Dhewuteronome 29
29
KUWOMBAWOMBA KA WURARU KA MOSI
(29:1--30:20)
Txizimu txi maha txitumelelano txa txiphya ni vathu
1Aawa mapswi nga txitumelelano, aawa Mkoma a nga ruma Mosi ti to e ma womba ka vanana va ka Israyeli, ditikoni ka Mowabhi, hahanze ka txitumelelano txi a nga txi maha navo, mmangoni ka Horebhi.
2Mosi a to ramba votshe va ka Israyeli e va gela ku khene:
Anu mi ti woni tiya totshe Mkoma a nga ti maha masoni kwanu, ditikoni ka Egipta, a txi mahela Faro, ni sotshe sithumi sakwe, ni dotshe ditiko dakwe. 3Sikarato sa hombe asi maso anu ma nga si wona, sidiwukiso ni sikombiso sa hombe. 4Aniko, kala ka ditshiku da nyamsi, Mkoma a ti sanzi ku mi ninga mbilu yo pimisa, ni maso o wona, ni tinzeve to engisa ati ta ku khene: 5“Ani ni mi tsimbitisile ngu txiwulani, mndani ka mune wa magumi a malembe, syambalo sanu kha sa sakala mimidini kwanu, hambi tikathula tanu kha ta sakala mikondoni kwanu. 6Mi ti si nga ni sakudya, hambi vhinya yo sela, hambi wusuke, kambe ni mi xayisile, mi tiziva ti to ani ngani Mkoma, Txizimu txanu.” 7Ngako mi di hokile ka wuwa wukhalo, Seyoni, mfumeli, Hesibhoni, ni Oge, mfumeli wa Bhasani, va humile va txi ta lwa ni nathu, aniko athu hi va xute, 8hi khozisile ditiko dawe hi di ningela di maha thomba ya va ka Rubheni, ni va ka Gadhi, ni ka hafu ya nyumba ya ka Manasi. 9Ngu toneto, xayisani mapswi a txitumelelano txiya, mi txi ma vekisa, kasi ku mi na humelela, ka totshe ti mi no ti maha.
10Anu motshe mi emile nyamsi ka Mkoma, Txizimu txanu, ni misungo ya tihunzu tanu, ni madhota anu, ni vathangeli vanu, ni votshe vathu va ka Israyeli, 11ni vanana vanu, ni vasikati vanu, ni mluveli wu a ku mu wugoveloni kwanu, kukhukhela ka wule a gangako tikhuni tako kala ka wule a rekako mati ako. 12Mi tile hawa kasi ku ta amukela txitumelelano txiya Mkoma, Txizimu txanu, a nga txi maha ngu txixambanyo nyamsi kumweko ni nanu, 13kasi ku nyamsi a txi mi maha ngamu yakwe, ni ti to ene apune, a txi va i di Txizimu txanu, nga ti a nga womba a txi xambanya ka vatate vanu, Abrahamu, Isaake ni Jakobe. 14Kha ni txi mahi ni nanu mokha txitumelelano txiya ni txixambanyo txiya. 15Aniko ni txi maha kambe ni wule a kuho kona hawa nyamsi kumweko ni nathu, masoni ka Mkoma, Txizimu txathu, kufana ni vale va si nga ho nyamsi kumweko ni nathu.
16Nguko anu ma tiziva ti hi nga hanyisa tona ditikoni ka Egipta, ni ti hi nga tsibilisa tona ngu hagari ka matiko ale mi nga ma tshawunyeta. 17Mi ma woni manyala awe ni sithombe sawe sa mapulango ni sa marigwi, ni sa silivhela ni sa nzalama, asile vona va ku naso. 18Ku nga thuke ku txi vaho hagari kwanu wamwamna mwendo wamsikati, mwendo mwaya mwendo lihunzu, ahale mbilu ya vathu va kona yi ti hambukisako ka Mkoma, Txizimu txathu, ngu kuya khozela sizimu sa ona matiko ale; kasi ku hagari kwanu ku si maneki mkoloti wu wu velekako mndonga wa nyongwa, mwendo wo bava. 19Kambe ku nga thuke ku txi maneka m'thu waku, ngako a di engisile mapswi a txixambanyo txiya, a txi ti dhumisa mbiluni kwakwe, a txi khene: “Ni na va ni kudikha, hambi ni txi ti ningetetela ka ta walo, madingano ni kuranda ka mbilu yangu, nguko kutala ka mati ku na thavisa ditora.” 20Mkoma kha na mbi m'divalela, nguko kuhenya kwakwe ni txiviti txakwe, si na tura txitimwi ka eneyo m'thu, a txi welwa ngu otshe makhombo, aawa ma nga bhalwa ka diya dibhuku, se Mkoma a na pfhita ditina dakwe hahatshi ka nzuma. 21Mkoma a na mthavisa, a txi m'veka phuho ka totshe tihunzu ta ka Israyeli, a na welwa ngu makhombo otshe ma nga bhalwa ka dibhuku da mlayo.
22Liveleko li li no maneka, i ku situkulwana sanu si si nota ngu msana kwanu, ni valuveli vale va nota ngu matikoni ka kule, ngako va txi ta wona makhombo a dona ditiko diya, ni mitungu yi Mkoma a no xanisa ngu yona ditiko; 23#Wona ni ka: Gen. 19:24-25. se dotshe ditiko di hyite ngu txivavula ni mnyu, kha di na mbiswa di txi phawa txilo, kha di na mbiswa di txi mila txilo, hambi ni mwasi kha wu na mbiswa wu txi mila, ku nga kuloviswa ka Sodhoma ni Gomora, Adhimi ni Zebhoyimi, madhoropa ale Mkoma a nga ma lovisa ngu kuhenya kwakwe ni txiviti txakwe;”
24ni otshe matiko ma na kha ona: “Ngu kutxani Mkoma a txi ti maha toneto ka ditiko diya kani? Ti txhamusa txani kutura ka hombe ka kuhenya kwakwe kani?” 25Sekoko vathu va na xamula va txi kha vona: “Nguku va nga hambana ni txitumelelano txa Mkoma, Txizimu txa vatate vawe, atxi a nga ti mahile navo mbimo yile a nga va thavisa ditikoni ka Egipta; 26se va tiya thumela simwani sizimu, va txi si khozela, sizimu si vona va nga si si zivi, asile Mkoma a nga ti va tsimbile ku si khozela. 27Ngu toneto, Mkoma a henyile e wukela ditiko diya, e wisa txitimwi ka dona otshe makhombo awa ma nga bhalwa ka dibhuku diya. 28Mkoma a va rurisile ditikoni kwawe ngu kuhenya, ni txiviti, ni kuhenya ka hombe, e va vinza ka dimwani ditiko, nga ti hi ti wonako nyamsi.”
29Simaha so sisala si lumba Mkoma, Txizimu txathu; aniko simaha si si wonekako, si lumba athu ni vanana vathu, yotshe mbimo, kasi ku hi na xayisa mapswi a mlayo wuwa.
Currently Selected:
Dhewuteronome 29: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.