Popular Bible Verses from Dhewuteronome 30

Share

Nyamsi ni kombela nzuma ni mafu si txi maha tifakazi to ni emela kwanu, ti to ni vekile masoni kwako wutomi ni lifo, sikatekiso ni makhombo. Sawula wutomi, kasi ku u na hanya awe ni liveleko lako, ngako u txi randa MKOMA, Txizimu txako, u engisa dipswi dakwe, u namarela kwakwe; nguko ene ngene i ku wutomi wako ni kuanda ka masiku ako, kasi ku u na sikota kuzumba ka ditiko di MKOMA a nga xambanya ka vatate vako, Abrahamu, Isaake, ni Jakobe, ti to a na va ninga.

ngako u txi vekisa sirumo sa MKOMA, Txizimu txako, asi nyamsi ni ku leletako, u txi randa MKOMA, Txizimu txako, u tsimbila ngu tinzila takwe, ni kuxayisa sirumo sakwe, ni milayo yakwe, ni sileleto sakwe, u na hanya, kambe u na anda. MKOMA, Txizimu txako, a na ku katekisa, ka ditiko di u wulelako ka dona, kasi kuya di teka.

Wona ti to ni veka masoni kwako wutomi ni tinene, kufa ni kubiha

Aniko dipswi di hafuhi ngutu ni nawe, di txisofuni kwako ni mbiluni kwako, kasi ku u txi di xayisa.

MKOMA, Txizimu txako, a na kulisa mbilu yako ngu wukwera ni mbilu ya liveleko lako, kasi ku u txi sikota kuranda MKOMA, Txizimu txako, ngu yotshe mbilu yako, ni wotshe moya wako, kasi ku u na mana kuhanya.

Se MKOMA, Txizimu txako, a na maha ti to u humelela ka yotshe mithumo ya manza ako, muhando wa mndani kwako, ka muhando wa sifuyo sako, ni ka muhando wa mafu ako; nguko MKOMA a na tshumela e nengela ngu kukateka kwako, kufana ni ti a nga nengelisa tona ngu vatate vako

Kambe ngako mbilu yako yi txi hambuka, u si engisi, u tumela kundindwa, u khizama masoni ka simwani sizimu, u txi si khozela. Sekoko, na kugela nyamsi kukhani kha ditshuri u na lova; khu na mbi laphiselwa masiku a kuhanya ka ditiko diya, mbimo yi u no txhatuka mnambo wa Jordhani, uyako ka dona kasi kuya di teka.

Nguko mlayo wuwa ni ku leletako nyamsi, kha wu karati kwako, kambe kha wu nga txitimwi ka mitamo yako.

Wona kha wu nga nzumani, aha koza u txi womba ku khawe: “I mani a no hi tshunda kukwela a txi ya nzumani, kasi ku wu wuyisa kwathu, ti to hi sikota ku wu engisa ni ku wu xayisa, kani?”

Kambe kha wu nga mtxhatuko ka linene, aha koza u txi womba ku khawe: “I mani a no hi tshunda kutxhatuka, kasi ku wu wuyisa kwathu, ti to hi txi sikota ku wu engisa, hi wu xayisa, kani?”