Popular Bible Verses from Mako 9

Share

Yesu amukumbulwile ngwenyi, Wambe ngwove nge ngunahase! Vyosena navihashiwa kuli ou mwafwelela.

Hahaze vene ise yauze mukweze atambakanyine ngwenyi, Ngunafwelela vene. Ngukafweko mweshomwo ngunahonena mulufwelelo lwami!

Kaha omu Yesu engilile muzuvo, tumbaji twenyi vamuhulishile kwauka wavo ngwavo, Mwomwo ika etu katwahasanga kumulovolako? Avakumbulwile ngwenyi, Ava vangana kaveshi kuhasa kulovoka nachuma chekako, shina nakulomba kaha.

Mungwa wapwa wamwaza, oloze nge mungwa unasamuka lyehi, namuuyemesa cheka naka? Pwenunga namungwa muli enu, kaha twamenunga mukuunda navakwenu.

Weshowo mwatambula kanyike wamundende umwe ngana ou, mulijina lyami, natambula Ami. Kaha weshowo mwangutambula, katambwile Amiko, oloze Uze angutuma.

Mwomwo weshowo mwamihana lupasa lwameya akunwa mulijina lyami hakupwa muvatu jaKulishitu, mwamuchano nangumilweza ngwami, Keshi kukazeneka wana wakumusakwililako.

Weshowo mwavulumwisa umwe wavo ava vavandende vángufwelela, chawahile kachi vamukashilile lilolwa lyalinene lyakuchekela unga mushingo nakumumbila mukalungalwiji.

Kaha nge liso lyove lyeji kukuvulumwisanga, litombongonyemo. Chinawahe ove kwingila naliso limwe muwangana waKalunga, kuhambakana kupwa nameso avali nakukumbila mu Ngehena