MATTHEW 20
20
Grep bari ha khusi dangyarao
1Sorgo raji de noh ni bubra, jar ni grep ni bari ha khusi dangyarao khe khusi dang ri mane phorongma sangga baija hi baigo langba lai se. 2Bo khusi dangyarao jang sainsi ha aduli ruji ri mani khlai hi sainlai dada bonsi khebo bari ha haiha kha. 3Sainjer beren ha bo baigo ba, boha gibin subung hathai ha haglai biglai songyarao bo nuba 4Bonsi khe thiba, Nisibo grep bari ha khusi dangtha sang, nisi jajao gothai ang ri nang. Odebani bonsi thang kha. 5Odehe, sainbli beren ha ode sari ni makham songba beren ha bo baigo phinhi olei jasosi ning bo khlai phin ba. 6Sainbli ha bo baigo baha subung gibin songyarao khe nuhi, bonsi khe thi ba, Snadi jabani eraha sainsong haglai biglai song ba? 7Bonsi boniha, Saosibo jing khe yaowai laya, thihi thiphin ba. Bo bonsi khe, Nisi bo grep bari ha thang sang, thihi sani ba.
8Habah garbli jahi, grep bari ni bubra boni rang naisoyaba khe thi ba, Khusi dangyarao khe longha lah, bo yaohonthao ni khe lahi sagangthao ni sosi bonsi ni ruji khe ri lah, thihi sani ba. 9Sainbli ha khusi dang riyarao khrip bo aduli masi mailai kha. 10Sagangthaoyarao de bangdao hi mai nang thihi bonsi bao ba, thikhabo bonsi bo aduli se ning mailai ba. 11Odebani, bonsi langba ha noh bubra ni basao ha bonsi ber ba. 12Ebo yaohonthaoyarao gontha si se ning khusi dang ba, ode ning jing jang baosi bonsine ri ba, jing se sainsong bubain sugu ba, ode sain ajao ba! 13Bonsi ni bising ha saosi niha, Lugu, nini basao ha ang musibo gajai khlaiya. Ning ning aduli yaowai ri mane jing sainlaiya na somo? 14Nini phantha khe langhi thang lah. Ninthane ang riba lai ning ebo yaohonthao ni nebo ang rima nangjao du. 15Ani jar ni jinis khe ang nangjaoba lai lai ang yaowaiba jaya na? Niyakhala, ang hamba ni khlai hi nisi hingsa ja ba? thihi thiphin ba.
16Olei jasosi ning yaohonthao ni sagangthao ja ma. Sagangthao nibo yaohonthao ja ma.
Jisu jar thihma ni grao khe phintham thidaba
(Mk. 10.32-34; Lk. 18.31-34)
17Odehe, Jisu Jerusalem ha thangba ha, yaohon rikphayarao jhigin khe gibin khlai hi bo lang hi, lama ha bonsi khe thi ba, 18Nai lah, Jerusalem ha jing thang du. Marsi ni Basa de Jonthaimarao ode Dara khe slingriyarao ni yao ha rem rijao ma, ode bonsi de thih mane khlai hi boni basao ha bonsi grao saso nang. 19Odehe, bokhe mlaothai ma, doma-suma, ode kross ha dikpha mane khlai hi Jentailrao ni yao ha bokhe nepha ma; ode, nokha saintham ha thang hi baijaphin ma.
Buma jar ni basathu ni khlai hi saniba
(Mk. 10.35-45)
20Boha, Jebedai ni basathu ni buma, jar ni basathu khe labu hi Jisu niha phai dada, bo khlim hi boniha smaba jinis sain ba.
21Jisu boniha singba, Ning snadi nangjao ba? Boha boniha thiphin ba, Ebo ani basathu gini khe nini rajiha nini yaoda gede saosi, nini yaosi gede saosi bonsi khamphu mani khlaihi grao ri lah.
22Jisu thiphin ba, Nisi sainyaba khe nisi tharmaiya. Ang bela ha lingginyaba ha nisi lingphu nang? Bonsi boni ha, Blai nang thi hi thiphin ba.
23Bo bonsi niha thiba, Ani bela ha nisi lingma ning nangma se; thikhabo, ani yaoda yaosi ha kham mani grao khe ang de rima niya. Bede thikhade, ani Bupha, sere ne salai ri kha, bonthane khlai hi se.
24Yaohon rikphayarao jhi ebo grao khe khna hi bonsi ni khaphlung gini ni basao ha thamsi baigo ba. 25Thikhabo, Jisu de bonsi khe longhi thi ba, Jentailrao ni basao ha bisar khlaiyarao de bonsi ni basao ha gabang ning raja ja re; bonsi ni subung gedebaraobo bonsi ni basao ha hukhum gabang yaowai re thihi nisi tharmai du. 26Thikhabo, nisi ni bising hade olei ja nang niya. Sere nisi ni bising ha subung gedeba jama nangjao du, bo nisi ni dangyasa jahi dongma nang ma se. 27Sere nisi ni bising ha sagangthao jama nangjao du, bo nisi ni leng jahi dongma bo nang ma se. 28Marsi ni Basa de jar khusi dang rijao mane bo phaiya, khusi dang ri mane ode gabang subung khe kho mane se ar jar ni hayu ri mane se bo phai ba.
Muthai gana gini khe ham riba
(Mk. 10.46-52; Lk. 18.35-43)
29Jisu ar boni yaohon rikphayarao Jeriko ni phrang baigoba ha subung buthu gabang ning boni yaohon rikpha ba. 30Muthai gana gini lama bijing ha khamyarao Jisu thangba thihi bonsi khnaba jang, Gabra, David ni basa, jing khe khasao lah, thihi jirikkhao ba.
31Boha subung buthu bonsi khe phirik phirik dong mane magna ba; thikhabo, bonsi de Gabra, David ni basa, jing khe khasao lah thihi bol jang bonsi jirikkhao dao ba.
32Jisu songthao hi bonsi khe long hi thiba, Nisi ni basao ha ang jang snadi dang ma nangjao ba?
33Bonsi boni ha thiba, Gabra, jing muthai numa nangjao du.
34Odebani Jisu hamsi ning khasaosisi jajao hi bonsi ni muthai khe gidinghaba jang bonsi ni muthai nu lang la kha, odehe bonsi boni yaohon rikpha kha.
Currently Selected:
MATTHEW 20: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
