IRPHUTNA 25
25
Dôngma dang leh Abrahama nâi neihai
(1 Tsn 1.32-33)
1Khan, Abrahama’n dôngma dang a neia, a’rhming chu Keturi a ni. 2Khan ama leh hin Zimrana, Joksana, Medana, Midian, Isbaka le Suaha a neipuia. 3Khan Joksana’n nâipasal Seba le Dedana a neia. Khan Dedana nâipasalhai chu Asur-hai, Letus-hai, Leum-hai an ni. 4Khan Midian nâipasalhai chu Efa, Efera, Hanoka, Abida le Elda-hai an ni. Hihai murdi hi Keturi nâihai chu an ni.
5Khan Abrahama’n chu a inei murdi Isaka a pêk vinga, 6nu dang leh a nâihai chu a dam laiin lômmanin thil a semhai; Isaka mithmua nâi danghai chu sim tianga rama om hrangin a tîrhai ta.
Abrahama thina thu
7Khan Abrahama dam sûng kum chu 175 a nia. 8Khan Abrahama chu tar lupôl bianga damin a thi ta, a’rchipuihai kuanga hruaiin a om ta. 9Khan, a nâi Isaka le Ismaela’n Hit mi Zohara nâipa Efrona loia Mamre irdîna Makpela khura an phûm ta; 10#Irp 23.3-16 hi loi hmun hi Abrahama’n Hit mihai kuanga a irchôk a ni: hi hmuna hin Abrahama le Sari chu phûmin an om ta.
11Khan hiang hi a nia, Abrahama a thi zoiin chu Pathianin a nâipa Isaka chu sat a vura; khan Isaka chu Beer-lahai-roi kôla a oma.
Ismaela irchihai
(1 Tsn 1.28-31)
12Khan, hihai hi Abrahama nâipa Ismaela, Sari suaknu, Aigupta mi Hagari’n Abrahama irchi hranga nâihai chu an ni: 13an irhming le an irchi ang taka Ismaela nâipasalhai chu an ni: Ismaela nâilutîr tak chu Nebaiota a nia; a sanghai chu Kedara, Adbeela, Mibsama, 14Misma, Duma le Masa, an ni; 15Hadada le Tema, Jetura, Nafisa le Kedema-hai an ni: 16hihai hi Ismaela nâihai chu an ni, an khua le an omna hmun ang zêla irziak a ni, an irchi ang takin chu rêng sômkhat inhni an ni. 17Khan, Ismaela dam sûng kum chu, kum 137 a ni: khanchu a thi tâka, a’rchihai kuang hruaiin a om tâk a ni. 18Khan a nâihai chu Havila ram ata Assuria ram panin Aigupta ram irdîn Sur dênin an oma.
Esaua le Jakoba suak thu
19Khan, hi hi Abrahama nâipa Isaka irchihai chu an ni. 20Isaka’n Padana-ram-ah mi Suria mi Bethuela nâinu Labana farnu Rebeki leh an irlua lai hin kum 40 mi a nia. (Padana ti chu Mesopotamia ram le hmunkhat a ni.) 21Khan, a dôngma kha nâi nei loiin a chinga, khasikin Isaka’n Rengpa kuanga nâi a zong pea. Khan, Rengpa’n a zongna chu sat a vura, a dôngma Rebeki chu an râi tâka. 22Khan a nâi vonghai chu a phîng sûnga an irsuala; khan ama’n chu itho mo hianga om hrangin teh ki hringa? a tia, khanchu Rengpa irdon hrangin a fea.
23 #
Rom 9.12
Khan Rengpa’n a kuang khan,
“Ni sul sûnga khan mi nam hni an om,
nangma sûnga ngêt mi nam hniin irsen an ti:
nam khat hrât a ta,
nam khat dok a ti:
khan, a ulian ualpu khan a sangpa sin tho pe a ti,”
a tia.
24Khan, a nâi nei zoro a hong nâiin chu, a sûnga khan inphîr an nia. 25Khan a nâi ulian ual chu a senin, puan irmul anga irmul neiin a suaka; khanchu a’rhming khom Esaua#25.25: Esaua ti hi “Seir” ti leh omzia hmunkhat a ni, Edoma ti leh khom omzia hmunkhat a ni, “mul sen thur” tihna a ni. an phuaa, 26kha zoiin chu a sangpa a hong suak nôka, a kut leh Esaua keârtui a chela; khanchu a’rhming khom Jakoba#25.26: Jakoba ti hi Hebraiin keârtui an tihna chu, “Iakob (Jakoba)” an ti. Hnung tianga om inhriat loia doi tihna a ni theia, kha kha “huang” tihna a ni thei. Jakoba irhming hi, “huangtupa” ti thei a ni ta. an tia; khan Rebeki’n annihai a nei zoro hin Isaka chu kum 60 mi a ni. 27Khan nâipanghai kha an hong lian tâka, Esaua chu sa kâp thei mi a nia; Jakoba rêk chu mi phûkdâi, puan ina om ngai a nia; 28khan Isaka chu sakhi hme fâk ngai a ni sikin, Esaua chu a’rngaiinat uala; Rebeki’n chu Jakoba a’rngainat uala.
Esaua’n a nâilutîr nitna a zuar
29Khan, Jakoba’n sûn khat chu bu anh a lei suanga, khan Esaua chu ram ata châmsôl irveiin a hong lûta: 30khan Esaua’n Jakoba kuang khan, “Lungkham takin ni bu anh suang kha nin netir ro ba; a sân ki sôl tâk,” a tia. Khasikin kêng a’rhming khom Edoma#25.30: Edoma ti hi Hebrai chongin “Sen, mi sen” tihna a ni. an iti a ni. 31Khan Jakoba’n, “Ni nâilutîr nitna nir chotir bak ro,” a tia. 32Khan Esaua’n, “Irngai ro, ki ithi va vâng kêng a ni ta, ki nâilutîr nitna ringotin ite a’rfena om ma!” a tia. 33#Heb 12.16 Jakoba’n, “Ki kôla khomâk irsâm bak ro,” a tia. Khanchu khomâk a’rsâm tâka; a nâilutîr nitna chu Jakoba kuang a zuar tâka. 34Khan, Jakoba’n Esaua kha bai le a dâl suang kha a pêka; khanchu a fâkin a nêka, kha zoiin a thoia, a fe ta: hiang hin Esaua’n a nâilutîr nitna hi ite bea a ibe loi a ni.
Currently Selected:
IRPHUTNA 25: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
