IRPHUTNA 26
26
Isaka Gerar rama a om
1Khan kha rama khan Abrahama dam laia châm tâk ti ang khan, châm a tâk nôka, khanchu Isaka chu Filistian-hai rêng Abime-leka kuang, Gerar khuaa a zu fea. 2Khan Rengpa chu a kuang an lâr pea, “Aigupta rama chu zu fe no ro; ram nang ki irhmûna khan om roh: 3#Irp 22.16-18 hi rama hin omin lân, ni kuang om ki ta, sat nang vur ki ti; hi ram murdi hi nangma le nir chihai pêkin, ni pa Abrahama kuanga ki chonginkung kha ki indet hrang a ni. 4Khan, irvâna ârsi tam nêkin nir chi la’npung ki ti, hi ram murdi khom hi nir chihai la pe ki ti; khan nangma irchi ata rammual mi chi tin vânsatna dong an ti. 5Abrahama’n chu ki hê a lâka, ki thuhril, ki thupêk le ki dânhai khom a zôm ngai ang khan,” a tia.
6Khanchu Isaka chu Gerar khuaa khan omhmun a khuar tâka: 7#Irp 12.13; 20.2 khan, a khuaa mihaiin a dôngma thurchi an irdona; khan ama’n chu, “Ki farnu a ni,” a tia; a hmêl a sa sikin, “Hi khua mihai hin Rebeki sikin an ni that itinin,” tihna sikin, ki dôngma a nih ti ngam maka. 8Khanchu hiang hi a nia, kha hmuna khan zoro sôttak a om hnungin, Filistian-hai rêng Abimeleka’n tukver ata a hong vênga, irngai ro, Isaka’n a dôngma Rebeki leh an irsâi lai a hmuhaia. 9Khanchu, Abimeleka’n Isaka kha a koia, “Irngai ro, ni dôngma kêng a ni hi te; itho mo ki farnu kêng ni iti hi?” a tia. Khan Isaka’n a kuang, “Ama sikin ki thi ngânin te ki ti sika a ni,” a tia.
10Khan Abimeleka’n, “Kin chunga hin itho mo hianga ni iti? mihai tu khôkin mani ni dôngma hi an lei siatpui thei hrang anga, khatena chu keini kêng theiloi ni ni inchang hrang a ni hi te,” a tia. 11Khan Abimeleka ngêtin, “Mi tukhomin ama mo, a dôngma moh an them puhai chu thatpaihai hrang a ni,” tiin mipuihai thu a pêkhaia. 12Khanchu Isaka’n kha rama khan omin loi a thoa, hi kuma hin bu khom tamtak a nei: Rengpa’n sat a vur pea. 13Khanchu a hong roiinpuiin, mi’rchongpa a hong kâi tâka: 14Belra le sehrât a hong neia; insûng mi khom tamtak an hong punga; khanchu Filistian-haiin an hong hnarsa tâka. 15Khan a pa dam laia a sinthotuhaiin tuisunsuak hmunhai kha Filistian-haiin an hong nel inbit pehaia, 16khan Abimeleka’n Isaka kuanga khan, “Kin kuang ata rot nôk ta ro, keini nêkin ni ihrât kêng a ni,” a tia.
17Khanchu Isaka chu khatak ata a suaka, Gerar phâia a puan in a sung nôka, om hmun a khuar nôk ta. 18Khan, Isaka’n a pa Abrahama dam laia tuisunsuak choi angin a choi nôka; Abrahama thi hnungin Filistianhaiin an nel inbit pehai sikin: khan, a pa’n irhming a iphuahai angin irhming an neitirhai nôka. 19Khan, Isaka a sinthotuhaiin phâia khan an laih nôka, kha hmuna khan tuihnâr nei an choi doka. 20Khanchu Gerar khuaa sa enkoltuhaiin, “Kha tui kha kin ta kêng,” tiin Isaka sa entuhai leh an irsêla: khanchu kha hmun khan an irsêl sikin a’rhming khom “Esek” tiin a phua ta. 21Khan tuisunsuak dang an choi nôka, kha khom kha irchupuihai tumin an sêlhai nôka, khanchu a’rhming khom “Sitna” a tia. 22Khan, khatak ata kha a’rsona, tuisunsuak dang a choi nôka; kha kha chu irsêlpui ta mahai: khanchu, “Atûn kêng Rengpan ‘hmun liantak a ni la isiam pe, hi rama hin irchi tamtak inpungin om ta ei ti,” tiin a’ rhming khom “Rehobot,” a iti a ni ta.
23Khan, khatak ata Berseba a hong fea: 24kha ni zân khan Rengpa’n a kuang an lâr pea, “Kei hi ni pa Abrahama Pathian kha ki ni; chi no ro, ni kuang ki om, sat nang vur ki ta, ki sinthotu Abrahama sikin, nir chi la pung an ti,” a tia. 25Khanchu kha hmun khan maichâm a siam irfûka, Rengpa irhming a sâma, puan in khom sungin a oma; khan Isaka sinthotuhaiin tuisunsuak an choi nôka.
Isaka le Abimeleka irngeina
26 #
Irp 21.22
Khan, Gerar khua ata Abimeleka chu a rualpa Ahuzatha le a sipai ulianpu Fikola leh a kuang an honga. 27Khan Isaka’n an kuang, “Ni en nuam loia, nin kuang ata nin ni inhnot tâk kha, itho mo ki kuang nin la ihong?,” a tia. 28Khan anni khan, “Rengpa chu ni kuang a om ti fel takin kin inhriat, khanchu ite nang irkôk ta loi hrang le thil sa ti no chu ni chunga ite tho ta loi hrangin, nang kin irzûl tâk ang khan, keini khom kin siatna hrang ite ni tho pe loi hrangin; 29keini le nangma kâra chonginkungna ni neipui ro, kin iti; atûn chu nang vai kêng Pathian satvur dongtu ni inih tâk hi,” an tia. 30Khan ama’n chu an ta hrangin hruai an thê pehaia, an fâkin an ina: 31khan zîng nôka chu an thoia, khomâk an irsâma, khan Isaka’n a tîrhai ta. Khanchu fel takin an ichîn a ni ta. 32Khan, hiang hi a nia, hi nî ngêt hin Isaka sinthotuhai an honga, an tuisunsuak choi thu an hrila, a kuang, “Tui kin hmu ta,” an tia. 33Khanchu kha tuisunsuak kha “Seba” a tia; khasikin kha kho’rhming kha atûn ten hin “Berseba” a la ni mai a ni.
Esaua’n nam dang dôngma a nei
34Khan Esaua chu kum 40 mi a niin, Hit mi Beria nâinu Judithi le Hit mi Elona nâinu Basemathi dôngma’n a neia; 35hihai hin Isaka le Rebeki lungrîl insôltirtu an ni.
Currently Selected:
IRPHUTNA 26: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
