Dhewuteronome 30
30
Sithembiso sa sikatekiso si nota
1Se kumaheka taku, ngako ti txi ta txitimwi kwako totshe tiya, mathomo mwendo makhombo ale ni nga ma womba kasi ku u sawula, u txi pimisa mbiluni kwako, hagari ka yotshe mifumo yile Mkoma, Txizimu txako, a no kuyisa ka yona; 2ni kungako u txi hundulukela ka Mkoma, Txizimu txako, u engisa dipswi da txona, ka ti totshe nyamsi ni ku leletako tona, awe ni vanana vako, ngu yotshe mbilu yako, ni wotshe moya wako. 3Sekoko Mkoma, Txizimu txako, a na kuhumisa ka wukhumbi wako, a txi ku mahela wumbilu; a na ku engisa, a txi ku tsanisa, u huma ngu ka otshe matiko ale a nga ti ku hangalisete ka ona.
4Hambi ngako vathu vako va di tutumisilwe va txi ya manekela magwito ka nzuma, koneyo Mkoma, Txizimu txako, a na va buthanisa, a txi va wuyisa ngu kona. 5Mkoma, Txizimu txako, a na ku wuyisa ka ditiko diya vatate vako va nga ti di fumete, kasi ku u txi di teka; ene a na kukatekisa, a txi kuandisa ngutu kupinda vatate vako. 6Mkoma, Txizimu txako, a na kulisa mbilu yako ngu wukwera ni mbilu ya liveleko lako, kasi ku u txi sikota kuranda Mkoma, Txizimu txako, ngu yotshe mbilu yako, ni wotshe moya wako, kasi ku u na mana kuhanya. 7Mkoma, Txizimu txako, a na maha ti to otshe makhombo awa me wela txitimwi ka valala vako, txitimwi ka vale va nga txi ku bavela, avale va nga txi kuxupha. 8Se awe u na tshumela u engisa dipswi da Mkoma, u xayisa sotshe sirumo sakwe, asi nyamsi ni ku leletako. 9Se Mkoma, Txizimu txako, a na maha ti to u humelela ka yotshe mithumo ya manza ako, muhando wa mndani kwako, ka muhando wa sifuyo sako, ni ka muhando wa mafu ako; nguko Mkoma a na tshumela e nengela ngu kukateka kwako, kufana ni ti a nga nengelisa tona ngu vatate vako, 10ngako u txi engisa dipswi da Mkoma, Txizimu txako, ngu kuxayisa sirumo sakwe ni milayo yakwe, ayi yi nga bhalwa dibhukuni muwa ka mlayo, ngako u txi hunduluka ngu yotshe mbilu yako ni wotshe moya wako, u txi wuya ka Mkoma, Txizimu txako.
11Nguko mlayo wuwa ni ku leletako nyamsi, kha wu karati kwako, kambe kha wu nga txitimwi ka mitamo yako. 12#Wona ni ka: Var. 10:6-8. Wona kha wu nga nzumani, aha koza u txi womba ku khawe: “I mani a no hi tshunda kukwela a txi ya nzumani, kasi ku wu wuyisa kwathu, ti to hi sikota ku wu engisa ni ku wu xayisa, kani?” 13Kambe kha wu nga mtxhatuko ka linene, aha koza u txi womba ku khawe: “I mani a no hi tshunda kutxhatuka, kasi ku wu wuyisa kwathu, ti to hi txi sikota ku wu engisa, hi wu xayisa, kani?” 14Aniko dipswi di hafuhi ngutu ni nawe, di txisofuni kwako ni mbiluni kwako, kasi ku u txi di xayisa.
Kuhanya mwendo kufa
15Wona ti to ni veka masoni kwako wutomi ni tinene, kufa ni kubiha; 16ngako u txi vekisa sirumo sa Mkoma, Txizimu txako, asi nyamsi ni ku leletako, u txi randa Mkoma, Txizimu txako, u tsimbila ngu tinzila takwe, ni kuxayisa sirumo sakwe, ni milayo yakwe, ni sileleto sakwe, u na hanya, kambe u na anda. Mkoma, Txizimu txako, a na ku katekisa, ka ditiko di u wulelako ka dona, kasi kuya di teka. 17Kambe ngako mbilu yako yi txi hambuka, u si engisi, u tumela kundindwa, u khizama masoni ka simwani sizimu, u txi si khozela. 18Sekoko, na kugela nyamsi kukhani kha ditshuri u na lova; khu na mbi laphiselwa masiku a kuhanya ka ditiko diya, mbimo yi u no txhatuka mnambo wa Jordhani, uyako ka dona kasi kuya di teka. 19Nyamsi ni kombela nzuma ni mafu si txi maha tifakazi to ni emela kwanu, ti to ni vekile masoni kwako wutomi ni lifo, sikatekiso ni makhombo. Sawula wutomi, kasi ku u na hanya awe ni liveleko lako, 20ngako u txi randa Mkoma, Txizimu txako, u engisa dipswi dakwe, u namarela kwakwe; nguko ene ngene i ku wutomi wako ni kuanda ka masiku ako, kasi ku u na sikota kuzumba ka ditiko di Mkoma a nga xambanya ka vatate vako, Abrahamu, Isaake, ni Jakobe, ti to a na va ninga.
Currently Selected:
Dhewuteronome 30: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.