MATTHEW 21

Jerusalem ha Jisu khe lamjao ba

(Mk. 11.1-11; Lk. 19.12-19; Jn. 12.12-19)

1Odehe, Jisu Jerusalem rogong ha sophai hi Bethphage nolei ni Oliv hading ha bonsi phai ba. Jisu jar ni yaohon rikphayasa gini khe haiha hi, 2bonsi niha ebo grao khe thiba, Nisi ni sagang phrangsong nolei ha thang. Oraha khah hi dengyaba mihleng ode boni basa khe nisi nu nang; bo khe khru hi ani ha sikbu lah. 3Sereba nisi khe asaba grao thi khade, Gabra bokhe nangjao du thihi nisi thi lah. Ode bo srap haiha ma se.

4Gorasali ni khuh jang elei grao thida hi dongyaba phura gibi ja mane khlai hi se olei japhai ba:

5Nai lah, nini Raja de maigru gru jahi

Mihleng ni basao ha gahi, nini ha phai ba,

Bo gasaindik dik jahi mihleng ni basao ha

Mihleng ni basa ni basao ha ning phai du, thi hi Zion-ni bisik khe sainthi lah.

6Odebani, yaohon rikphayarao thang hi Jisu bonsi khe saniba lai ning dang kha. 7Mihleng jang boni basa khe bonsi sikbu hi, boni basao ha jar ni rih buthu yenhi, bo kham la kha. 8Odehe, subung ni bising ha bangdao hi lama ha bonsi jar ni rih buthu khe yen ba, ode gibin subung buthu bongphang bedebsa dain hi lamayung ha yen ba. 9Odehe, subung buthu boni sagang gede thangba ode yaohon gede rikphayarao jirikkhao ba, David ni basa niha Hosanna! Gabra ni bumu jang phaiyaba bakhan ja thing! Basaothao niha Hosanna!

10Jerusalem ha bo hapba jang bo nolei ni khrip dongyarao, Ebo subung la sere? thihi bonsi lup lup smao ba.

11Ebo gorasali Jisu, Galili raji ni Nazareth ni subung se, thihi bonsi thilai ba.

Madai ni bikhoh khe gathar khlai ba

(Mk. 11.15-19; Lk. 19.45-48; Jn. 2.13-22)

12Jisu Madai ni bikhoh ha hapsing hi boha smaba smayaba, phainyarao braiyarao, khrip khe bo rikhun hi, rang bagrai slaiyarao, daothu phainyarao ni khamthan buthu khe bo neblib thar hi, bonsi niha thi ba, 13Ani nohde bihma ni noh se thihi bonsi thi nang, thihi shastro ha rebyaba dong; thikhabo niside ani noh khe makhaorao ni longkhor se nisi slam ba.

14Boha Madai ni bikhoh ha muthai ganarao ode igah khorarao boniha phai ba, ode bonsi khe bo ham ri ba. 15Thikhabo, Jonthaimarao ode Dara khe slingriyarao bo gmang thaosisi khusi dangyaba buthu khe ode, bikhoh ha, David ni basa niha Hosanna! thihi ansarao jirikkhaoyaba buthu khe nuhi, bonsi gabang khah ha jajaoya ja kha. 16Jisu niha, Ebo buthu grao thiyaba khe ning khna kha? thihi sing ba.

Jisu bonsi khe thiphin ba, Nanarao ar abudih jiyarao ni khuh ha baigoyaba de nini bakhan khe phura so ri kha thihi rebyaba khe nisi phuriya na?

17Jisu bonsi khe garlang hi, nogorma ni phrang baigo dada Bethani ha thang hi oraha ning bo thu kha.

Thaikhrao phang khe sari ba.

(Mk. 11.12-14,20-24)

18Phorong ha nogor gede bo thangphinba ha bo makham hukhrijao kha. 19Lama bijing ha thaikhrao phang nuhi, bo thang ba, boni balai khe garhide bo musi khebo nuya. Duha ni phrang bathai da thai si thihi bo bongphang khe sari ba. Ode boha ning thaikhrao phang de srap rain lang la kha.

20Yaohon rikphayarao bokhe nuhi, bedehe thaikhrao phang srap rain lang la ba? thihi bonsi gabang gmang lai ba.

21Jisu bonsi khe thiphin ba, Gibi jang ang nisi khe thi du, nisi lonma denghi lonsoya jaya khade, thaikhrao phang ni basao ha dangba lai se ning dang nang niya; ebo hading niha bo disai lah, ode sogor ha dangsing lah nisi thikha de, nisi thiba lai ning ja ma se. 22Asaba khebo lonma jang bi hi nisi sain khade, nisi mai ma se, thihi bo thiphin ba.

Jisu ni hukhum bonsi singba

(Mk. 11.27-33; Lk. 20.1-8)

23Madai ni bikhoh ha hapsingba ni yaohon ha bonsi khe sling riba ha, Jonthaimarao ode Khraorao boni ha phai hi sing ba, Sere ni hukhum jang ning elei khusi dang ba? Sere ning khe hukhum ri ba?

24Jisu bonsi khe thiphin ba, Ang bo nisi khe grao thaisi sing du, ebo khe nisi aniha thikha de sereni hukhum jang ebo khusi buthu khe dangba angbo nisi khe thi nang. 25Johan ni baptisma la sereni grao jang ja ba? Sorgo ha dongyaba ni grao jang na subung ni grao jang ja ba?

Boha bonsi jar jang jar bisar khlai hi bao ba, sorgo ha dongyaba ni grao jang jing thi khade, snadi jabani boni grao khe nisi lonya ba, thima se. 26Ode, subung ni grao jang jing thi khade, subung buthu khe jing khin du. Bede thikhade, khrip subungbo Johan khe gorasali se thihi mani ba, ode bonsi bao ba. 27Odebani, bonsi Jisu niha thiphin ba, Jing tharmaiya.

Bobo bonsi niha, Sereni hukhum jang ebo khusi buthu khe ang dang ba, ang bo nisi niha thiya.

Khaphlung gini ni daogari

28Dei, nisi la bede bao du? Subung saosi ni basa gini dong ba. Saosi niha bo thang hi thiba, Ani basa, dini ha grep bari ha khusi dang lah, 29Ang thangma mijingya thihi thiphin ba. Thikhabo yaohon ha bo khaslai hi thang kha. 30Ode, saosi nihabo boni bupha thang hi olei ning thi ba. Bo basa thiphin ba, Dei, ang thang nang, thikhabo, bo thangya. 31Ebonsi gini ha bupha nangjaoba lai sere dang ba? thihi Jisu bonsi khe sing ba. Bonsi thiphin ba, Sagang ni. Jisu bonsi khe thiphin ba, Gibi jang nisi khe thi du, khajna khrangyarao ode sao phainjiyarao ning tha sagang hi sorgo raji ha hap ma se. 32Johan de dormo ni balam ha nisi niha phai ba; thikhabo nisi bokhe lon laya. Niside bokhe nuba ni yaohon habo bokhe nisi lonphu mani khlai hi niside khah phin la phuya.

Grep bari ni daogari

(Mk. 12.1-12; Lk. 20.9-19)

33Masi gibin daogari khna lah. Sereba subung noh bubra dong ba, bo jakha de grep bari slamhi, boni sersi giding khorong khading ba. Ode, grep sep mane bo hakhor khuhi, nohju dang ba; ode bari naisoyarao niha thika ri hi, raji gibin ha thang la kha. 34Odehe, boni bathai khe khaobli jakha bani, boni bathai khe khao mane khlai hi bari naisoyarao niha boni lengrao khe haiha ba. 35Boni bari khe naisoyarao de boni lengrao khe rem hi, saosi khe bonsi su ba, saosi khe bonsi sthai ba, saosi khe bonsi longthai jang lem ba. 36Leng gibin sagang ha thane bangdao hi bo haiphin haba; thikhabo, bonsi ni basao habo sagang ni subung buthu khe khlai ba lai bonsi khebo khlaiphin ba. 37Boni yaohon ha Ani basa khede bonsi man khlai ma se thi hi jar ni basa khe bonsi niha haiha ba. 38Thikhabo, bari khe naisoyarao de boni basa khe nuba jang, ebo subung don ni bubra jaginyaba se, jing sthai hi boni don maiginyaba khe jing lala nang thi hi bonsi thiba. 39Odehe, bokhe bonsi rem hi, grep bari ni phrang danghun khlai hi bonsi sthai kha.

40Odese, grep bari ni bubra boni bari khe naisoyarao ni basao ha bede khlai phai nang? ode bo thi ba.

41Bonsi boni ha thiphin ba, Bo subung hamyayarao khe dukhu ri hi bo sjam nang, ode grep bari khe bari naisoyaba gibin, boni bathai khao hi ripha langyarao niha naiso mane khlai hi ri ma se.

42Jisu bonsi niha thi ba, Madai ni sastro laisi ha rebyaba,

‘Noh dangyarao longthai nangjaoyayaba khe,

bokhe ning nogrong ha nangdaothao ja kha,

bokhe Gabra se khlai ba.

Jini muthai ni mugrong hade gmang thaosisi se’, thiyaba grao khe nisi phuriya?

43Odebani, Madai ni raji khe nisi ni phrang lang lahi bathai thaiginyaba jadi niha ri lama se, thihi ang nisi khe thi du. 44Ode, sere ebo longthai ha galai du, bo berekkhao nang; sere basao ha galai du, bo gilithar ma se.

45Jonthaimarao jang Pharisairao boni daogari grao khe khna hi bonsi ni grao ni balam khe thiba thihi bonsi tharmai kha. 46Odehe, bokhe bonsi rem ma bao ba; thikhabo, subung buthu khe bonsi khin du. Bede thikhade bokhe gorasali se mani ba.

Currently Selected:

MATTHEW 21: DIMASBSI

Highlight

Copy