THILSIEMBUL 35
35
Bethel a Jakob Vangsakna
1Chun, Pathien in Jakob kawm achun, “Kipan inla, Bethel ah chieh inla, zie chun um ah: Na u Esau kawm apat a na taihmang lai a na kawma kilak Pathien ding khan zie chun maichâm siem in,” a ti a.
2Chun, Jakob in a inkawte leh a kawma um cheng chengte kawm achun, “Na lak u a midang pathien um haw chuh kawihmang kêi un; kisuthieng unla, na silhlechen hawu theng un: 3Kipan hiting un, Bethel ah chiehto hitiu; tichun ka lungzîn laia ei dâwng a, ka chieh na cheng a ka kawma um zel Pathien a ding khan maichâm siem ding ka hi,” a ti a. 4Tichun midang pathien a khut u a um chengcheng leh a bil u a bilbah a bah chengcheng u chuh Jakob a pieu a; chun, Jakob chun Sekem khaw kienga gangpi thing nuoi achun a vui tai.
5Chun, Jakob leh a chate chuh chieh dinga a kipat lai u chun, a kimvel uh a mite chung achun lauhna nasatak a tung ta a, a delhzui ngam ta puou hi. 6Khutichun, Jakob chuh a kawma um cheng cheng tawh Luz khuo a tung u a, zie chuh tu a Kanaan gama Bethel kiti hi ahi. 7Chun, zie tak achun maichâm a siem a, a u kawma pata a taihmang lai khan zie taka chuh a kawma Pathien a kilak ziekin, a mun chuh El-Bethel#El-Bethel = Bethel Pathien, tihna ahi. a sa ta a. 8Chun, Rebekah dawnnu Deborah chuh a thi a. Bethel suohlam a gangpi thing nuoi achun a vui u a: gangpi thing min chuh Allon-bakuth#Allon-bakuth = Kahna gangpi, tihna ahi. a sa ta a.
9Chun, Jakob chuh Mesopotamia gam apat a a hung in Pathien a kawmah a kilak kita, vang a pie a. 10Pathien chun a kawmah, “Na min hi Jakob ahi a; na min chuh Jakob kiti ta puo’n tin, na min chuh Israel hi zaw ta’n a,” a ti a: tichun a min ding chun Israel a sa tai. 11Chun, Pathien mah in a kawmah, “Kei Pathien Bangkim hihtheipa chuh ka hi: chi tamtak suongin hung pung in; chi tih kham zet leh nam chuom chuom tamtak le nang apat in hung pieng intin, na khalbe apat in lengte le hung pawt in au; 12Chun, Abraham leh Isak gam ka piek hi hun pie’ng ka, na nunga na suonte le gam hi pie zel ing ka,” a ti a. 13Chun, Pathien in amah a hopihna mun apat chun Jakob chuh a chieh toh san ta a. 14A hopihna mun achun Jakob in hetzingna suong a phut a, a chung achun thillat dâwn chi a sunga. 15Chun, Pathien in a hopihna mun min chuh Jakob in Bethel a sa ta a.
Rachel Thihna
16Chun, Bethel apat chun a chieh u a, Ephrath khuo tunna ding chuh gamla tak ahi nalai a: chun, Rachel chuh a nauhanat ta a, a gim mah mah mai a. 17Chun, hiti hi ahi a, na taka nau a vei lai in naudawmte chun, “Lau kih, chapa dang nei ding na hi hi,” a tiu a. 18Amah chuh thi ding kuon a na hi a, a thagau in a taihsan ding kuon chun, a chapa min ding chun Benoni#Benoni = Ka lungkhamna cha, tihna ahi. a sa a, a pa chun Benjamin a sa ta a.
19Tichun, Rachel chuh a thi a, Ephrath lampi achun a vui a, Ephrath chuh tu a Bethlehem kiti hi ahi. 20Chun, a thân chung achun Jakob in suong a phut a: zie chuh tuni chan hin Rachel thân suongphuh ahi zing tai.
21Chun, Israel chuh a chieh zel a, Migdol Eder khel achun puon-In a zak ta a.
Jakob Chapate
22Israel chuh zie gama chuh a um lai in, Reuben in a pa mei Bilhah chuh a va kuolpih a: Israel in zie chuh a zata a Chun. Jakob chapate chuh sawmlenih ahiu a. 23Leah chapate chuh Reuben (Jakob cha lutîl) Simeon, Levi, Juda, Issakar leh Zebulun ahiu hi. 24Rachel chapate chuh Joseph leh Benjamin ahiu a: chun, 25Rachel suoknu Bilhah chapate chuh Dan leh Naphtali ahiu a: 26Chun, Leah suoknu Zilpah chapate chuh Gad leh Aser ahiu a: ziehaw chuh Jakob chapa, Mesopotamia gama a neih te chuh ahiu hi.
Isak Thihna
27Chun, Jakob chuh Kiriatharba khuo a Abraham leh Isak ana chênnau Mamre a a pa Isak kawm chuh a tung ta a (Kiriatharba chuh Hebron ahi.)#Tsb 13.18 28Chun, Isak damsung chuh kum za leh sawmgiet ahi a. 29Tichun, Isak chuh khûp leh kha kichih a dam in a thi a, a chipihte kawm a puih in a um ta a; a chapate Esau leh Jakob chun a vui tau hi.
Currently Selected:
THILSIEMBUL 35: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
