DANGYASARAO 7
7
Stephan grao thi ba
1Jonthai dedao thaoyaba thi ba, Ebo grao buthu la gibi ning?
2Boha Stephan thiphin ba, Daphlungrao, Bupharao, khna lah! Jini greng Abraham Haran ha dong bani sagang ha ning, Mesopotamia raji ha bo dong khali, muima ni Madai de boni ha nujao phai hi, 3boniha thi ba, Nini nolei jang nini greng ni phrang baigo hi, ninthane raji phnu riginyaba gede thang lah, thihi thi ba 4Ode, bo de Kaldai raji ni phrang baigo hi, Haran ha dong hi kha. Ode, boni bupha thih bani yaohon ha, oraha ni phrang se duha dongyaba noh dongthan nogor gede Madai ning bokhe jai riphin ba. 5Eraha de musi hathan khebo dong mane, boni igah dengthan bo bonthane riya; thikhabo, bo jang boni yaohon ni sarik surik sosi bo, don somphoti ne khlai hi ri mane bo basa mai mani sagang habo hanggai ba. 6Boha Madai boni ha thi ba, Nini sarik surik buthu malai ni raji ha naorai jahi dong ma, ode bonsi jang leng slamjao ma, ode nokha maithai jang rjabri sosi dukhu rijao ma. 7Thikhabo, Madai ning ede thiphin ba, Leng ne langginyaba jadi khe ang ning saja ri nang, ode, boni yaohon ha bonsi baigo nang, ebo hathan ha ning ani khusi khe bonsi dang ma se, odebo bo thi ba. 8Odehe, Madai boni ha jogai bujuh raso bani grao kha ba. Odebani, Abraham thi ba, Isak hajai hi nokha sainjai ha boni bujuh rasoyaba khe khlai ba; ode, Isak ni phrang Jakob hajai hi, Jakob ni phrang se greng ni bumu jadi jhigin hajai ba.
9Jakob ni basathu se Josef khe naijiya ja ba. Ode, Egypt gede bokhe phain ba, thikhabo, Madai bo jang baosi dong ba, 10boni khrip dukhu ha bo sogopha lang hi, Egypt raji ni Raja khebo bokhe khasao rihi, subung buddi gnang se thihi bo tharmai riba. Odebani, bokhe Egypt raji ni ode jarni khrip noh ni basao habo hoja slam kha. 11Odehe, Egypt jang Kanaan raji ni khrip hathan ha asari galai hi, hamsi ning dukhu sophai kha; ode jini greng buthu musi khebo bonsi maijiya kha. 12Jakob Egypt raji ha mai dong thihi bo khna ba jang, jini greng buthu khe bo haiha ba. Ebo de sagangthao bonsi khe haijenyaba se. 13Bonsi phingin thangba ha, Josef boni daphlung ne tharmai ri kha, ode Josef ni daphlungrao khe Pharao niha tharmai ri kha. 14Odese. Josef jarni bupha Jakob jang boni daphlung khrip khebo long riba, ode bonsi khrip jang bisatham jra ja du. 15Odehe, Jakob Egypt raji ha thang hi, oraha ning bo jang boni greng buthu thih kha. 16Sekem nolei ha bonsi bainbu hi Abraham ning Sekem nolei ha Hamor ni basathu niha rang rihi, mangkhlong baraiyaba ha bonsi phip kha.
17Madai ning Abraham niha grao hanggaiyaba sophai khali ha, subung buthu Egypt raji ha bonsi yerhi gabang bang lang la kha, 18Josef tharmaiyayaba Raja gibin dong phai ba sosibo, bonsi dong ba. 19Bo ning jini phagrarao khe thokhi hi bo dukhu ri ba, bonsi ni basathu khe bo hamya mane khlai hi bonsi dangkhlai ri ma galai ba. 20Bo bubli ha, Moses hajaiphai hi, boni mukhang bo hamsi ning majang bani, bokhe nokha saintham sosi jarni bupha ni noh ha bonsi khrang ba, 21ode, bonsi dangkhlai ba jang Pharao ni bisik bokhe lahi, bo jarni basa ne khlai hi khrang la kha. 22Moses khe Egypt raji ni khrip buddi gyan khe sling ri hi, boni grao ode boni khusi bo hamsi ning blai kha.
23Moses, nokha maithai jang bisagin japhai ba ha, bo jarni daphlungrao jang goron ma bao ba. 24Bonsi ni bising ha subung saosi dukhu rijao ba khe nuhi, bokhe bo sogo ba; bo dukhu rijaoya bani baslai khe lahi, Egypt ni subung khe bo sthai kha. 25Moses bo jarni yao jang ning bonsi khe dimkhao nang thihi boni daphlungrao buji ma thi hi bo bao ba, thikhabo, bonsi buji laya. 26Gibin basain ha bonsi ni bising ha, subung gini jar jang jar nam jalai bani, bonsi ni gede bo baigo phai hi thi ba, Hoi, miyahrao, nisi bada buphlung se thi; snadi jabani nisi saosi jang saosi khe gajai ja ri ba? thihi bonsi khe bo bujai ba. 27Thikhabo, boni lugu hamya daoyaba de Moses khe nekhlai phalang ba, Jini basao ha bisardar jang hojane khlai hi sere ning khe slam ba? ode bo thi ba. 28Miya ha Egypt ni subung khe ning sthai ba lai, ning ang khe bo sthaima baoba na? ode bo thi ba. 29Bo grao khe Moses khna ba jang, bo khailang hi, Median raji ha bo donghi ba, ode, oraha ning nana miyah gini hajai ba.
30Boha, nokha maithai jang bisagin so bani yaohon ha, Sinai hading ni hajengling ni buphrip ha, wai jingyaba ha, degla saosi boni rogong ha nujao ba. 31Moses de bokhe nu ba jang, hamsi ning gmang ba; ode, bokhe gabasi nai mane thang ba ha Gabra ni khurang jang, 32Ang nini greng buthu ni Madai se, Abraham ni Madai, Isak ni Madai, Jakob ni Madai se, ode bo thi ba. 33Boha Gabra bokhe thi ba, Nini yapha ni phrang nini yaphadap khe kho lah, ning songyaba hathan de hah gathar se. 34Ang ning gibi jang jarni subung buthu Egypt ha dongyarao ni dukhu hadi khe nu kha. Bonsi khe sogo mane khlai hi ang thangma bao du. Phai, duha ning phai lah, ang ning khe Egypt raji ha haiha nang.
35Bo Moses khe, Hoja jang bisardar ni khlai hi ning khe sere slam ba? thihi bonsi niya ba, buphrip ha degla boni ha nujaoyaba se bokhe juru hi, Madai jar ning hoja jang sogo ginyaba ja mane khlai hi bo ning haiha ba se. 36Bo ning Egypt ha ja thing, sagor gajao ha ja thing, hajengling ha ja thing, ode maithai jang bisagin ni bising ha, gmang thaosisi ode sin buthu khe phnu phalang hi, bonsi khe bo langsmai ba. 37Israel sarik surik buthu niha thi ba, Madai ang khe slamba lai ning, nisi ni daphlungrao ni bising ha, subung saosi gorasali nisi ne slam ri nang, thiyaba Moses ning ja kha. 38Bo hajengling ni githimyarao ni gejer ha Sinai hading ha sorgo ni degla jang sainlaiyaba ode jini greng buthu jang baosi dongyaba bo ning ja kha; jinthane ri mane khlai hi grao gathang layaba bo se.
39Jini greng buthu boni grao khe bonsi mani ma nangjaoya hi, bonsi niya hi bo khe rikhlai hi, jarni khah buthu khe Egypt raji gede ha bo thangphin la kha. 40Odebani, bonsi Aaron khe thi ba, Jini sagang gede langsmaiyaba ja mane khlai hi, madairao a ne slam ri lah; Moses Egypt raji ha jing khe langsmaiyaba khe boni balam ha jing tharmaiya. 41Boha, bo buthu ne musu jla ni saokhuli khe mih dain hi bonsi khlim ba, ode bonsi ni yao jang baigoyaba ni basao ha bonsi khaja ba. 42Odebani, Madai boni mukhang phinhi haiger kha, nokhasao ni sathrai buthu khe khlim phu mane khlai hi saosi khe bo naiya kha; bedehe gorasali ni khuh jang thi ba,
O Israel jadi buthu, hajengling ha
nokha maithai jang bisagin sosi,
mih bandai jang mih sthai hi ang khe nisi jirik ba?
43Molek ni rih ni noh ode,
Rephan madai, sathrai khebo khlim mane khlai hi,
boni saokhuli khe nisi slamyaba buthu khe se nisi mani lai re;
Odebani, Babulon banar gede ang nisi khe lang nang, thihi reb ba lai.
44Bo saokhuli khe nuba lai slam mane khlai hi sere khe Moses thiba, bokhe bisar khlai mane, jini greng buthu hajengling ha jing sakhi riyaba rih ni noh ning bonsi niha dong. 45Ebo khe ning jini phragrarao ni phagra japhin khabo, bonsi la phalang hi, Madai ning jini phragrarao ni sagang ha Jentail khe bo rikkhlai jaoyarao raji khe bonsi lala khali, Joshua jang baosi bonsi hap pha hi, David dongphai ba sosi oraha ning bo dong ba. 46Bo David de Madai ni muh ha hamjaodao hi Jakob ni Madai ne khlai hi dongthan dang ri mane bo sain ba. 47Thikhabo, Solomon se bo noh khe dang ri ba.
48Thikhabo, jadaothao ni Madai de yao jang noh dangyaba ha bo dongya; Gorasali thiba lai,
49Gabra thi du, Sorgo de ani khamthan se,
ar phirthibo ani yapha dengthan se;
Ning anthane bedeyaba noh dang ri ma?
Ani lenggothan la beleiyaba hathan ja ma?
50Ebo buthu khrip khe ani yao jang ang slamyaba niya?
51Subung haglairao, khah jang khmao rasoyayarao, nisi thaoglao ni Bese Gathar khe nangjaoya, nisi ni phagrarao dangba lai ning nisibo dang du. 52Nisi ni phagrarao la sere gorasalirao khe dukhu riyaba dong? Subung hamdaothao phai mani grao sainthi dayarao khe bonsi sthai ba, ode, subung gibi khe remriyaba, ode sthaiyarao nisi ning ja kha. 53Sorgo ni deglarao rilangyaba Dara ni bisar khe nisi mai kha, thikhabo bo khe nisi yaowaiya, bo ode thiba.
Stephan thih ba
54Bisardarrao bo grao khe khna ba jang, bonsi ni khah ha jajaoya hi, Stephan ni basao ha bonsi hathai wai ba. 55Thikhabo, bo de Bese Gathar ha gablai bani, sorgo gede naikhu hi, Madai ni muima khe ode Madai ni yaoda gede ha Jisu song hi dong ba khe nuhi bo thi ba, 56Nai lah, sorgo khuru hi dongba khe ang nuha du, ode, Madai ni yaoda gede ha Marsi ni basa songhi dongba khebo ang nuha du.
57Boha, khurang bol jang bonsi jirik khao hi, bonsi ni khmao khe yao jang muthu hi, bonsi graosi jahi boni gede phai ba. 58Nogor ni phrang bokhe bonsi rik khlai hi, longthai jang lem ba. Boni sakhi jayaba de saosi naga, boni bumu Saul thiyaba ni igah rogong ha bonsi ni rih buthu bonsi dengthar ba. 59Stephan khe longthai jang lemba ha, bo Gabra khe, Raja Jisu, ani bese khe lang lah! thihi long ba. 60Boha bo yasgu thuhi, khurang bol jang jirik khaohi thi ba, Gabra, ebo bonsi khusi gajai dangyaba khe bonsi ni basao ha da galai ri, Bo grao khe bo thiblai ba jang bo thu lang kha. Saulbo boni thihba khe jajao kha.
Currently Selected:
DANGYASARAO 7: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
