IRPHUTNA 11
11
Babel in irsâng
1Khanchu irnêng chunga mi murdi hi chong hmunkhat, thuhril lam hmunkhat an ni vinga. 2Khan hiang hi a nia, nisua tiang an irthon laiin Sinar rama phâizôl an hmua; kha hmun khan om hmun an khuara, 3khan “Tho pilrôngar#11.3: Pilrôngar ti hi atûnlaia (Ita) tia ei lei ihmang ngai hi a ni. siam ei ta, a sate’n hâl inhmin ei ti,” an irtia. Khanchu lung irthûlin pilrôngar hmangin âlkatara leh inluanin. 4Khanchu, “Tho khopui siam ei ti, in irsâng a sîp irzumin irvân sun rakin siam ei ta, ei irhming an thang theina hrangin, khano’nchu irnêng chunga hin irthek indarh zoiin om ei ti,” an tia.
5Khan, Rengpa’n chu mihriam nâihaiin khopui le in irsâng an isin en hrangin a zuanga; 6khan, Rengpa’n “Irngai roi, hi mihai hi pumkhat an nia; hi sin hi iphut a ni; atûn chu hi thil an itho hi khap thei zât khom ni ta no ni. 7Tho zu fe ei ta, chong an irhlet thei loina hrangin an chong zu’ndanglam pehai ei ti,” a tia. 8Khatak ata Rengpa’n annihai kha irnêng chunga a’rthek indartirhaia: khanchu an khua siam kha an mâksana; 9khasikin a’rhming khom Babel an phuaa; Rengpa’n kha ni rengata kha irnêng chunga mihai hi chong dangin an chongtirhaia, a irthek indartirhai a ni ta.
Sema irchihai
(1 Tsn 1.24-27)
10Hi hi Sema irchihai chu an ni. Sema chu kum 100 mi a nia, tuilêt zoi kum hni tena chu nâipasal Arpaksada a neia: 11khan Arpaksada a nei zoiin Sema chu kum 500 a la dama nâipasal le nâinupang a la neihai sa.
12Khan Arpaksada’n kum sômthum ringa a ni le nâipasal Sela a neia; 13khan Sela a nei zoiin Arpaksada chu kum 403 a la dama, nâinupang le nâipasal a la neihai sa.
14Khan, Sela kha kum 30 a ni le nâipasal Ebera a neia; 15khan Ebera a nei zoiin Sela chu kum 403 a la dama, nâinupang le nâipasal a la neihai sa.
16Khan, Ebera’n kum 34 a ni le nâipasal Pelega a neia; 17khan, Pelega a nei zoiin Ebera chu kum 430 a la dama, nâinupang le nâipasal a neihai sa.
18Khan, Pelega khan kum 30 a ni le nâipasal Reua a neia; 19khan Reua a nei zoiin Pelega chu kum 209 a la dama, nâinupang le nâipasal a neihai sa.
20Khan Reua khan kum 32 a ni le nâipasal Seruga a neia: 21khan Seruga a nei zoiin Reua chu kum 207 a la dama, nâinupang le nâipasal a neihai sa.
22Khan Seruga khan kum 30 a ni le nâipasal Nahora a neia: 23khan Nahora a nei zoiin Saruga chu kum 200 a la dama, nâinupang le nâipasal a neihai sa.
24Khan Nahora kha kum 29 a ni le nâipasal Tera a neia; 25khan Tera a nei zoiin Nahora chu kum 119 a la dama, nâinupang le nâipasal a neihai sa. 26Khan Tera kha kum 70 a ni le nâipasal Abrama, Nahora, le Harana a neihai sa.
27Khan, hihai hi Tera irchihai chu an ni, Tera khan nâipasal Abrama, Nahora le Harana hai a neihaia: khan Harana khan nâipasal Lota a neia. 28Khan Harana chu a’rzirna rama, Kaldai hai khua Ur, a pa Tera kôla a thia. 29Khan Abrama le Nahora hai chu dôngma an neia: Abrama dôngma irhming chu Saraii a ni; Nahora dôngma irhming chu Harana nâinu Milkaii a ni, Harana chu Milkaii pa le Iskaii pa chu a ni. 30Khan Saraii chu nâi boiin a chinga. 31Khan Tera’n a nâipa Abrama chu a tupa Lota, Harana nâipahai kuanga a moinu Saraii chu a hruaihaia; khan Kanaan fe hrangin Kaldai hai khua, Ur-ah irthokin an suaka; Haran khua an tunga, kha hmun khan om hmun an khuara. 32Khan Tera dam sûng chu kum 205 a nia; khanchu, Tera chu Haran khuaa khan a thi ta.
Currently Selected:
IRPHUTNA 11: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
