 27Jesu kifa nú: «Mɔ nɛ̀ gan bíí gan Sɔ̧ na.» 28Ɓɛɛ Pierre tɔ̧ ha̧ a̧: «K’ɛ́ɛ́, ɛ́ɛ́ ee mɔ k’ɛɛ lɛŋ duk mɛ nɛ̀ ɗoŋ‘nɛ́.» 29Jesu tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, wi nɛ̀ tɛ e tua kɔ‘i, kóò kɔ‘i, o nya-wi, o dáà in nàà kɔ‘i, kóó o bem kɔ‘i duk wen Wan ko Sɔ̧, 30wi’ɛi tɛ kpa mɔ nɛ̀ dɔka-a gan tɛ ŋgimbi’ɛ, ɓɛɛ tɛ́ ŋgimbi nɛ̀ tɛ‘i, a̧ tɛ kpa duka-kpasa kpoo nɛ kpoo.»
Jesu tɔ̧ɔ̧ wen bɔnɛ n'aa tɛ zɔk
(Zɔk Mt 20.17-19; Mk 10.32-34)
31Hɔ-ɗoŋ-aa, Jesu mgbɔɔ o ŋgaiwi kɔ‘i ɓu-zua-yiitoo, ɓɛɛ tɔ̧ ha̧ wa: «Zɔ́k, kinii, ɛɛ a̧ daŋ si Jerusalɛm’ɛ, ɓɛɛ mɔ lɛŋ nɛ̀ o wi-tɔ̧-wen oi nú Sɔ̧ bàá yɔr so wen Bem ko bíí tɛ hɔ gba̧a̧. 32Wa tɛ de ha̧ Bem ko bíí mɛ ye er o wi nɛ̀ iŋ kpasa Sɔ̧ na, wa tɛ zɛkɛɗ‘a, wa tɛ da̧ a̧, wa tɛ a sap yí-a mbɛt. 33Ɓɛɛ ɗoŋ nɛ̀ wa tɛ gus'a kaɗi, wa tɛ gbɛ a̧, ɓɛɛ ɗoŋ zɛ yiitoo taar-a a̧ kpasa.» 34Ɓɛɛ wa zii gba̧a̧ wen'i na; wen'i duka nɛ̀ hu̧sa̧-a̧, ɓɛɛ wa iŋ géé iŋa gba̧a̧ wen nɛ̀ Jesu tɔ̧a̧‘i na.
Ŋma wi-boma-yí saaye Jeriko
(Zɔk Mt 20.29-34; Mk 10.46-52)
35Hee mɔ'ɔ n'aa hɛɗa saaye Jeriko ga, ŋma wi-boma-yí duka nù ká̧ war kɔfi nɛ̀ mɔ. 36A̧ zia gítí giiwi nɛ̀ ɓir, ɓɛɛ a̧ ak mɔ nɛ̀ yak, 37ɓɛɛ wa tɔ̧ ha̧ a̧‘e, nɛ́ Jesu be Nazarɛt a̧ ɓir yak. 38Ɓɛɛ a̧ hiɗi mɔ tɔ̧ nɛnɛ‘e: «Jesu, Bem ko David, ɛ̀nɛ̀ dé ko ha̧‘m.» 39Ɓɛɛ o wi-ya-ti dik wen a zu a̧‘e, a̧ a̧ kpé nú, ɓɛɛ a̧ hiɗi mɔ nɛ̀ ŋgaya-a gan kuti-a'e: «Bem ko David, ɛ̀nɛ̀ dé ko ha̧‘m.» 40Jesu yora, ɓɛɛ tɔ̧ ha̧ wa mɛ mgbɔ wi’ɛi tɛnɛ ha̧ a̧. Wi-boma-yí‘i hɛɗa katɛ a̧, ɓɛɛ Jesu ak a̧: 41«Mɛ́ kɔ̧ɔ̧ a̧‘m dé nɛ́ ge mɔ ge ha̧ mɛ ge?» A̧ kifa nú: «Gasa Wan, ɛ̀nɛ̀ dé ha̧‘m zɔk mɔ woyo!» 42Jesu tɔ̧ɔ̧ ha̧ a̧: «Mɛ̀ zɔ́k mɔ, kɔ̧ɔ̧ɗɔɔwen kɔ-mɛ kpasa mɛ.» 43Soɓee, yí-a hu̧i̧a̧, a̧ zɔka mɔ, ɓɛɛ a̧ nɛ́ ɗoŋ Jesu gasi nɛ̀ Sɔ̧. O bíí lɛŋ zɔka mɔ‘i ɓɛɛ zɔn Sɔ̧.
Избрани в момента:
LUK 18: GB11DC
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.