DANGYASARAO 6
6
Sni buthu khe saikho ba
1Bo basain buthu ha rikphayarao bangdao phalang bani, bonsi nalai bo jinis ron ba ha, bonsi ni banjikrao khe baoya bani, Juda, Greek grao joyarao khe Juda, Hebrai grao joyarao ni basao ha berlai ba. 2Odehe, bonsi jhigin Apostolrao, subung buthu khe jarni ha long hi thi ba, Madai ni grao khe sainthi ba haiger hi basang basao ha jing khusi dangba de ham nang niya. 3Odebani, daphlungrao, nisi jarni bising ni phrang girikyaba ode Bese ha gablaiyaba subung, bumu hamba sni khe saikho lah; bonsi khe jing ebo buthu khe bisar khlai mane slam lai nang. 4Thikhabo jing de, biyaba jang grao ni khusi dang hi ning dong ma se, ode bonsi thi ba.
5Bo grao jang khrip subung buthu khe khaja ri du. Odebani, Stephan, lonma jang Bese Gathar ha gablaiyaba, Philip, Prokor, Nikanor, Timon, Parmen jang Nikol, Judarao niha hapyaba, Antiokei ni subung, khe bonsi saikho ba. 6Bo buthu khe apostolrao ni sagang ha song ri ba, ode bonsi ni basao ha bonsi yao denghi bonsi bi ba.
7Boha, Madai ni grao gublung thar ba, Jerusalem ha rikphayarao hamsi ning bangdao phalang ba. Ode, Jentail ni bising habo, lonma ha bonsi maniyaba ja kha.
Stephan khe rem bani grao
8Ode Stephan de gasainyaba ode raothai jang gablai bani, subung ni bising ha gmang thaosisi, ode sin gede gede bo phnu re. 9Thikhabo, gejesi Judarao, ‘leng ni phrang goyarao’ thiyarao, Kurini nolei ar Aleksandria nolei buthu ha dongyarao, Kilikia raji ni subung gejesi, Asia raji ni subung gejesi, bonsi gaba lai hi, Stephan khe ran ba. 10Thikhabo, boni girikma jang bokhe thipha riyaba Bese khe bonsi bo ni phrang hokhlai phuya. 11Odese, subung buthu sereba sereyaba khe thi ba, Moses jang Madai khe se sijiba thihi jing khna ba! 12Elei ning subung buthu, khraorao, Dara khe slingriyarao, bonsi jaokhu hi, Stephan khe rem hi, bisardarrao niha lang ba. 13Odehe, bonsi mosol sakhi slam hi, ebo buthu khe thi ba, Ebo subung de ebo gathar hathan jang Dara khe hamsi ning siji re; 14ebo Nazareth Jisu la ebo noh khe ruhi, Moses ni dara jinthane riyaba buthu khe gibin khlai nang, thihi bo thiba khe jing khna ba. 15Boha, bisardarrao khrip bo Stephan khe nailai ba, boni mukhang khe degla ni mukhang lai bonsi nu ba.
Currently Selected:
DANGYASARAO 6: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
