MATTHEW 19
19
Gaoleiba ni slingrithai
(Mk. 10.1-12)
1Jisu ebo grao buthu khe thi blaihi, Galili raji ni phrang bo baigo hi, Jordan dikhong nar Judai raji ha thang ba. 2Subung buthu gabang boni yaohon rikpha hi oraha bonsi khe ham ri ba.
3Boha Pharisairao bokhe nainai mane boni ha phai hi singba, Asaba balam ha jar ni bihih jang gaoleiba la dara gathar jadu?
4Jisu thiphin ba, Ebo grao khe nisi phuriya? Bo jenba ni phrang bonsi khe slamyaba miyah jang masainjik khe bo slamhi thiba, 5Odebani, miyahsa jar ni buma-bupha khe haiger hi jar ni bihih khe remsong nang, odehe bonsi gini jang saomang mangsi ja nang, ode thi du. 6Bede thikhade bonsi gini niya kha, bonsi saomang mangsi ja kha. Odebani Madai ning jura phakhade subungde da degao ri thing.
7Bonsi boniha thiba, Niyakha la snadi jabani Moses gaolei mani laisi rihi gaolei mani grao khe ri ba?
8Jisu thiphin ba, Moses de nisi ni khah rao bani khlai hi se thi nisi ni jar jar ni bihih buthu khe gaolei mani grao ri ba; thikhabo jenba hade ode niya. 9Thikhabo, ang de ning khe thi du, sere naga khe hamjao bani niya hi bihih jang gaolei dada malai jang noh jakha de bo gaori jaba se. Ode sere gaolei hi noh jadu bobo gaori jaba se.
10Boni yaohon rikphayarao boni ha thi ba, Bihih ni balam ha miyah olei se thikhade, noh jaba hamya dou.
11Jisu thiphinba, Ebo grao buthu khe khrip subung de mani phuya, sere ne yaopha jaoyaba khe garhi de. 12Subung phida khaoyaba, sereba de buma ni sao ni phrang olei jayaba dong, sereba de subung ni yao jang phida khaoyaba dong, sereba de sorgo ne khlai hi jar khe jar phida khaoyababo dong, sere ebo khe mani phudu bo mani thing.
Jisu ansarao khe hamthai ri ba
(Mk. 10.13-16; Lk. 18.15-17)
13Asaba subung, bonsi ni basao ha yao denghi ham ri mane khlai hi, bonsi ni ansarao khe labu ba. Boha yaohon rikphayarao bonsi khe magna hi jo ba. 14Jisu thiba, ansarao khe aniha haiha lah, bonsi khe da magna; sorgo raji de eleiyaba subung ni khlai hi se.
15Bonsi ni basao ha boni yao deng hi, bo ora ni phrang thang la kha.
Saosi naga gnang
(Mk. 10.17-31; Lk. 18.18-30)
16Subung saosi boni ha phai hi thiba, Slingriyah, thaoglao ni hayu khe mai mane khlai hi ang snadi hamba khusi khe dang ma nang du?
17Jisu boni ha thiphin ba, Hamba jinis ni balam ha snadi jabani ning angkhe sing ba? Hamba de masi se ning dong ba; asaba ja thing, hayu ha ning hapma nangjao khade, grao riyaba buthu khe mani lah.
18Bo singba, Snadi grao?
Jisu thiphin ba, Sthaima niya, gaori da ja, makhao da ja, mosol sakhi da ja, 19Nini buma-bupha khe khasao lah thiyaba grao buthu ode, ning jar khe maya nang laba lai ning nini noharirao khebo maya nang lah, thiyaba grao khe thi ba.
20Bo naga boni ha thiba, Ebo khrip grao khe ang mani du, duha snadi dang ma dong kho?
21Jisu bo khe thiba, Ning gathar jama nangjao du thikhade, nini ha dongyaba khe phain hi dukhirao ar suliyayarao ne ri lah, odese sorgo ni don khe ning mai ma; odehe, phai hi ani yaohon rikpha lah.
22Bo naga de bo grao khe khna hi, boni ha rang rih bang bani, khah waimu nang hi bo thangla kha.
23Boha Jisu jar ni yaohon rikphayarao khe thi ba, Gibi jang ang nisi khe thidu, gnang subung ni khlai hide sorgo raji ha hapba hamsi ning du bi. 24Ang nisi khe thiphin du, gnang subung Madai ni raji ha hapba thane simi khmao gabla ha mihhajeng hap ba se lai dao.
25Ebo grao khe yaohon rikphayarao khna hi bonsi hamsi ning gmang lai hi thiba, Sere sogojao phu ma? thihi bonsi thilai ba.
26Boha Jisu bonsi khe nai hi, bonsi khe thiphin ba, Bo khe subung ni khlai hide dang phuma niya, thikhabo Madai ni khlai hide khrip dang phu du.
27Ode, Peter bokhe thi ba, Nai lah, jing de khrip dangkhlai hi nini yaohon rikpha kha, thikhabo jing snadi khe mai ma?
28Jisu bonsi khe thiba, Gibi jang ang nisi khe thi du, gadain slamyaba ha se Marsi ni Basa jar ni muima khamthan ha khamba ha, nisi ani yaohon rikphayarao khe Israel jadi jhigin khe bao hi Raja ni khamthan majhigin ha nisibo kham ma se. 29Sere noh buthu khe ja thing, daphlungrao khe ja thing, bahandao thu khe ja thing, buma bupha khe ja thing, basathu khebo ja thing, raji khe ja thing, ani bumu jang haiger khade, bo rjasi bangdao hi mai ma se, ode, thaoglao ni hayu ni phanthabo mai ma se. 30Thikhabo, gabang subung sagang thaoyaraode bo yaohonthao ja ma, yaohon thaoyaraobo sagangthao ja ma se.
Currently Selected:
MATTHEW 19: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
