MATTHEW 22
22
Disingyaba mel ni daogari
(Lk. 14.15-24)
1Jisu bonsi jang sainlai hi bonsi niha daogari grao thiphin ba. 2Sorgo raji de sereba Raja, boni basa ne khlai hi disingyaba ni mel salaiyaba jang baosi se. 3Disingyaba ni mel ha ji mane khlai hi jama jaoyarao khe long mane khlai hi boni lengrao khe bo haiha ba; thikhabo, bonsi phaima nangjaoya. 4Odese, bo jar ni jamayarao niha, Ani mel khe khrip salai blai kha. Ani musu jla buthu ode ani mih jar khrangyaba buthu khe ang sthai hi, khrip salaithar kha, disingyaba ni mel ha ji mane khlai hi phai lah thihi thi mane gibin leng khe bo haiphin haba. 5Thikhabo, bonsi musibo baoya hi bonsi degao langla kha. Saoside phadain ha thang la kha, saosi de bephar khlai mane thang la kha. 6Gibin subung buthu jakha de boni lengrao khe remhi, bonsi khe laji phnu rihi bonsi sthai kha. 7Odebani, Raja thamsi baigo hi, boni siphaiyarao khe haiha dada bo sthaiyarao khe sjam hi, bonsi ni nogor khebo bo saokhrip kha. 8Odehe, boni lengrao niha thiba, Disingyaba ni mel de jam kha; thikhabo, jama jaoyarao de ji mane gatha laya. 9Odebani, lamayung ha thang hi nisi goronyaba si subung buthu khe disingyaba ni mel ha ji mane labu lah, thihi bo sani ba. 10Odebani, boni lengrao de baigo lang hi, lamayung buthu ha bonsi thang dada, bonsi nuyaba si khe, subung hamba, subung hamyayarao khebo bojom khlai hi, disingyaba ni mel ha ji mane naorai gablai thar kha.
11Thikhabo, Raja subung longyarao khe nai mane bising hap phaiba ha, disingyaba ni rih phinyayaba subung saosi oraha dongba khe bo nu ba. 12Bokhe sing ba, O lugu, snadi jabani ning disingyaba ni rih giri hi eraha hapsing phai ba? Thikhabo, bo subung phirik phirik dong ba. 13Odese, Raja jar ni lengrao niha thiba, “Boni yao igah khe khahi, hakhli andar ha danghun khlah, oraha se grahi hathai waihi bo dong ma thihi thiba.”
14Jisu thi ba, Longjaoyarao de gabang longjao ma, thikhabo saikho jaoyarao de gijisa se ning ja ma.
Khajna riba ni balam ha singba
(Mk. 12.13-17; Lk. 20.20-26)
15Boha Pharisairao thang hi bo grao thiyaba khe lahi remphu mane khlai hi bonsi sainlai ba. 16Odehe, bonsi jar ni slingriyarao khe Herod ni dol ni subung buthu niha ebo grao khe thi mane bonsi haiha ba. Slingriyaba, ning gibi subung se; saosi khebo man ridao riyadao jaya thi hi jing tharmai du, ode saosi khebo ning gibin naidaoya. 17Odebani, ning la bede bao du? Jinthane thi ri. Kaisar niha khajna riba jadu na jaya? thihi bokhe sing ba.
18Thikhabo, Jisu bonsi ni hamyathai khe tharmai hi bonsi khe thiba, O giriklayarao, sumjabani nisi angkhe nai nai ba? 19Khajna ni rang khe a ne phnu ri lah.
Ode, boni ha aduli labu ba. 20Ebo la sereni saokhuli ode sereni bumu? thihi bonsi khe sing ba.
21Kaisar ni thihi bonsi thiphin ba.
Jisu bonsi khe thi ba, Ode thikhala Kaisar ni jinis buthu khede Kaisar niha ri lah, Madai ni jinis buthu khede Madai niha ri lah.
22Ebo grao buthu khe bonsi khnaba ha, bonsi gmanglai ba, ode bokhe dangkhlai lang hi, bonsi thang la kha.
Baijaphinba ni grao ha singyaba
(Mk. 12.18-27; Lk. 20.27-40)
23Okhali ni basain ha, Saddukairao, baija phinyaba giri thiyarao, boni ha phai ba; 24Bonsi boni ha thiba, Slingriyahsa, Moses thidu, asaba subung basa maiya hi bo thih khade, jar ni daphlung ni bihi khe noh ja hi, jar ni daphlung ne khlai hi bongso thaoma nang du. 25Dei thikha la, jini bising ha khaphlung sni dong. Radaothaoyaba noh jahi bo thih kha, ode boni bongso bumu giri bani jar ni bihi khe buphlung ne noh ja mane bo yaopha lang ba; 26Olei jasosi ning gini gatham ode khaphlung sni sosi olei mai lai ba. 27Bonsi khrip thih tharba ni yaohonha bo masainjikbo thih lang la kha. 28Odebani, baijaphinba ha bo masainjik la sereni bihi ja nang? Bonsi khripbo bokhe noh ja kha.
29Jisu bonsi khe thiphin ba, Madai ni sastro gathar ni grao ode, Madai ni raothai khe nisi tharmaiya bani nisi bao gajai du. 30Thanghi baijaphinba hade dising nang niya kha. Sorgo ha Madai ni deglarao lai ja lang ma thihi nisi mithiya. 31Subung githi thanghi baijaphin bani grao ha Madai ning nisi ni rogong ha thiyaba khe nisi phuriya? 32Ang Abraham ni Madai, Isak ni Madai, ode, Jakob ni Madai se thiyaba khe. Madai de subung githi ni Madai niya, subung gathang ni Madai se.
33Subung buthu ebo khe khnaba jang, bo grao slingriyaba khe bonsi gmang lai ba.
Dedaothaoyaba hukhum
(Mk. 12.28-34; Lk. 10.25-28)
34Saddukairao khe niyathaiba thihi bonsi khna hi, Pharisairao bojom ja ba, 35Bonsi ni bising ha subung saosi, Dara mithiyaba, bokhe nainai mane khlai hi, singba, 36O Slingriyahsa, Dara graoha la snadi grao riyaba dedaothao? thihi sing ba.
37Jisu thiphin ba, Gabra, nini Madai khe nini khrip khah ni buddi jang, nini khrip bese jang, nini khrip khah ni girikthai jang ning hamjao lah, 38Ebo ning dedaothao grao riyaba ode nangdaothaoyaba grao se. 39Bo jang baosiyaba de ebo se, Ning jar khe hamjaoba lai ning nini noharirao khebo hamjao lah, 40Ebo grao riyaba magin ha Dara ni grao ode gorasalirao ni grao khrip dopha thar du.
Messia ni grao ha singba
(Mk. 12.35-37; Lk. 20.41-44)
41Odehe, Pharisairao khe bonsi bojom jayaba ha, Jisu bonsi khe grao sing ba, 42Krista khe nisi bede bao du, bo sereni basa?
Bonsi boni ha thiphin ba, David ni basa.
43Jisu bonsi khe sing ba, Snadi jabani David bese jang bokhe Gabra thihi long ba?
44Gabra ning ani Gabra niha
Ani yaoda gede kham lah;
Nini sotrurao khe nini yapha bakhla ha ang dengya si de.
45David ning bokhe Gabra thi kha la, bedehe bo boni basa japhu ma? ode bo thiba. 46Saosi bo grao thaisi jahibo bonsi grao thiphin phuya hi, okhali ni phrang de saosi bo gibin grao musi khebo bonsi singraoya kha.
Currently Selected:
MATTHEW 22: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
