MATTHEW 18
18
Sere dedaothao?
(Mk. 9.33-37; Lk. 9.46-48)
1Bo bubli ha boni yaohon rikphayarao Jisu niha phai hi sing ba, Sorgo raji ha sere dedaothao ja ma?
2Boha Jisu ansa saosi khe longha hi bonsi ni gejer ha song rihi, thi ba, 3Gibi jang ang nisi khe thi du, nisi bakhali khah slaihi ansarao lai jaya side, sorgo raji ha hap phu nang niya. 4Odebani, sere ebo ansa lai jar khe jar khasi phu du, bo se sorgo raji ha dedaothao ja ma. 5Odehe, sere ani bumu ni khlai hi elei ansa saosi khe lamjao du, bo angkhe se lamjao ba.
Phap khlai mane naigrik buthu
(Mk. 9.42-48; Lk. 17.1,2)
6“Sere elei angkhe lonyaba subung khasibarao ni bising ha asaba khe bo galai ri du thikhade, boni gorna ha mairong honkhliyaba longthai gedeba khe khapha hi sagor dih guthuyaba ni gejer ha dangsing ba se bonthane khlai hi hamdao nang. 7Galaiyarao ni khlai hi habsao bubain risi bi dou! Galaiyarao de dong ma se, thikhabo, galai riyaba ni bubain de risi bi”!
8“Nini yao ode nini igah jang ningkhe doda rihi khuda ri khade, bokhe dainso hi dang khlai lah; yao ode igah gonggin dong hi waikhor ha dangsing jaoba thane de, igah khora ar yao gabai jahi hayu ha hap ba se nini khlai hi hamdao. 9Nini muthai jang ning khe galai ri khade, bo khe khaikho hi dangkhla lah. Muthai thaigin jang norok ni waikhor ha dangsing jaoba thane de, muthai thaisi jang hayu ha hap ba se nini khlai hi hamdao”.
Melma gmayaba ni daogari
(Lk. 15.3-7)
10“Ebo subung khasibarao ni bising ha saosi khebo lekha khlaiya jaya mane khlai hi girik lah. Bonsi ni deglarao khe se sorgo ni ani Bupha ni mukhang khe nalaibo nu du, thihi ang nisi khe thi du”. (Sereba rebyaba hah elei bo dong. 11Gmayarao khe sogo mane khlai hi se Marsini Basa de phai ba.)
12“Nisi bede bao du? Subung saosi niha melma rjasi dong. Ode, boni bising ha masi gma lang kha la, bo bisabri majhisgu khe dangkhlai lang hi, bo hading buthu ha gmayaba khe smai nang niya? 13Gmayaba khe bo maiphin khade, bisabri majhisgu khaija hi dongyaba ni basao ha thabo boni basao ha bo khajadao ma se. 14Olei jasosi ning, ebo subung khasibarao ni bising ha saosi gmaba bo nisi ni bupha sorgo ha dongyababo nangjaoya”.
Phap ni bisar
15“Nini daphlung nini basao ha gajai khlai khade, sao jang thang hi bo jang sainlai hi bujai lah. Odehe, bo nini grao khe khna khade ning de kha. 16Thikhabo, nini grao khe khnaya khade, malai khe saosi-gini langpha hi thang lah, odehe, khrip grao ni sakhi ja mani khlai hi subung gini gatham khe langpha lah. 17Ohehe, bonsi ni grao khe bo khnama nangjaoya khade, longjomkhoh ha khna ri lah. Ode, longjomkhoh ni grao khebo bo khnama nangjaoya khade, bode nisi ni khlai hi Jentail jang khajna khrangyaba lai ja thing”.
Khahyaba ar khahyayaba
18Gibi jang ang nisi khe thi du, phirthi saoha asaba khebo ning khah khade, sorgo habo bokhe ning khah ma se; phirthi saoha asaba khebo khru khade, sorgo habo bokhe ning khru ma se.
19Gibi jang ang nisi khe thidu, phirthi saobo nisi ni bising ha subung gini jinis sainyaba ni basao ha graosi jakha de, ani Bupha, sorgo ha dongyaba bonsi ne dang ri ma se. 20Bede thikhade, subung gini gatham ani bumu jang bonsi bojom ja du thikhade bonsi ni gejer ha ang dongpha du.
Map giriyaba leng ni grao
21Boha Peter Jisu niha phai hi thiba, Gabra, ani daphlung ani basao ha alang alang phap khusi dangkha la, bokhe ang phin bisi map khlai ma? Phin sni sosi?
22Jisu boni ha thiphin ba, Phin sni se ning thihi ang thiya; phin sni hathan bisatham majhi sosi de thihi ang ning khe thi ba. 23Odebani, sorgo raji de sereba Raja gedeba jar ni lengrao niha sain lekha lama baoyaba jang suhi grao thiyaba se. 24Bo sain lekha laba ha, subung saosi talent rjingsi lagai layaba boni ha bonsi labu hi phai ba. 25Ri mane giri bani boni bubra boni bihih basa boni ha dongyaba khrip phain hi su mane bo grao ri ba. 26Boni leng boni rogong ha yasgu thu hi, Gedeba, ani basao ha khah lao lah, ninthane khrip ang rithar nang, thi hi blip pha hi bokhe khlim ba. 27Odebani, bo leng ni bubra khasao sisi jajao hi, bokhe haiger kha, ode boni lagai khe bo map khlai kha.
28Thikhabo, bo lengde, baigo lang hi, boni lugu leng khusi dangpha laiyaba ni bising ha saosi aduli rjasi maima dongyaba, bokhe nuhi bokhe rem hi, nini lagai khe a ne ri lah thi hi boni gorna rem ba. 29Bo jang khusi dangpha laiyaba leng de blip phahi thi ba, ani basao ha khah lao lah, ang ninthane suphin nang thihi bo alang alang khainsu ba. 30Thikhabo, bo maniya hi, boni lagai khe riya side phatho ha bokhe jep kha. 31Gibin lengrao bo khusi dangyaba khe nuhi, hamsi ning waimu nang hi, bonsi ni bubra niha bonsi sainthi ba. 32Boha boni bubra bokhe long hahi bokhe thi ba, Hoi, leng hamyayaba, ning aniha khainsu bani nini lagai khe ang phura map khlai kha. 33Ang ning khe khasaoba lai ning, ning bo nini leng khusi dangpha laiyarao khe ning khasao ma nangya? 34Odehe, boni bubra thamsi baigo hi, boni lagai khrip khe bo suphinya side saja riyarao ni yaoha bo yaopha kha.
35Odelei ning nisi saosi jang saosi jar ni daphlungrao khe nisi map khlaiya khade, ani Bupha, sorgo ha dongyababo olei ning nisi ni basao ha khlai ma se.
Currently Selected:
MATTHEW 18: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
