LUK 19
19
Zachee
1Jesu yee saaye Jeriko, ɓɛɛ ɓir ɓir yak. 2Ɓɛɛ ŋma bíí, nin-a'e Zachee hɔ. Wi’ɛi nɛ́ ŋma gasawi ko o wi-ba-garama in a̧ nɛ́ wanmbɔi mbɛt. 3A̧ kia war mɛ zɔk Jesu wen a̧ iŋ so ti Jesu na, ɓɛɛ a̧ nyɛm mɛ zɔk a̧ na wen giiwi in wen a̧ duka so nɛ́ dɔ̧-wi mbɛt. 4A̧ maa yì siti, ɓɛɛ a̧ daŋ ŋma gasa te-mbɔra wen ha̧ a̧ mɛ zɔk Jesu nɛ̀ tɛ ɓir nɛ̀ hi̧i̧ yak'i. 5Nɛ́ mɔ'ɔ nɛ̀ Jesu hɔɔ ɗɔɔ te'i, ba yí nɛ̀ ŋgɔn, ɓɛɛ tɔ̧ ha̧ a̧: «Zachee, mɛ̀ zír bee, wen sɔsɔɔ mi tɛ zir tɛ̀ kɔ-mɛ.» 6Zachee zira nɛ̀ haya-a, ɓɛɛ kpɛk Jesu nɛ̀ desee. 7Zɔka-a nɛ̀ o bíí zɔka hegɔ, wa lɛŋ ku̧i̧a mɔ, tɔ̧ nɛnɛ‘e: «A̧ nɛ̀ɛ̀ zir tɛ̀ ko wi-de-ɗaŋmɔ.» 8Ɓɛɛ Zachee tɛ́ɛ̀ yor ti Gasa Wan, ɓɛɛ tɔ̧: «Gasa Wan, mi tɛ ha̧ reeta mbɔi kɔ‘m ha̧ o wisan, ɓɛɛ kà‘m nɛ̀ baa mɔ er ŋma bíí nɛ̀ yuwar-a na, mi hà̧á̧ mɔ‘i si ɗoŋ ha̧ a̧ war naar.» 9Ɓɛɛ Jesu tɔ̧ɔ̧ ha̧ a̧: «Yuwar kpasa-a yee kɔ̧́ tua’ɛ sɔsɔɔ, wen wi’ɛ mbɛt, nɛ́ ŋma bem ko Abraham. 10Wen Bem ko bíí tɛɛ mɛ kii in mɛ kpasi mɔ̀ nɛ̀ yɔ̀á#19.10 mɔ̀ nɛ̀ yɔ̀á: ó ŋma wí-kpai-kalata tɔ̧a: ó bíí nɛ̀ yɔ̀á.#Mt 18.11.»
Lizaŋ zu kɔya-sede
(Zɔk Mt 25.14-30)
11Hee mɔ'ɔ nɛ̀ o bíí ya zii nɛ̀ wen'i ga, Jesu tɔ̧ ŋma lizaŋ woyo ha̧ wa, wen n'aa hɛɗa nɛ̀ saaye Jerusalɛm kaɗi, in wen o bíí ta kɔ‘i'e Wan ko Sɔ̧ tɛ hɔ tɛ kale ŋgimbi'i.#Mt 25.14-30 12Ɓɛɛ a̧ tɔ̧: «Bem ko ŋma gasawi yaka si ŋma nù nɛ̀ nyɛi̧a-a ha̧ wa mɛ de wan ha̧ a̧ sɛka a̧ pia ɗoŋ woyo. 13Nɛ́ mɔ'ɔ n'aa saa o wi-de-tom kɔ̧-a̧, ɓɛɛ ha̧ kɔya-lɔr kpɔk kpɔk ha̧ wa, ɓɛɛ tɔ̧: ‹Ɛ̀nɛ̀ bá, ɛ̀nɛ̀ dé nɛ̀ gɛnɛ hɔ ŋgimbi n'am tɛ pii ɗoŋ.› 14O bíí kɔ̧-a̧ sɛn so nɛ́ a̧, ɓɛɛ wa tom ŋma betom nɛnɛ ɗoŋ-aa mɛ tɔ̧ ha̧ a̧‘e: ‹Ɛ́ɛ́ kɔ̧́ h’ɛ́nɛ́ mɛ ɔ wan zu yɛ na.›
15«Wa dee wan ha̧ a̧ kaɗi, ɓɛɛ a̧ pii ɗoŋ sa o wi-de-tom n'aa ha̧a̧ so sede ha̧ wa'i ha̧ a̧ mɛ zɔk mɔ nɛ̀ wa kpɔk kpɔk kpaa e zu sede'i. 16Kuti wi-de-tom tɛɛ tɔ̧: ‹Gasa Wan, mi kpaa mbe kɔya-lɔr ɓu a zu wan n’ɛnɛ ha̧a̧ ha̧‘m.› 17Ɓɛɛ wannu'i tɔ̧ ha̧ a̧: ‹Mɛ́ nɛ́ de wi-de-tom, ɓɛɛ hee mɔ'ɔ nɛ̀ mɛ mboo zu tɛ geɗek mɔ ga, mi ha̧a̧ ye ɓu ha̧ mɛ mɛ ɔ wan zu wa.› 18Yiitoo wi-de-tom tɛa ɓɛɛ tɔ̧: ‹Gasa Wan, mi kpaa mbe kɔya-lɔr mɔɔrɔ a zu wan n’ɛnɛ ha̧a̧ ha̧‘m.› 19Ɓɛɛ wannu'i tɔ̧ ha̧ a̧ mbɛt: ‹Mi ha̧a̧ ye mɔɔrɔ ha̧ mɛ mɛ ɔ wan zu wa.› 20Ŋma woyo tɛa, ɓɛɛ tɔ̧: ‹Gasa Wan, kɔya-lɔr k’ɛ́nɛ́ n'am kpoo so nú laa, bá é'ɛ, nɛ́ mɔ'ɔ. 21Kíì dea'm wen ɛ́nɛ́ de ko ha̧ bíí na; ɛ́nɛ́ ba mɔ fara n’ɛnɛ e mɔ sɛnɛ na, ɛ́nɛ́ mɔi̧ nyɔnɔ fara n’ɛnɛ gun mɔ sɛnɛ na mbɛt.› 22Ɓɛɛ wannu tɔ̧ ha̧ wi-de-tom'i: ‹Mɛ́ nɛ́ ɗaŋ wi-de-tom. Mi tɛ gɔn kita zu mɛ nyɛm nɛ̀ ɗoŋ wen kɔ-mɛ. Mɛ iŋa'e mi de ko na, mi ba mɔ fara n'am e mɔ sɛnɛ na, in mi mɔi̧ nyɔnɔ fara n'am gun mɔ sɛnɛ na mbɛt. 23Wen ge sa mɛ e sede kɔ‘m fara-e-sede, ɓɛɛ tɛ pia ɗoŋ kɔ‘m, mi tɛ̀ɛ́ kpa so mbe-a tikiɗi zu-a na ge?› 24Ɓɛɛ a̧ tɔ̧ ha̧ o bíí nɛ̀ ya hi̧i̧: ‹Ɛ̀nɛ̀ bá kɔya-lɔr'i er-a yinɛ, ɓɛɛ ɛ̀nɛ̀ há̧ ha̧ wi nɛ̀ a̧a̧ nɛ̀ kɔya-lɔr ɓu.› [ 25Ɓɛɛ wa kifa nú ha̧ a̧: ‹Gasa Wan, a̧ a̧a̧ nɛ̀ kɔya-lɔr ɓu nɛti kaɗi!›] 26Wannu tɔ̧ɔ̧ ha̧ wa: ‹Mi tɔ̧ h’ɛ́nɛ́, kóó o ndé nɛ̀ a̧a̧ nɛ̀ mɔ, wi tɛ e mbe-a zu-a ha̧ a̧, ɓɛɛ wi nɛ bó nɛ̀ mɔ na, wi tɛ ba kànà be mɔ nɛ̀ a̧a̧ er-a'i yinɛ.#Mt 13.12; Mk 4.25; Lk 8.18 27Ɓɛɛ nɛ̀ ko o wisɛn kɔ‘m nɛ̀ kɔ̧ so ha̧‘m mɛ ɔ wan zu wa na, ɛ̀nɛ̀ káí wa tɛnɛ, ɛ̀nɛ̀ gɔ́n ger-wa nɛ̀ yí‘m.› »
Jesu yee Jerusalɛm hee wannu ga
(Zɔk Mt 21.1-11; Mk 11.1-11; Jn 12.12-19)
28Ɗoŋ wen'i, Jesu duka ti mɛ daŋ si Jerusalɛm, in o giiwi. 29Wa hɛɗa ká̧ Bɛtfage in Betanii, ká̧ kaya nɛ̀‘i sa'e Kaya Te-nɔ̧́; nɛ́ mɔ'ɔ nɛ̀ Jesu toma o ŋma ŋgaiwi kɔ‘i yiitoo, ɓɛɛ tɔ̧ ha̧ wa: 30«Ɛ̀nɛ̀ nɛ́ tɛ be ye nɛ̀ a̧a̧ ti'nɛ́‘i; hɔa-a k’ɛ́nɛ́ hegɔ, ɛ́nɛ́ tɛ́ kpa ŋma be tuifuu nɛ̀ wa kuna, nɛ̀ ŋma bíí tɛ daŋ zu a̧ nɛti hɔ̧ɔ̧ na; ɛ̀nɛ̀ búr a̧, ɛ̀nɛ̀ fó a̧ tɛnɛ ha̧‘m. 31Ɓɛɛ kà ŋma bíí ak'nɛ́‘e, ɛ́nɛ́ bur a̧ wen ge nde? Ɛ̀nɛ̀ kífí nú ha̧ wi’ɛi'e: ‹Nɛ́ Gasa Wan a̧ kɔ̧ɔ̧ a̧.› » 32Nɛ́ mɔ'ɔ nɛ̀ o betom nɔ‘i yaka, ɓɛɛ wa kpa mɔ hee mɔ'ɔ nɛ̀ Jesu bàá tɔ̧ ha̧ wa ga. 33Wa ɓɔna fara bura tuifuu, ɓɛɛ o wan-aa ak wa: «Ɛ́nɛ́ bur be tuifuu’ɛ wen ge?» 34Wa kifa nú: «Nɛ́ Gasa Wan a̧ kɔ̧ɔ̧ a̧.» 35Nɛ́ mɔ'ɔ nɛ̀ wa mgbɔɔ be tuifuu'i nɛnɛ ha̧ Jesu, wa tata laa kɔ-wa ɗoŋ-aa, ɓɛɛ wa ba Jesu e zu a̧. 36Wa a̧ nɛ́ nɔ̀‘i, ɓɛɛ o bíí a̧ tati laa kɔ‘i yuwar'i. 37A̧ hɛɗa zira Kaya Te-nɔ̧́ kaɗi, ɓɛɛ o ŋgaiwi lɛŋ kpa desee, ɓɛɛ wa ku̧ naŋ zɔna Sɔ̧ nɛ̀ hee ger wen o mɔɔ-kifi lɛŋ nɛ̀ wa zɔka. 38Wa gaia mɔ:
«Toka-de-yoŋgo a̧ dúk zu wi nɛ̀ tɛ‘i nɛ̀ nin Gasa Wan,
a̧ nɛ́ wannu!
Ga̧a̧mɔ a̧ dúk yiwese,
ɓɛɛ gasamɔ a̧ dúk si yiwese ŋgɔn mɛ!»#Gima 118.26
39O ŋma Fariziɛn nɛ̀ yaa so mgbara giiwi tɔ̧ɔ̧ ha̧ Jesu: «Wan-usi-mɔ, ɛ̀nɛ̀ gáí o ŋgaiwi k’ɛ́nɛ́.» 40Ɓɛɛ Jesu kifi nú: «Mi tɔ̧ h’ɛ́nɛ́, kà wa nɛ́ kpee nú-wa, ɓɛɛ nɛ́ o ta a̧ tɛ hiɗi mɔ!»
Jesu aia nú wen zu Jerusalɛm
41Ŋgimbi nɛ̀ Jesu hɛɗa nɛ̀ Jerusalɛm, a̧ zɔka ye, ɓɛɛ a̧ hi̧i̧ kɔ̧a̧ wen zu ye'i. 42A̧ tɔ̧a̧: «Ho, Jerusalɛm! Sɔsɔɔ kà bó so ha̧ mɛ mɛ iŋ yuwar nɛ̀ mɛ tɛ de mɛ kpa nɛ̀ ga̧a̧mɔ gáà, mɛ tɛ̀ɛ́ kpa. Mɔ kpɔk, mɔ‘i ɔ hu̧sa̧ wen mɛ. 43Ŋma wese tɛ hɔ nɛ̀ o wisɛn kɔ-mɛ tɛ mbo garo zik mɛ, wa tɛ kɛr mɛ, ɓɛɛ wa kpee yuwar kɔ-mɛ lɛŋ. 44Wa tɛ mbɔli mɛ in o bem kɔ-mɛ nɛ̀ ya kɔ̧́ tua kɔ-mɛ, wa beka e ŋma ta tɛ-mɛ ɓɔn zu ŋmaa na mbɛt, wen mɛ iŋ ŋgimbi nɛ̀ Sɔ̧ tɛ̀ɛ́ nɛnɛ tɛ mɛ na.»
Jesu ndaka o wi-ɗɔr-mɔ kɔ̧́ Tua ko Sɔ̧ gbonɛ
(Zɔk Mt 21.12-17; Mk 11.15-19; Jn 2.13-22)
45Nɛ́ mɔ'ɔ nɛ̀ Jesu yee kɔ̧́ Tua ko Sɔ̧, ɓɛɛ a̧ ku̧ naŋ ndaka o wi-ɗɔr-mɔ gbonɛ, 46tɔ̧ nɛnɛ ha̧ wa'e: «Yɔramɔ tɔ̧a̧‘e: ‹Tua kɔ‘m tɛ duk nɛ́ tua-kɔfi-sɔ̧.› Ɓɛɛ k’ɛ́nɛ́, ɛnɛ zika e nɛ̀ di̧i̧ ko o kpɔ̧i̧-gba̧a̧-nin!»#Es 56.7; Jer 7.11
Usamɔ sɛn kɔ̧́ Tua ko Sɔ̧
47Jesu duka so usi nɛ̀ mɔ kɔ̧́ Tua ko Sɔ̧ wese kpɔk kpɔk, ɓɛɛ o gasa wan-ɗafi-sɔ̧ in o wi-usi-heembea in o gasawi kii war mɛ gbɛ a̧.#Lk 21.37 48Ɓɛɛ wa kpa yuwar-a na, wen bíí lɛŋ duka so zii nɛ̀ wen kɔ̧-a̧, yeŋ nɛ̀ zer sɛnɛ.
Избрани в момента:
LUK 19: GB11DC
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.