Dhewuteronome 28
28
Makatekwa ka vo engisa
(Valevhi 26:3-13; Dhewuteronome 7:12-24)
1“Se ku na maheka taku, ngako u txi pfa dipswi da Mkoma, Txizimu txako, u vekisa sotshe sirumo sakwe, asi ni ku leletako nyamsi, Mkoma, Txizimu txako, a na kuguleta txitimwi ka yotshe mifumo ya ha mafuni. 2Se otshe makatekwa ma nata txitimwi kwako, me ta kufenengeta, ngako u txi engisa dipswi da Mkoma, Txizimu txako:
3U na katekiswa amuwa didhoropani, u katekiswa kambe ni thembweni.
4Wu na katekiswa muhando wa mndani kwako, ni muhando wa thembweni kwako, ni muhando wa sifuyo sako, i ku marole a tihomu tako, ni sinvutana sa tinvuta tako.
5Ku na katekiswa thavangu yako, ni ditxhelo dako.
6U na katekiswa mbimo yi u wulelako, u katekiswa ni mbimo yile u humako.
7 Mkoma a na ningela valala vako, vale va no kuwukela, ve dawa masoni kwako; va nata ngu nzila yimweyo kutalwa ni nawe, aniko va nata hangalaka ve thava ngu mtxhanu wa tinzila ni timbidi.
8 Mkoma a na ruma ti to makatekwa ma txi simama kwako, amu sizendani kwako ni ka yotshe mithumo ya manza ako; kambe a na kukatekisa ka ditiko dile a no kuninga.
9 Mkoma a na kumaha ditiko dakwe do sawuleka, nga ti ene a nga ku xambanyela, ngako u txi vekisa sirumo sa Mkoma, Txizimu txako, ni kungako u txi tsimbila ngu tinzila takwe. 10Se vathu va mafu otshe, va na ti wona ti to u dhanwa ngu ditina da Mkoma, va na kuthava. 11Mkoma a na andisa sihiwa sa mihando ya mndani kwako, ni sa mihando ya thembweni kwako, ka ditiko di Mkoma a nga xambanya ka vatate vako ti to va na kuthava.
12 Mkoma a na kutulela thomba yakwe ya yinene, i ku nzuma, kasi ku e nisa mati ngu mbimo ya kona amu ditikoni kwako, ni kukatekisa wotshe mthumo wa manza ako; awe u na txenekisa ka mifumo yotshe, aniko awe khu na mbi txeneka, txilo ka yona. 13Se Mkoma a na kuveka kuva msungo, i si nga ka mkila, mbimo yotshe u na va u di txitimwi, i si nga kuva u di hahatshi, ngako u txi engisa ni kuvekisa sirumo sa Mkoma, Txizimu txako, asiya nyamsi ni ku leletako ti to u txi si vekisa, ni ku si londisa. 14Ngako u si hambuki uya txinene mwendo txibhabha, ka otshe mapswi ale ni ku leletako ona, kasi u si londisi simwani sizimu, u txi si thumela.”
Sitsayiso ka vo mbi engisa
(Levhi 26:14-46)
15Kambe ku na maheka taku, ngako u si engisi dipswi da Mkoma, Txizimu txako, u si khatali ngu kuvekisa sotshe sirumo sakwe ni sotshe sileleto sakwe, asi nyamsi ni kugelako, ni txi kuninga, makhombo otshe ma na wa txitimwi kwako, ma txi kupfinya.
16U na ruketelwa amu didhoropani, u ruketelwa kambe thembweni kwako.
17Txi na ruketelwe txirundu txako ni ditxhelo dako.
18Yi na ruketelwa mihando ya mbeleko yako, ni mihando ya thembweni kwako, marole a tihomu tako ni sinvutana sa tinvuta tako.
19U na va ni dikhombo kuwulelani kwako, kambe u na va ni dikhombo kuhumani kwako.
20 Mkoma a na kurumela makhombo, ni kuxaniseka, ni kumwalalelwa ka yotshe mithumo ya manza ako, kala u txi loviswa, u fuviswa ngu txikuluveta, ngu mhaka ya kubiha ka mithumo yako, yile u nga ni leka ngu yona. 21Mkoma a na maha ti to mtungu wu txi namarela kwako, kala wu txi kufuvisa ka ditiko di u wulelako ka dona, kasi ku u txi di teka. 22Mkoma a na kupeka ngu malwati a ndere ni txindeyandeyane, ni kusimba, ni kuhisa, ni lisani, ni kusina ka timbewu, ni kubhirela, asi si no kunamarela kala u txi fuva. 23Nzuma yi ku txitimwi ka msungo wako, yi na banga nga koporo, ni mafu hahatshi ka mikondo yako, ma na nga simbi. 24Mkoma a na leka kunisa mati, ditikoni kwako, a txi nisa dikhuma ni lithulu, asi si no kuwela, si txi ta ngu nzumani, kala kuza u txi lova. 25Mkoma a na maha ti to u txi xulwa ngu valala vako, u na huma u txi yalwa ni valala vako ngu nzila yimweyo, kambe u na ya tutuma u txi thava ngu mtxhanu wa tinzila ni timbidi, masoni kwawe! U na va txixamaliso ka mifumo yotshe ya ha mafuni 26txirumbi txako txi na va i di sakudya ka sinyana sa nzuma, ni sa sihari sa mafu; eho kha ku na mbi va ni wammweyo wa ku si dinda.
27 Mkoma a na kuxupha ngu silonda sa mazuku a Egipta, ni sithunye, ni txigwere, ni mathanzi, kha ku na mbi maneka wa ku kuhanyisa ka sona. 28Mkoma a na kutsayisa ngu lizungu, ni wubhofu, ni wuhundwa; 29ni mitshikari, u na tsimbila ngu kumbumbutela nga dibhofu, adi di mbumbutelako mtemani, mithumo yako kha yi na mbi humelela kotshe tinzilani kwako. U na xuphwa u txi handwa otshe masiku, ku si maneki ni wammweyo wo kuvhikela.
30U na wuta msikati aniko mmwani wamwamna a na otela nayo, u na aka nyumba kambe khu na mbi zumba ka yona; u na dima u txi phaya mivhinya, aniko khu na mbi dya mihando ya kona. 31Homu yako yi na dawa u txi yi wona, kambe khu na mbi dya nyama ya kona; mbongola yako yi na tekwa masoni kwako, aniko kha yi na mbi tshumela yi txi wuya kwako; tinvuta tako ti na ningwa valala vako, ku si maneki ni wammweyo wo kulwela.
32Vanana vako va mazambi ni vamahorana va na ningelwa ka yimwani mifumo; ni maso ako ma na ti wona toneto, ma txi dokovela ngu kuxuva wusiku ni mitshikari, aniko dianza dako di na pwata mtamo, di si sikoti kumaha txilo. 33Mihando ya thembweni kwako ni ya mithumo yako yotshe, yi na dyiwa ngu vathu vale u si va ziviko, kambe awe u na xaniswa u txi xuphwa otshe masiku. 34U na maneka u txi hundeka ngu totshe ti u no ti wona ngu maso ako. 35Mkoma a na kupeka ngu silonda sa mazuku o thisa, amu mazoloni kwako, ni mu minengeni kwako, asi u no mbi va ni kuhanya ka sona, kukhukhela sizenendeni ka mikondo yako, kala ha msungo.
36 Mkoma a na ku rurisa awe, kumweko ni mfumeli wule u no va u di m'vekile txitimwi kwako, a txi kuyisa ka ditiko di u si di ziviko awe ni vatate vako, se koneyo u na ya khozela simwani sizimu, so mahwa ngu mapulango ni marigwi. 37U na va u di txidiwukiso, ni txisekiso, ni txiruko, hagari ka vathu votshe vava, Mkoma a no va a di ku yisile kwawe.
38U na dima u txi phaya mbewu yayingi thembweni kwako, aniko u na elula sa sidotho, nguko humbi yi na si heta. 39U na dima u txi phaya mivhinya, u txi yi sakulela, aniko khu na mbi sela vhinya ya kona, hambi kuhapha mauvha a kona, nguko mpungu wu na ma pukutela. 40U na va ni miolivha kotshe ditikoni kwako, aniko khu na mbi tola mafura a kona, nguko mihando ya kona yi na mora. 41U na veleka vanana va mazambi ni vamahorana, avale va no mbi kulumba, nguko va na tsula wukhumbini. 42Yotshe mindonga yako ni mihando ya mafu ako, si na dyiwa ngu sikalani.
43Awule i ku mluveli a zumbako hagari kwanu, a na humelela ngutu txitimwi kwako, se awe u na wa ngutu hahatshi. 44Ene a na ku txenekisa awe, kambe awe khu na mbi mtxenekisa txilo; ene ngene a no va a di masoni kwako, kambe awe u na va u di mkila kwakwe.
Magwito a kuwombawomba ka wumbidi ka Mosi
45Otshe makhombo awa ma na wa txitimwi kwako, ma txi kulondetela, ma txi kukhubhunyeta, meza me kulovisa, kala u fuva, nguko awe khwa engisa dipswi da Mkoma, Txizimu txako, kambe khwa vekisa sirumo sakwe ni milayo yakwe, ayile a nga kuleleta yona. 46Makhombo awa ma nava i di txikombiso ni txidiwukiso masoni kwako, ni ka liveleko lako, kala kupinduka, 47nguko khwa thumela Mkoma, Txizimu txako, ngu kutsaka ni kubasa ka mbilu, ngu mhaka ya kutalelwa ngu silo sotshe. 48Na nawe u na khozela valala vako, avava Mkoma a no va rumela, kasi ku ta kuwukela u di ni nzala, ni ditora, ni wusakato, ni kupwata sotshe; a na va ruma va txi sanzeka dikange da simbi thamoni kwako, kala u txi loviswa.
49 Mkoma a na ku tisela mfumo wa kuta ngu kule, mfumo wa magwito ka mafu, awule wu nota ngu kupuruma nga ngungwa, mfumo wu wu wombawombako ngu lidimi li awe u si li ziviko. 50Awule mfumo wu ku ni khohe yo banga, awule wu si tsetsiko vale i ku vo kumba, mfumo wu wu si tsetsiko vanana. 51Wona wu na dya marole a sifuyo sako, ni mihando ya mafu ako, hambi mtona, hambi marole a tihomu tako, ni sinvutana sa tinvuta tako, kala kuza u txi lova. 52Wona wu na kurandela amu ka madhoropa ako otshe, kala kuza ma txi khundumuka maguma o demba a madhoropa ako otshe o tsana, aawa u nga ti ma themba amu ka dotshe ditiko dako, wu na kurandela ka otshe madhoropa ako, amu ka dotshe ditiko dile Mkoma, Txizimu txako, a ku ningako. 53Se ngu mhaka ya kuxaniswa, ni kurandelwa ngutu ngu valala vako, u na dya mihando ya mndani kwako; i ku nyama ya vanana vako va mazambi ni vamahorana, avale Mkoma, Txizimu txako, a nga kuninga.
54Hambi m'thu wo ti themba, awu i ku txivelekwa, hagari kwanu, a na wona ngu maso a kubonzolota mwanawe, ni msikati wule i ku txirandwa txakwe, ni vanana vakwe vale va nga sala va txi hanya; 55kha ti lavi kuha ni wammweyo, nyama ya vanana vakwe, ayi a no dya, ngu kuva asi nga ni txilo, ngu mhaka ya kurandelwa ni kuxaniswa ngu valala vako, avale va no kupfinya, amu madhoropani kwako kotshe.
56Wamsikati wa kutithemba, awu i ku txivelekwa, kwanu, awu asi laviko ni kukanda hahatshi ngu mhaka ya wuvelekwa wakwe, a na wona ngu maso a kubonzolota wamwamna wu i ku txirandwa txakwe, kumweko ni mwanana wakwe wa dizambi ni wa dihorana. 57#Wona ni ka: 2 Vafu. 6:28-29; Sid. 4:10. Hambi ni mwanana wakwe wo ngadi kuvelekwa, ni digulo di di humako hagari ka minenge yakwe, nguko ngako ku txi guma sotshe, ene a na dya a di mu kusisalani, ngu mhaka ya kurandelwa ni kuxaniswa ngu valala vako, amu madhoropani kwako kotshe.
58Ngako u si khatali ngu kuvekisa otshe mapswi a mlayo wuwa, aawa ma nga bhalwa ka dibhuku diya, ni kuthava ditina diya da wudhumo ni kuthisa, da Mkoma, Txizimu txako, 59Mkoma a na kupeka awe ni liveleko lako, ngu mitungu yo xamalisa, mitungu ya hombe ya kusimasima yi si pindi, mipando yo biha, yo mbi kalamuka. 60Mkoma a na wuyisa kwako mitungu yotshe ya Egipta, ayile yi nga kudhukisa, ayile yi no thapela kwako. 61Kambe Mkoma a na rumela kwako yotshe mipando ni mitungu, ayi yi nga mbi bhalwa ka dibhuku diya da mlayo, kala kuza u txi fuviswa. 62Ku na sala vathu vavadotho kwanu, anu mi nga ti vavangi nga tinyeleti ta nzumani. Ngu mhaka ya kwa mbi engisa kwanu dipswi da Mkoma, Txizimu txanu. 63Ngu toneto, kufana ni kuwa Mkoma a nga txi tsaka ngu ku mi mahela ta tinene, ni ku mi andisa, kufana ni toneto, a na tsaka kambe ngu kuva mi txi loviswa, mi txi fuva; nanu mi na dulwa mi txi humiswa ka ditiko di mi yelako kuya di teka.
64Se Mkoma a na mi hangalasa hagari ka matiko otshe, kukhukhela magwito ka mafu kala kumwani magwito ka mafu, se koneyo u na ya khozela simwani sizimu, asile awe ni vatate vako mi nga mbi si ziva, so mahwa ngu mapulango ni marigwi. 65Hagari ka onawo matiko, khu na mbiswa u txi mana kuthutha, ni mkondo wako kha wu na mbi mana wukhalo wo humula ka wona. Koneyo, Mkoma a na kuninga mbilu yo dhudhumela, a na kuninga maso o zengela, ni kuhefemula ka madidikhana. 66Wutomi wako wu na juwela nga wu to sungwa ngu ngoti masoni kwako; u na va ni madhukano, wusiku ni mitshikari, khu na mbi va ni themba kuhanyani kwako. 67Ni mixo u na womba u txi khawe: “O! I ti ku do swa ditambo!” Ni minova u na womba u txi khawe: “O! I ti ku ko maha mixo!” Ngu mhaka ya sidiwukiso si u no si wona ngu maso ako. 68Mkoma a na mi tshumeta mi tsula Egipta ngu ngalava, ngu nzila yile ni nga mi gela ni txi khani: “Khu na mbiswa u txi yi wona kambe!” Koneyo, mi na ya ti xayisa, vavamna ni vavasikati ka valala vanu, kasi ku mi maha tikhumbi, aniko kha ku na mbi maneka wo mi xava.
Currently Selected:
Dhewuteronome 28: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.