LUKE 17
17
Phap ni naigrik
(Mt. 18.6,7,21,22; Mk. 9.42)
1Jisu boni rikphayarao khe thi ba, Subung buthu saosi bo galaiya hi dong nang niya, bo galai re; thikhabo, sere galai riyaba ni bubain risi bi. 2Sere ebo khasidao thaoyaba subung buthu ni bising ha, asaba khe bo galai ri re, mai honyaba longthai gedeba boni gorna ha khah dada, sagor ha lemsingba se bone phantha hamdao. 3Nisi ni bada buphlung phap khusi dang re thikhade, bokhe jo lah; ar bo khah phin re thikhade, bokhe map khlai lah. 4Sainsi ni bising ha, nisi ni basao ha alang sni bo dang gajai re thikha de, bo nini ha phai hi, Ang khah phin kha thi hi nini ha map sain re thikhade, bokhe map khlai lah.
Lonma
5Rikphayarao Gabra khe thi ba, Jini lonma khe raodao ri lah.
6Gabra thiphin ba, “Yaolei grongsi lai nisi niha lonma dong khade, ebo malbari phang khe Ning jar jang jar gukhur hi, sagor ha japhin lah, nisi thi re thikhade, bo nisi ni grao khe mani nang.”
Leng khusi dangyaba
7“Nisi ni bising ha sere jarni leng niha, hah haliba ja thing, melma raokhiba ja thing, bo khusi dang hi noh ha phaiphin ba ha, Ning sangga jiphai nisi thi re? 8Ode thiyahi, Anthane makham salai ri lah, ang jiba ha rih ragaosisi phin hi, ning ang khe naiso lah, ode yaohon ha ning ji nang, nisi thi re. 9Jarni leng, boni grao khe mani bani, leng khe hamjaoma ri du? 10Odelei ning, nisi khe khrip khusi saniba lai, dangblai bani yaohon ha, nisi bo, Jing leng jabani se, dangma nangyaba khusi khe jing dangba se, thi lah.”
Khunthi jhi khe ragao ri ba
11Odehe, Jerusalem gede Jisu thangpha langba ha, Samaria raji ar Galili raji ni gejer khe lailang ba. 12Nolei masi ha, bo hap hiba ha, khunthi jayaba subung jhi, bo khe goron ba. 13Bonsi gajain ha songthao hi, jirik khao ba, Jisu, slingriyah, ning jing khe khasao lah.
14Bonsi khe nuba jang, Jisu bonsi khe thi ba, Nisi thang hi Jonthai niha phnu ri lah.
Bonsi lama ha thangsai baha ning ragao lang la kha. 15Bonsini bising ha, saosi jar hamphinba khe mithi dada, bo jirik khao hi Madai khe bakhan khlai hi phaiphin kha. 16Jisu ni igah ni rogong ha galai dada, boni ha hamjaoma riba. Bo de Samari subung se. 17Jisu thi ba, Subung jhi hamphinya na somo? Subung sgu la braha dong? 18Ebo gibin jadini subung se ning Madai khe hamjaoma rimane phaiphin ba? 19Jisu bo khe thi ba, Baija hi thang lah, nini lonma jang ning khe ham ri kha.
Raji sophai ginyaba
(Mt. 24.23-28,37-41)
20Pharisairao gejesi Jisu khe bakhali Madaini raji sophai ma thihi sing bani, bo bonsi khe thiphin ba, Madai ni raji de nujao hi phaiya. 21Saosi bo, Nai lah, eraha ning dong, na oraha ning dong thiphuya. Bede thikhade, nai lah, Madai ni raji nisi ni bising ha se dong ba.
22Bo rikphayarao khe thi ba, Marsini Basa thanghi dongbani basain sainsi khebo nisi numa nangjao mani basain sophai nang; thikhabo nisi nu nang niya kha. 23Nai lah, Bo oraha ning dong! niya kha de, bo eraha ning dong! thihi nisi niha thima se. Thikhabo, bo khe nai mane da baigo lah, ar bonsi jang da thangpha lah. 24Nokhasao gurjliba ha, grongsi ni phrang gibin grongsi sosi jdan riba lai, Marsini Basa phaiba habo olei ja ma se. 25Thikhabo, duhani jug ni subung buthu ni yao jang bokhe dukhu rihi dangkhlai da ma kho! 26Noah ni basain ha jaba lai ning, Marsini Basa phai mani basain habo olei ja ma. 27Noah rungha hapsing hi, dih limphai hi, bonsi khrip khebo sthaitharya si de, subung buthu jilai ba, linglai ba, ode miyah masainjik noh jalai ba; 28Lot, thanghi dongba habo jaba lai ning, subung buthu jiba, lingba, barai ba, phain ba, gaiba ar slam ba, 29Sodom ni phrang Lot baigo bani basain ha, nokhasao ni phrang wai ar gondok ni hadi ha hi bonsi khrip bo thih thar ba. 30Marsini Basa nujao phai khali bo, olei jasosi ning ja ma se.
31Bo basain sophai khali ha, sere noh khimsao ha dong re, boni rangri khe laha mane, noh bising ha da nakhai thing; odelei ning sere phadain ha dong re, noh ha da thangphin thing. 32Lot ni bihih khe wainso lah. 33Sere jarni hayu khe sogoma bao re, bo bokhe khma nang, ar sere jarni hayu khe khma re, bo bokhe sogo nang. 34Nisi khe ang thi du, bo horha de thuthan masi ha, subung gini thupha lai nang, saosi khe lang nang, saosi khe galang nang. 35Masainjik gini, mai supha lai nang; saosi khe langla nang, saosi khe galang nang. 36Subung gini phadain ha khusi dangpha lai nang; saosi khe langla nang, saosi khe galang nang. 37Odebani, bonsi sing ba, Braha, Gabra?
Jisu thiphin ba, Braha manggathi dong, oraha naowai buthu bojom jama se.
Currently Selected:
LUKE 17: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
