Dhewuteronome 26
26
Miningelo ya so elulwa
1Se ku na maheka taku, mbimo yi u no wulela ka ditiko dile Mkoma, Txizimu txako, a no kuninga, di txi maha thomba yako, u txi di teka ni kuaka ka dona, 2#Eks. 23:19. sekoko u na teka mihando yo khata ka yotshe mihando yile u no elula ka dona ditiko dile Mkoma, Txizimu txako, a no kuninga, u na yi veka amu ka txirundu, u txi tsula nayo ka wukhalo wule Mkoma, Txizimu txako, a no wu sawula, kasi ku ditina dakwe di txi dhumiswa ka wona. 3Se u nata ka mphaxeli wule a no va a di ha mthumoni, ka masiku oneyo, u txi ya khawe kwakwe: “Nyamsi na ti bika ka Mkoma, Txizimu txathu, ti to ni bwakile ka ditiko diya Mkoma a nga xambanyela vatate vathu, ti to a na va ninga dona.” 4Se mphaxeli a na teka txirundu manzani kwako, e txi veka masoni ka txiluvelo txa Mkoma, Txizimu txako. 5Sekoko awe u na womba ka Mkoma, Txizimu txako, u txi khawe:#26:5 Mwendo: Muaramu. “Tate wangu, i ti Muaramu wa mpepeseki, ene a relete ditikoni ka Egipta, a txi ya aka kona, a di ni vathu vavadotho; ngu msana a mahile mfumo wa hombe, wa mtamo, wa vathu votala. 6Aniko Vaegipta, va hi xuphile ni ku hi xanisa, va txi hi thumisa mithumo ya wukhumbi yo nemela. 7Sekoko hi to peka huwa, ka Mkoma, Txizimu txa vatate vathu; se Mkoma a engisile dipswi dathu, e wona wukhumbi wathu, ni mithumo yathu ni kuxupheka kwathu. 8Se Mkoma a to hi humisa ditikoni ka Egipta ngu dianza da mtamo, ni diwoko do nawulutwa, hagari ka kudhuka ka hombe, kumweko ni sikombiso ni sidiwukiso; 9se a hi tisile ka wuwa wukhalo, a txi hi ninga ditiko diya, ditiko di di khulungako masi ni wulombe. 10Se wona taku, ni tisile mihando yo khata ya mafu awa u nga ni ninga, awe Mkoma.”
Sekoko u na yi veka masoni ka Mkoma, Txizimu txako, kambe u na khizama masoni ka Mkoma Txizimu txako. 11Se u na tsaka, u tsakela totshe tinene tile Mkoma, Txizimu txako, a nga ku mahela awe ni yotshe nyumba yako, kumweko ni Mlevhi ni mluveli wule a zumbako hagari kwanu.
Sa wugumi
12 # Wona ni ka: Dhewut. 14:28-29. Ka dilemba da wuraru, dilembe da sa wugumi, ngako u di gwitile kuthavisa sa wugumi ka sotshe sile u nga elula, u na si ningela ka Mlevhi, ni ka mluveli, ni ka wo felwa ngu vatate, ni noni, kasi kuva txi dya, ve khura amu didhoropani kwako. 13Se awe u na ya womba masoni ka Mkoma, Txizimu txako, u txi khawe: Ni thavisile#26:13 Txihebheru wusawuleki wa nyumbani kwangu. amu nyumbani kwangu asi si nga sawuleka, ni txi si ningela ka Mlevhi, ni ka mluveli, ni ka wo felwa ngu vaveleki, ni ka noni, nga ti u nga ni leletisa tona. Kha na ndaka, kambe kha na divala sirumo sako. 14Kha na dya txilo kupandisekani kwangu, ni mbimo yile ni nga maneka ni sa basa, kha na thavisa txilo ka sona, hambi kumaha mningelo ngu sona ka vafi; ni engisile dipswi da Mkoma, Txizimu txangu, kambe ni mahile totshe nga ti u nga ni leletisa tona. 15Wonisisa u di ha wukhaloni kwako ko sawuleka ka nzumani, kambe katekisa ngamu yako ya ka Israyeli, kumweko ni mafu ale u nga hi ninga, nga ti u nga xambanya ka vatate vathu, ditiko di di khulungako masi ni wulombe.
Va ka Israyeli, mbathu va Txizimu
16Ka ditshiku diya, Mkoma, Txizimu txako, a kuleleta ti u fanelako ku ti maha ngu milayo yiya ni sileleto siya, u na yi vekisa ni ku yi maha ngu yotshe mbilu yako ni wotshe moya wako. 17Nyamsi u tsanisile ti to Mkoma, ngene i ku Txizimu txako, ni ti to u na tsimbila ngu tinzila takwe, ni kuvekisa milayo yakwe, ni sileleto sakwe, ni sirumo sakwe, ni kuengisa dipswi dakwe. 18#Eks. 19:5. Se Mkoma a tsanisile nyamsi tito, awe u ditiko da kulumba ene apune, nga ti a nga kuthembisa tona, ni ti to u fanete kuxayisa sotshe sirumo sakwe. 19Kasi ku a na kuguleta txitimwi ka otshe matiko awa a nga ma maha, u txi ma pala otshe ngu wudhumo ni nduma, ni kupfaliswa, u txi maha ditiko di di nga sawulekiselwa Mkoma, Txizimu txako, nga ti ene apune a nga wombisa tona.
Currently Selected:
Dhewuteronome 26: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.