Dhewuteronome 27
27
Kutilulamisela kasi kuwulela Kanana
1Se Mosi ni madhota a va ka Israyeli, va to laya vathu, va txi kha vona:
“Vekisani sotshe sirumo si nyamsi ni mi ningako. 2Ku na maheka taku, ka ditshiku di mi no txhatuka mnambo wa Jordhani, mi txi ya wulela ka ditiko dile Mkoma, Txizimu txako, a no kuninga, u na ya emisa marigwi a hombe, u txi ma penda. 3Se ngu txitimwi ka ona, u na bhala otshe mapswi a mlayo wuwa, ngako u txi thuka u txi ya wulela ka ditiko dile, Mkoma, Txizimu txako, a no kuninga, ditiko dile di khulungako masi ni wulombe, nga ti a nga ku gelisa tona Mkoma, Txizimu txa vatate vako. 4Se ku na maheka koko taku, msana ka kuva u di txhatukile mnambo wa Jordhani, u na ya emisa ona marigwiyo, nga ti nyamsi ni mi leletisako tona, txitimwi ka mmango wa Ebhali, u na ya ma penda ngu dibumba. 5Se koneyo u na ya aka txiluvelo txo lumba Mkoma, Txizimu txako, ngu txiluvelo txa marigwi txo mbi khwekhwetwa, ngu simbi. 6Ngu marigwi o mbi khwekhwetwa u na ya aka txiluvelo txa Mkoma, Txizimu txako; se txitimwi ka txona u na ningela mphaxo wo hiswa ka Mkoma, Txizimu txako. 7Koneyo u na ya maha mningelo wa mpatano, kambe u na ya dya u txi tsaka, masoni ka Mkoma, Txizimu txako. 8Se txitimwi ka ona marigwiyo, u na bhala otshe mapswi a mlayo wuwa, u txi ma txhamusa ta tinene.”
9Mosi a to womba-womba kkambe ka vaphaxeli va Valevhi, ni ka votshe va ka Israyeli, a txi khene:
“Zumba u di malate, kambe engisa, awe Israyeli: Nguko nyamsi u ditiko ka Mkoma, Txizimu txako. 10Ngu mhaka yeto, u na engisa dipswi da Mkoma, Txizimu txako, u txi xayisa sirumo sakwe ni milayo yakwe, ayile ni nga kuleleta nyamsi.”
Siruko
11Se ka donedo ditshiku, Mosi a to laya vathu, a txi khene:
12Mbimo yi mi no txhatuka mnambo wa Jordhani, ava va no ema mmangoni ka Garizime, kasi kukatekisa vathu, gu vava: Simiyoni, ni Levhi, ni Judha, ni Isakari ni Josefa, ni Bhenjamini. 13Se ava va no ema mmangoni ka Ebhali, kasi kuva txi womba mapswi a kuruketela, ngu vava: Rubheni, ni Gadhi, ni Aseri, ni Zebhuloni, ni Dhani, ni Naftali. 14Se va ka Levhi va na womba ngu dipswi da hombe ka vathu votshe va ka Israyeli, va txi kha vona:
15 # Wona ni ka: Eks. 20:4; 34:17; Levh. 19:4; 26:1; Dhewut. 4:15-18; 5:8. “Dikhombo di nave ka m'thu wule a mahako txithombe txo vatwa, mwendo txo bhakwa, nguko manyala ka Mkoma, tximaha txa mthumo wa manza a vathu, a txi txi khozela kusisalani!” Se vathu votshe va na womba va txi kha vona: “Amen!”
16“Dikhombo di nave ka wule a vengako tate wakwe ni mame wakwe!” Vathu votshe va na womba va txi kha vona: “Amen!”
17“Dikhombo di nave ka wule a txitxako muhingano wa muakelani wakwe!” Vathu votshe va na womba va txi kha vona: “Amen!”
18“Dikhombo di nave ka wule a timetako dibhofu ha nzila!” Vathu votshe va na womba va txi kona: “Amen!”
19“Dikhombo di nave ka wule a hambukisako fanelo ya mluveli, ni ya wo felwa ngu vaveleki, ni noni!” Vathu votshe va na womba va txi kha vona: “Amen!”
20“Dikhombo di nave ka wule a otelako ni msikati wa tate wakwe, nguko wa vhunungula didhamba da tate wakwe!” Vathu votshe va na womba va txi kha vona: “Amen!”
21“Dikhombo di nave ka wule a otelako ni txihari!” Vathu votshe va na womba va txi kha vona: “Amen!”
22“Dikhombo di nave ka wule a otelako ni ndiyakwe, i ku mwanana wa tate wakwe, mwendo mwanana wa mame wakwe!” Vathu votshe va na womba va txi kha vona: “Amen!”
23“Dikhombo di nave ka wule a otelako ni mkokati wakwe!” Vathu votshe va na womba va txi kha vona: “Amen!”
24“Dikhombo di nave ka wule a dayako muakelani wakwe kusisalani!” Vathu votshe va na womba va txi kha vona: “Amen!”
25“Dikhombo di nave ka wule a tumelako kufidhwa kasi kudaya m'thu wo mbi na mnandu!” Vathu votshe va na womba va txi kha vona: “Amen!”
26 # Wona ni ka: Vag. 3:10. “Dikhombo di nave ka wule a si ñolisisiko mapswi a mlayo, asi ma vekisi!” Vathu votshe va na womba va txi kha vona: “Amen!”
Currently Selected:
Dhewuteronome 27: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.