LUKE 16
16
Rang naisoyaba ni daogari
1Jisu boni rikphayarao khe thi ba, Gnang subung saosi jarni leng saosi niha, boni rang khe naiso mane deng ba, thikhabo boni rang khe hamsisi naisoya thihi khna ba. 2Odebani, bo bokhe longha hi thi ba, ‘Nini basao ha ang khnayaba grao la sum bedehe ja ba? Rang rebkhuyaba laisi khe eraha labuhi phai lah, duha ni phrang de ning rang naisoya japhu nang niya kha.’ 3Rang naisoya khah ha bao ba, ani bubra boni khusi khe ang khe dang ri nang niya kha, thikhala ang bedehe khlaima kho? Hah jao mane bo ang blaiya kha, khrang jima nebo ang laji du. 4Rang naisoyaba ni phrang bonsi dangkhlai ribani yaohon ha, subung buthu ni noh ha dong rima ne jarni lugu ang slam nang. 5Ode boni bubra niha lagai dongyarao khe saosi saosi bo long ba. Bo sagang thaoyaba khe sing ba, ‘Ani bubra niha bislei lagai dong ba?’ 6Bo thiphin ba, ‘Thao tin jang rjasi.’ Bo bo khe thi ba, ‘Nini lagai khe reb khuyaba laisi khe lahahi, srap khamhi, tin madan reb lah.’ 7Ar gibin saosi khe bo sing ba, ‘Ning la bislei lagai dong ba?’ Bo thiphin ba, ‘Mai tin jang rjingsi lagai dong,’ thi ba. ‘Nini lagai khe reb khuyaba laisi khe lahahi, tin bisabri reb la’, thihi bo leng thi ba. 8Rang naisoyaba khathikyayaba ni girikthai khe mithi hi, bubra bakhan khlai kha. Jdanyaba sasik thane de duha ni jug ni subung buthu habsao ni khusi ha girikdao.
9“Ang nisi khe thi du, nisi habsao ni rang jang jarne lugu slam lah, ar bo jamkha ning thaoglao ni dongthan ha nisi khe slam nang. 10Sere gijisa ni basao ha lonjao re, bo gabang ni basao habo lonjao re. Ode sere gijisa ni basao ha lonjaoya, gabang ni basao habo lonjaoya re. 11Habsao ni rang gijisa ni basao ha ning lonjaoya thikhala, sere rang gibi gibi ni basao ha naisoya nepha rao ma? 12Malai ni basao ha lonya kha la, nisi ni khlai hi sere rang gibi khe nisi ne deng ri ma?”
13Dangyasa saosi bo bubra gini ni khusi khe dangpha laiphu nang niya; saosi khe naisle hi, gibin saosi khe khasao dao nang; ar saosi ni basao ha hamjaodao nang, gibin saosi khe hamjaoyadao nang. Nisi Madai jang rang ni khusi khe dangpha laiphuya.
Dara jang Madai ni Raji
(Mt. 11.12,13; 5.31,32; Mk. 10.11,12)
14Rang khe maya nang bani, Pharisairao ebo grao khe khna hi bo khe minithai ba. 15Bo bonsi khe thiphin ba, Subung buthu ni sagang ha, nisi jar khe hamba subung lai phnu du; thikhabo Madai de nisi ni khah khe mithi du. Bede thikhala, marsini sagang ha man gnangyaba de Madai ni sagang ha musibo niya.
16“Baptisma riyaba Johan dong ba sosi, Moses ni dara ar gorasali raoni laisi buthu khe yaowai ba, ar oraha ni phrang Madai ni raji ni hamba graojma khe sainthi ba, ar khrip subung buthu bol jang hapma bao re. Ar sere hamsi ning bao re, bonsi hap re. 17Thikhabo, Dara ni mainthi masi jam ba thane, habsao nokhasao jamba laidao nang kho!
18Sere jarni bihih khe dangkhlai hi gibin masainjik khe noh jare thikhade, bo gaori jaba se; ar sere dangkhlai jaoyaba masainjik jang noh jare, bobo gaora ja ba se.”
Subung gnang jang Lazaras
19“Subung gnang saosi dong ba, bising dam duyaba rih khe phin hi, suk jang khaja sisi dong ba. 20Boni derga gabasi ha dukhisa saosi, bumu Lazaras, sao ha gasa jayaba dong ba. 21Gnang subung jiyaba basang basao ni phrang galaiyaba buduri khe jimane asa khlai hi libi ba, ar sisa buthu phai hi boni gasa khe slao re. 22Bo dukhisa thih kha, ar sorgo ni deglarao bo khe langpha hi, Abraham ni rogong ha kham ri kha. Gnang subung bo thih kha, ar bo khe phip kha. 23Bo norok ha sao dukhu mai hi dong ba, ar nokhasao gede naikhu haba de, gajain ni phrang Abraham khe nuha hi boni rogong ha Lazaras khamba khe nu ba. 24Bo jirikkhao dada thi ba, ‘Abai Abraham, ning ang khe khasao lah. Lazaras boni yaosi khe dih ha jem hi, ani slai khe magain rimane haiha lah, ebo wai ha ang hamsi ning dukhu ja kha.’ 25Thikhabo, Abraham bokhe thi ba, ‘Ani basa, ning thanghi dongba ha hamba khe ning mai ba, Lazaras de hamyayaba khe mai ba. Duha bo eraha shanti jang dong kha, ning la dukhu mai kha. 26Bo khe garhi bo, eraha ni phrang nisi ni gede thangphuya mani khlai hi, ar oraha ni phrang jini gede phaiphuya mani khlai hi, jing jang nisi ni gejer ha, hah berek khaoyaba guthu dong.’ 27Gnang subung thi ba, Ode thikhala, ‘Abai, ani bupha ni noh ha, Lazaras khe haila ha, thihi ang khainsu la du. 28Ani ha khaphlung bowa dong kho; bo thanghi bonsi khe hamsisi khna ri thing. Niya khala bonsibo, eraha dukhu ni hathan ha dongma galaima se.’ 29Abraham bo khe thiphin ba, ‘Moses ar gorasalirao dong, nini khaphlung thu khe khna rimane bonsi ni grao khe khna thing.’ 30Bo thiphin ba, ‘Ode jang de ja nang niya, Abai Abraham, thih hi baija phinyaba subung thang hi khna ri re thikhase bonsi khah phin ma.’ 31Thikhabo, Abraham bo khe thi ba, ‘Moses ar gorasalirao ni grao khe bonsi gainsongya thikhade, thih hi baija phinyaba subung bo bonsi khe khna ri la khabo, bonsi gainsong nang niya.’”
Currently Selected:
LUKE 16: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
